連環輪回不幸事件: 第四章：變化 (2)

「Andy？點解你喺度嘅？」我提出迪迪都有嘅疑問。
「因為我有食早餐嘅習慣。」
「吓？」我哋兩個異口同聲。
「哈哈，Sorry，跳得太快。嗯...或者我由頭講起：我尋晚係喺一個住荃灣嘅朋友屋企度訓，而且仲要上山，我之前係搭小巴落地鐵站。我一向都有食早餐嘅習慣，起身之後當然有食，除咗上次同今次。」
我同迪迪對望咗一眼，之後繼續聽。
「上次我比較心急，所以冇食早餐，可惜等車嘅時間令我並冇早搭一班地鐵。於是今次我唔單只唔食早餐，仲搭的士，於是快咗兩班車，可以喺度等你哋。」
「但你特登過黎做咩？」我問。
「我主要係睇下你哋有冇拎錶。荃灣嘅朋友我記得佢哋電話，所以打電話叫咗佢哋拎，但其他人就……」
Andy擺出個無奈嘅表情，之後繼續。 
「長沙灣個女仔我就叫咗佢男友call佢，你哋就由我黎通知，但美孚嗰兩個就冇計啦，我唔記得佢哋電話，時間亦都趕唔切，唯有等到站嗰時再問佢哋。」




我心中有好多問號，但就老鼠拉龜，冇從入手。
「咦？！你都冇曬啲電話？」我突然發現呢個我想知答案嘅問題。
「嗯…我諗全部人都係。」Andy回答。
「點解會咁架？咁而家點呀？」迪迪問咗一個最大路嘅問題。從語氣中感覺到迪迪好無助。
「唔…等到美孚我就將我目前所發現嘅野同大家講啦，我哋上車先啦。放心啦，我哋而家同一條船，唔會跣你哋嘅。」Andy微笑道。
呢個時候車已經到站，應該喺度嘅人都喺度，除咗大眼美女。
 
「我想等齊人先講，而家不如大家互相認識下先。」Andy講完就自己一個坐底咗，同佢自己講嘅野幾矛盾。
「Hi，你叫迪迪呀可？不如你過黎，我哋傾下計吖。」TB指向一群女仔堆。
「嗯……好吖。」迪迪就咁過咗去。




女仔有起事上黎其實會更依賴同性，或者係佢哋更害怕依賴陌生嘅異性。
見到女仔已經圍埋一堆，我都覺得襯呢個時候同其他人熟絡下都好，始終我哋都算一齊共患難，而且可能仲有排對。
「喂Keith。」同我講野嘅係SK，隔離仲有Bosco。
「得你一個毒撚落咗單咋喎，等我哋做下好心同你傾下計啦。」SK笑道。
「收皮啦。睇你哋兩個咪又係毒撚。」我平時好少同啲唔熟嘅人咁講野，唔知係環境問題定SK份人nice啦。
「佢先係毒撚咋，我唔係。」Bosco反駁。
「屌，收皮啦。」SK道。
「係呢，Keith你而家讀緊咩架？我喺外國讀緊書，而家放假返番香港，點知就中伏，仆佢個街。」Bosco道。
「我而家做緊野。」又係呢種問題，雖然冇心，但聽到「你讀咩」呢種問題始終有點兒那個。
「我讀i大咋。」SK道。




「我之前都係喎。啱啱出黎做冇幾耐。」我帶點興奮回應。
「你都好吖，出咗黎做野。Bosco又喺外國讀番書，屈我哋機，我就做死毒撚，打LOL。」SK道。
「屌，i大都幾好吖，我咪又係垃圾，讀啲廢野。不過而家話知你係哈佛定Kong U，咪又係困喺度。」Bosco道。
「講呢啲～咁我係咪唔應該離開呢個輪回？」SK笑言。
「唉，或者呢個世界仲好，起碼唔使煩前途。」我道。
空氣突然死亡左兩秒，於是話題就咁結束。