連環輪回不幸事件: 第四章：變化 (1)

「請勿靠近車門。請不要靠近……」列車即將駛離深水埗，氣氛並唔和諧，有啲老尷，可能因為投票並唔能夠說服所有人，有好幾個舉手嘅人都西西地面，我聽到Eric細細聲話根本唔使一齊行動，Kiki都表示同意，Magnus、SK、Andy就冇出聲。
「其實我哋都輪咗咁多次啦，輪埋今次再睇下點囉。今次唔出閘，至於拎唔拎隻陀錶，大家自己決定，我始終建議係拎。我哋並冇任何承諾要遵守，但我始終覺得一齊行動會好啲。」Bosco可能見氣氛奇異所以嘗試緩和。
「我都係咁諗，雖然我認為始終要出閘慢慢傾，但我會尊重投票結果。」Andy附和。
「得啦，放心啦，冇事架啦。」Dennis拖住Stella講，唔知係咪想安慰佢。
雖然定咗方向，但其實我哋每一個人或多或少都感到不安，當然咁係好正常，所以之後嘅三十秒都冇人出聲，可能係希望Dennis呢一句說話可以成為我哋嘅結局。
「好似有啲奇怪……」TB打破沉寂。
「我都覺，但又講唔出有咩奇怪。」我回應。
「你哋有冇人眼訓？」Andy問道。
「冇喎～」迪迪同我異口同聲回答，其他人都搖頭。
「係，之前幾次好似都會眼訓。」肥妹仔Yoyo細細聲咁講，與其話係同大家講，佢更加似係自言自語。




「點解……」
我連邊個問點解都未知就眼前一黑……唔係，今次唔同上次，並唔係一篇混沌，只係四周黑曬，除咗人，除咗我哋十八個。
好清楚，我哋每個人都好清楚咁望到大家，我哋驚訝到冇人出聲，除咗大眼美女。一聲尖叫明顯係由佢發出，我哋望住佢嗌，望住佢冇知覺，望住佢突然頭破血流，成個人被撞到半飛，我呆咗，直到真正嘅眼前一黑……                                 
 
「呀～轟轟～」
「唔好呀！」「如果我有預知......」
我嘅聲音同鬧鐘鈴聲同步響起。
「你做咩呀？快啲起身啦，唔係又遲到呀！」媽咪嘅聲音令我冷靜返少少。一如既往，我梳洗過後早餐都冇食就出門。
我好不安，史無前例咁不安。
「唔好有事呀，唔好有事呀……」我不停默唸。去到「利迷」攤檔，「利迷」依然坐咗喺度，陀錶依然安放喺枱面。




咦？得我自己隻錶？即係大眼美女拎咗？我慣常準備伸手去拎嘅時候，突然醒起我哋曾經有人講過唔拎，佢哋會唔會冇拎？最尾嘅一章仿佛係警告我哋一定要拎隻陀錶，To拎or not to拎？我決定whatsapp問下大家。喂？唔係冇add我入group呀嘛？但我真係搵唔到我哋十七人之前所開嘅group。一件一件異常嘅事令我感到好煩躁，我好想發泄。
「屌！」
「Keith……」一把女聲喺我屌嘅同時傳入我耳中。
「係你呀。」我並唔係即刻回應，因為我用咗部分時間黎尷尬同失望，我希望佢聽唔到，更希望我轉頭一望會係大眼美女 可惜佢係迪迪。
「你冇事嘛？」我兩個希望都撲滅。「冇事……sorry，嚇親你。」
「你都搵唔到whatsapp group？」佢望住我部手機講。
「係呀，我唔知拎唔拎錶好。」
「我……拎咗。我本身都想問下大家點，但臨尾見到……」我明白佢唔想再提，我表達能力唔高，唔識講你知當時嘅畫面係點，但我諗大概好似目擊有人比車撞或者跳樓咁。「我明。咁……我都拎啦。呀！之前我咪話我見過佢隻錶嘅，但而家冇咗，你估會唔會……」我指嘅「佢」自然係大眼美女，而迪迪亦意會到。
「咁我哋即刻行啦。」我哋兩個加快步伐，一直到月台都見唔到佢，但就見到一個意想不到嘅人……