連環輪回不幸事件: 第三章：集合 (2)

「喂～」
大眼美女並冇停低，佢行得更加快。佢走咗之後，剛才嘅違和感亦隨時間消逝，注意力開始集中，我感到恐懼！其實點會唔驚，不過一直分散注意力，唔比自己亂諗，但而家唔到我唔諗。雖然驚，但我唔知可以點做，只好相信Andy嘅說話，快啲上車，人喺六神無主嘅時候更易信人。
「你仲……記唔記得我？」一把女聲從旁響起。
「嗯，今次好清楚。我哋快啲落地鐵站啦。」我向女聲嘅主人作出回應。
我清楚記得佢叫迪迪，係上次五人幫嘅唯一女將。五人幫係指最先發現問題嘅我哋。
「其實我哋……仲可唔可以返番去？我今次……已經係第三次輪回啦……落到去真係可以解決到咩？」迪迪問。
我冇應佢，佢所問嘅亦係我心中所想，我唯有繼續行，希望踏入車門之後會得到一個答案。迪迪見我冇答，佢亦冇再出聲，只係跟隨我嘅步伐，進入我哋嘅希望之門。
去到月台，我見到大眼美女。我哋都互相視而不見，迪迪想向佢打招呼，但我阻止咗。今次我同迪迪一齊行咗去第一卡。
之前我係喺第六道門，即係第二卡嘅第一道門，今次係第五道，亦即係大眼美女之前幾次嘅位置，而今次大眼美女行咗去第四道門，我諗佢有心避開我。
地鐵到站，車門一開我已經知今次好唔同。之前喺第五道門與車廂接駁位之間嘅就只我哋五人幫，其餘人都喺較前位置。今次我一望，唔計我哋，經已有十二個人企曬喺度。我同迪迪行入車廂，我往大眼美女方向望，佢坐喺靠近第四道門嘅一個座位，而佢對面坐咗個男仔，我認得個男仔係喺荔枝角落車個位。




好快我嘅注意力就落返喺連埋迪迪，企喺我面前嘅八男五女身上。未幾，一把男聲響起。 

「你哋黎啦？好似有啲廢添。」Andy微笑道。
「我哋頭先問咗大家對現狀嘅了解，大部分都只係知我哋不停輪回，仲有大家都有呢隻陀錶。」黑仔接道。
大部分？我心裡即刻有個疑問，但我未問已經有人繼續講野。
「呢個車卡只有嗰個男仔…唔…同埋啱啱入黎嗰個女仔唔知發生咩事。」其中一個背多分女仔指向第四道車門方向。
「個女仔應該知……」跟住我將我嘅所見所聞娓娓道來。
呢個時候架車已經就到茘景。
「咁知唔知佢有冇陀錶？因為個男仔唔單只冇輪回嘅記憶，佢仲話自己冇見過隻陀錶。」另一個較矮嘅MK妹問道。
「陀錶……係啦，係陀錶呀！我知啦。」我自言自語。




「你講乜撚野呀？」Billy不帶惡意咁問我。
「我諗個女仔應該冇拎隻陀錶。頭先我拎自己隻錶果陣已經覺得怪怪地，不過可能習慣咗，冇點留意。我有印象我拎錶個攤檔度好似仲有一隻陀錶，之前幾次都冇架。我諗應該係……」我解釋。
「唔通佢唔記得拎？」MK妹問。
「應該唔會。我哋一開始都係憑自我意識去拎，並唔係靠記憶，即係話即使冇記憶都會拎。佢唔拎只可能係佢特登唔拎。我諗佢同你一樣諗法，不過佢行動力比你高，亦比你衝動。」Andy最後個句向住木偶哥，語帶雙關咁講。
忽然間好似有少少火藥味。