連環輪回不幸事件: 第三章：集合 (3)

「我都話架啦，諗咁多做咩！唔拎隻錶咪唔會輪回，咁咪咩事都冇囉！」木偶哥反擊。
我望一望木偶哥，發覺佢一直拎高佢部電話，我輕聲問一問企我隔離嘅黑仔，原來佢打咗比佢女朋友，開咗免提一齊傾，不過個女仔就以聽為主。
架車到咗美孚，兩個男仔從我背後嘅車門走咗入黎，唔靚仔嗰個一入到就係咁問咩事，喋喋不休，我見到另一位靚仔面露煩厭嘅表情，我諗等車個陣佢都幾慘。
背多分安撫咗佢哋嘅情緒之後建議自介一次，因為畢竟而家都算係齊人，除咗大眼美女……
「我叫Keith。」最後一個嘅我都自介完，我認為叫背多分會更加貼切嘅其中一個女仔TB建議開Whatsapp group，我就咁冇咗第一次——比女仔攞電話。BTW，其實佢並唔係TB，佢話只係花名，比人玩而改。

茘枝角落車嘅男仔落咗車，成卡車廂得番大眼美女一個格格不入。我哋有暗示叫佢過黎，但佢扮唔知，點都唔肯黎。我哋唯有自己傾。
「我哋講返之前嘅話題。而家我哋有兩個選擇：一係等下次輪回唔拎隻錶，一係我哋深水埗出，再從長計議。我唔建議……」Andy未講完，木偶哥Dennis就截停咗佢。
「其實諗咁多做咩？都話唔拎咪得囉！」
「但冇人知唔拎會點喎～」




「其實我都建議唔拎……」
「拎咗先再傾下點做唔係好啲咩？」
「咪臭系，再傾下又唔會死，都輪咗幾次啦，唔爭在啦！」
「傾啲咩？有線索咩？傾？傾條毛。」
大家七嘴八舌，傾到木偶哥女友Stella都上埋車都冇任何結論。
「如果真係要走，最遲下個站出架啦。」Andy仍然堅持出站會好啲。
「我都係咁諗，出啦。」身型瘦削嘅男仔Eric就和議。
「我就點都唔出架啦。較冇人知出咗去會發生咩事囉！」Dennis亦半步不讓。
「不如我哋投票啦！始終再傾都唔會有結果，你哋贊唔贊成？」好少出聲嘅Bosco似乎成功打破僵局，大家靜咗陣，紛紛都表示同意。
「咁我數三聲，贊成出站嘅就舉手，唔贊成嘅唔舉就得。準備好未？一，二，三！」Bosco倒數之後，我望咗迪迪一眼，佢冇舉到，唔知點解我覺得我應該要同佢共同進退，可能我哋一齊上車掛，所以我都冇舉。




當然我唔係冇諗過亂咁黎，我都同意Dennis所講，反正冇人知出站或者唔拎錶會點，一動不如一靜，出站感覺危機更大，所以我決定唔舉。
最後舉嘅有MK妹Kiki，Bosco，Andy，SK，Eric同埋Magnus，唔舉嘅人多啲。我哋嘅方向就咁定咗落黎。