連環輪回不幸事件: 第二章：發現 (3)

「你係咪認得我哋？」包大人問。「吓…er…係呀」突如其來嘅問題，我反應唔切咁回答。
「咪住先，我…我唔識你哋架其實。我……」正當我諗緊同佢哋講我夢見過佢哋係咪好on9嘅時候，佢就打斷咗我。「我哋都認得你，唔只你，呢度所有人我哋兩個都認得曬，而且上次已經認得。」
「上次？你哋都發咗預知夢？」我反問。「你up乜7呀？夢乜撚野呀？」男人佬味加入對話。
「睇黎你都未完全清醒。我哋不停重覆緊同一段嘅生活。有印象以來，至少已經重覆咗兩次，即係我哋經歷緊第三次一樣嘅生活。」包大人嘗試解釋。
「痴線！」基本上如果有個唔識嘅人同你講「我係都敏俊，我係外星人」你唔第一時間話佢on9你已經好有文化。而我係有文化嘅人，所以我只係冷冷地回應「你哋就未清醒！」
「屌！你以為真係發到啲咩預知夢呀？你輪回咗幾次有印象咋。講你又唔信。」男人老味反擊。我腦中以衝鋒21嘅速度諗緊點回應。突然一把女聲加入我哋之中 。
「你哋…係咪都察覺到？」
「嗯。」包大人回應。 
「睇黎至少有四個發現咗，係有個唔肯接受啫。」男人佬味望住我講。
我望望個女仔，不是別人，正是高瘦平是也。我個衝鋒21淨係諗到兩樣野：一係TVB啲19玩人節目想玩9我，一係我哋真係跌入咗時間嘅輪回。係前者定後者，我諗聰明嘅讀者都知，我都知…… 





「我…嗯…ok，咁而家應該點？」我人生中適應得最快嘅一次。
「頭先我哋兩個傾過，應該係去到太子之前就會輪回。」包大人回答。
「老實講，我上次比較清醒，頂住唔訓，見住我哋十八個人慢慢消失，跟住一醒又喺番屋企。」男人佬味續道。
「不過你問到點就真係唔知。你哋有冇諗到啲咩？我哋要快啦，下站已經係美孚。」包大人問。
「會唔會係隻陀錶呀？」高瘦平細細聲咁拎住隻陀錶講。
我見到隻陀錶寫住兩隻字，我突然諗起：「係呢，大家叫咩名？」
我一問，自己都有啲唔好意思，始終呢個時候好似唔啱氣氛。
「我叫迪迪。」高瘦平先回應。
「我叫黑仔。」包大人跟住答。




「叫我Billy啦。」男人佬味都自介埋。
「我叫Keith。」我冇奶油唔講架。
「雖然自介都必要嘅，但時間真係唔多啦……」黑仔帶少少怪責道。
正當我非常尷尬之際，我靈光一閃：「我係度諗會唔會同我哋嘅名有關呢？」
「嗯，都有可能。我哋拎自己隻陀錶出黎，睇下有冇咩線索。」黑仔建議。
於是唔單止迪迪，我哋三個都相繼拎出自己隻錶。
「邱命…陳延香…賴代雄…」我默唸咗一次，除咗發現黑仔原來係姓陳唔係姓包之外，就再發現唔到任何有關線索。大家沉思咗一陣，最後都搖頭表示冇頭緒。
「應該唔關事……」黑仔顯得有啲失望。
可能頭先大家集中喺陀錶同名身上，而家留意番周圍嘅環境，發現真係多咗好多聲音，同埋原來下一站已經係太子，我哋十八個人又再齊集。
「睇黎又要等下次。不過今次咁嘈，睇黎大部分人都已經意識到有啲事發生咗。下次應該可以一齊傾。」黑仔已經明白現刻唔會再有咩新進展。




「嗯，雖然唔知係咪大部分人，但至少我都意識到。同埋唔使下次，而家都仲有一分鐘可以傾。我叫Andy。」一個平凡嘅四眼仔插道。