連環輪回不幸事件: 第二章：發現 (2)
「呀……」佢雙唇微張，只係發出咗半個音，欲言又止，最後緊張又不安地轉身落咗去地鐵站。我比唔到任何反應，因為整個過程好短。我呆咗一陣，諗起有靚女等緊我，再諗起原來我就嚟遲到，於是我就加快步伐，沖落地鐵站。
落完樓梯，我已經見返頭先個女仔嘅身影，我冇理到佢，可能連我都有啲老尷，於是扮睇佢唔到就沖咗入閘。
直到行到月台，我都見唔到一個靚女。唉！你估真係發預知夢咩？我邊有咁好異性緣吖～講就咁講，我依然回頭，凝望住從上至下嘅天梯，期待會運一個天使落黎。點知落黎仍然係嗰個女仔，我即刻嘗試移開我嘅視線，但我嘅視線並冇完全移開，因為靚女……唔係，係大眼美女，同夢中一樣嘅人又再出現，大眼美女企咗喺佢後面，睇黎真係預知夢。
佢行到去車頭數起嘅第五度門，於是我就係後一度門停底，一路扮㩒電話一路望佢。我諗比夢中嘅我，呢一刻我更加大膽，唔知係咪因為夢中已經試過，平時我都驚會比人發現我望女，但呢次我望得好明顯，我收埋部iPhone13，直接望過去。
嘩！原來佢都係度，我指嘅當然唔係大眼美女，而係呢個高瘦平。高瘦平？！我好似一早已經幫佢諗好咗呢個名咁……
呢個時候架車到咗，兩個女仔都上咗車，於是乎我都上車。
「我記得番曬啦……」我好細聲咁講咗出口。
有啲誇張，其實我只係記得番個夢，但個感覺好似失憶之後突然記番起曬所有野咁。車上每一個人我都記得：包大人、木偶哥同佢女友 、型鼻男神 、仲有高瘦平……原來呢個高瘦平就係我夢中見到個位高瘦平，唔怪得咁熟。雖然夢中所有嘅人都有出現，而且我都認得，但佢哋嘅感覺同夢中有啲唔同，點講呢……佢哋嘅位置同行為都唔同：我發現包大人同一個有啲瘦但又有陣男人佬味嘅男人傾計、木偶哥已經傾緊電話、高瘦平行咗去同夢中唔同嘅位置……簡單啲講，嘈咗同熱鬧咗好多。
對我而言，其實冇咩特別，因為雖然話就話係預知夢，但其實冇人話過真係會同現實一模一樣，有唔同都唔出奇，何況認真一諗，so what？唔通行去同大眼美女講：hi，我之前發夢夢見過你呀……咁咩。我諗下都覺得on9啦。都係望下大眼美女，然後返工算啦。
我諗大眼美女應該係少數同夢中差唔多嘅人，佢都係坐低，然後靜靜地聽歌。
正當我得興起嘅時候，突然有人拍我膊頭，我轉頭一望，原來係包大人同啱先同包大人傾計個位男人佬味。我當時心諗唔通包大人真係我小同？但原來結果遠超過我所想……