連環輪回不幸事件: 第二章：發現 (1)
「zzz……」一個坐喺其中一排椅嘅瘦削男仔發出鼻寒聲。
佢唔係話矮，但睇得出佢應該得五十公斤左右。
我嘅視線再轉移去到一個女仔身上，唔係因為佢靚，只係我無聊周圍望。
我發現佢好奇怪，佢同之前個位包大人一樣周圍睥人，仲睥得快好多，不停轉人，唔同嘅係佢帶有一種不安嘅感覺，好似好驚嘅。雖然唔靚，但見佢不安嘅樣都幾可愛，而且佢幾高，應該有165以上，可惜嘅係佢係一部平板電腦，就算唔識佢，我都估到佢叫咩名--姓高名瘦平。
唔知係咪瞓覺會傳染，個女仔個頭冇再係咁轉，慢慢…慢慢…佢開始停落黎，佢開始釣魚，再跟住連我都有啲眼訓，可能尋晚通宵睇利對獌掛，我都決定瞓嚕……
我合埋雙眼，感覺到架車開始轉彎去太子，慢慢…慢慢…意識開始薄弱，係我完全失去意識前，我淨係聽到一句「屌！點撚解又係咁架仆街！」一把粗豪嘅男聲。之後就咩都冇。如果你知咩叫混沌，你大概就知咩叫「咩都冇」。雖然我都唔知咩叫混沌……
「如果我有逆轉的超能力......」呢首歌係我手機鈴聲，不過呢刻形容佢做鬧鐘鈴聲會比較好。
我冇理到呢個鈴聲，繼續訓……訓多一分鐘啦。當然，賴過床嘅你都知一分鐘係有幾長。
「咩夢嚟架......仆街……又遲到！」我心諗。算啦，行快兩步好過。咦？！前面咁熟面口嘅？前面有個小攤檔，攤檔有個著住利記球衣嘅人。係邊度見過呢？夢……不過尋晚個夢唔係咁個喎，唔通係我之前發夢見過，係預知夢？雖然記唔曬個夢嘅內容，但依稀記得有個靚女等緊我，如果真係預知夢嘅話。
我決定無視個攤檔，無視個利迷，加快腳步去睇下係咪真係有靚女。喺由原位到攤檔，短短十秒嘅路程，我諗唔起靚女個樣，我腦海淨係浮現出一隻陀錶，一隻木製嘅陀錶。我行到攤檔前，下意識望咗眼，係陀錶！係木製陀錶！正當我腦海空白一片之際，利迷口中念念有詞，同我唔知講咗啲咩，而我又唔知點解連少少遲疑都冇就拎走咗佢，自然到就好似本身就係我嘅野咁隨手就放咗落袋。
到咗A出口，準備落去之際，有個女仔迎面走過黎，佢頗高，大概167左右。佢不但瘦，仲要冇胸，隻眼又細，眼袋係眼嘅兩倍。不過其餘四官總算端正，加上佢走過黎嘅時候含情脈脈咁款，咁主動，我都比到5.5分嘅。不過睇落好熟眼，可能都係住呢頭啦，見過都唔出奇。咦，咁即係佢已經留意咗我好耐，今日終於忍唔住？
我FF嘅時間，佢已經不知不覺間行到黎我面前……