連環輪回不幸事件: 序章：陀錶 (3)
「下一站美乎。 下一站美乎。The next station is Mei Foo.」
搭咗兩個站，呢卡一直都冇人上車，重點當然係冇女啦，希望呢個站有啦！做人就梗係得一想二，雖然大眼美女唔差，但總會想有更好，哪怕只係得個望字。就好似時間咁，有邊個唔想愈多愈好，除咗幾個站之後嘅我哋……
車門打開，有兩個人影，我當然期待……咗一秒。我知我唔應該抱有希望，邊有咁多靚女呀，但都唔使入兩個男架，仲要其中一個鬼咁靚仔，加埋一個可以媲美劉德華鷹鼻嘅鼻，係女都比佢殺咗九成。當場都已經有四個女仔望住佢，當中包括大眼美女……另一個男仔就……四個字：其貌不揚，不提也罷。
呢個時候我都冇咩心情理其他人，囡都係膚淺，見靚仔就＿曬咁，雖然我都係膚淺嘅動物。OK fine，我都係進入番我嘅FF世界，繼續沉思。
諗落先至覺得奇怪，成個車卡得十幾人，就算係紅日，就算係朝早，都好似少咗啲，仲要係新年，仲要全部都係我呢個年齡層，睇黎我哋都幾有緣……掛。
「喂。陣間你係車頭上車呀。嗯…嗯 …好啦bye~」
一通電話將我由沉思中帶返出黎。可能呢卡車卡一直都比較靜，除咗兩個本身識嘅女仔有咬下耳仔，其他人都應該互不相識，所以直到有個男仔傾電話先有番啲聲。
到咗茘枝角，有個男仔落咗車。佢肯定係前世做咗好多好事，呢個係我唔知過咗幾耐之後嘅一個諗法。
冇幾耐就到長沙灣，有個女仔上車，佢唔高，比大眼美女仲要矮幾cm，靚唔靚就見仁見智，至少對頭先講電話，個樣好似木偶哥林師傑嘅個位男仔黎講係好靚，因為一睇就知佢哋係情侶。點解？少年你太年輕了。
架車開到深水埗，冇人出入呢一卡，就即係已經注定咗真正嘅有緣人。呢度仍然有十八個人，而呢十八個人比起銅人更有緣，因為我哋所經歷嘅野，時間分分鐘比銅人更多，呢世我都唔會唔記得其餘十七個，至少呢一世唔會……
～序章完～