援交學入門: 第十四回﹒一次，Peggy遭胡椒噴霧射中次數
「明人唔做暗事，暗處有狗咬腳。」黎明
孫雪娥被林宛琪激死，林宛琪本身打算好似一般人做法咁，送佢到醫院，然後火化埋葬。不過林宛琪有樣嘢擔心，就係萬一孫雪娥冇真係死咗，只係心跳暫時停咗，醫院救返佢，到時就援交一事，自己同俊仔咪好大鑊？孫雪娥醒返會唔會告佢企圖謀殺？就算告唔入，都對佢嘅援交事業帶嚟好大麻煩？孫雪娥生前已經係吸血鬼啵，幫孫雪娥埋葬又搞喪禮咪又要嘥錢？林宛琪唔知點算好，只可以搵佢心中萬能嘅Carrie求救。Carrie建議有兩個，一係以正常方法，送佢到醫院同火化埋葬；如果唔係嘅話，只能夠扮孫雪娥失蹤，但係點樣扮佢失蹤呢？
「抌落海咪得囉！」對於林宛琪對自己老母嘅冷血，Carrie稱奇，但絕對尊重林宛琪嘅決定。冇計，林宛琪太憎佢老母，冇諗過第日上山拜佢，抌佢落海餵鯊魚仲好過！更何況Carrie抌人落海經驗豐富，於是佢哋合力將孫雪娥條屍抌入大海。
孫雪娥從此消失，但林宛琪未咁快開心得住，點解有人偷拍兼流出？邊個畀啲嘢孫雪娥睇？林宛琪懷疑係咸濕強偷拍，但係佢唔肯定；不過畀孫雪娥睇呢單嘢，佢都幾肯定係張凱婷做嘅，因為除咗張凱婷外，有幾多人知道佢以前住邊呢？林宛琪想刪除影片同埋對付張凱婷，但係未行動之前，佢同Carrie已經揦屎上身。事因Carrie之後到台灣出差，佢去到某沙灘，點知發現孫雪娥漂咗上岸！原來孫雪娥仲未完全死咗，只係奄奄一息。Carrie本來唔想理孫雪娥，有得佢自生自滅，但係諗到如果佢真係清醒返，對自己同林宛琪咪好大鑊？於是Carrie送孫雪娥一程，推佢落大海，今次仲唔死？
冇錯，孫雪娥今次真係死咗！屍體好快再次漂到台灣某個沙灘兼畀人發現，當時Carrie已經返到香港，同一時間Carrie推孫雪娥落海嘅片段流出，原來當日遠處酒店嘅閉路電視竟然影到！台灣政府要求港共政府移交Carrie，但港共政府冇理會之餘，仲話要整條《逃犯條例》先，先可以引導Carrie到台灣受審，同時順便對付埋Mandy呢啲「反中亂港」份子，結果引發「反修例運動」。Carrie成為風雲人物，佢嘅事蹟好多都曝光，包括點解孫雪娥飄咗去台灣、Carrie同林宛琪嘅關係，亦連帶林宛琪做援交、做龜婆、賣偉哥、同俊仔嘅3P服務都受到大眾留意。最終，Carrie同林宛琪入獄，但Carrie從來都冇送到台灣受審。
林宛琪入獄，佢多年努力經營嘅援交帝國正式瓦解，除咗番茄同粟米傻更更咁一齊被人拉埋外，林宛琪其下囡囡有唔同發展。例如Jenny，佢細佬嘅債未還清之餘，仲不斷增加，就算佢好驚林宛琪單嘢令佢資料外洩，成為警察眼中釘，但係佢幾唔情願都好，都要冒住危險繼續做生意，不過生意始終唔及以前；亦有囡囡如Doris想走好耐，就趁呢個機會唔再做援交；或者好似Amy咁，覺得賺夠，順便離開援交界。當然有啲囡囡唔知點算，佢哋主要係比較新嘅囡囡，例如Peggy同Pinky，只好當放住假先，睇吓之後點。
相比其他囡囡，Kathy、俊仔同Tiffany最受影響。Kathy喺一次警察放蛇行動中被捕；至於俊仔，除咗佢親愛嘅家姐被捕外，佢同佢家姐淫亂嘅事，無論係真定係網民亂作都好，都廣泛流傳。俊仔被人起埋底，連佢喺邊間醫療中心返工都有人網上講，佢嘅同事都知道佢嘅事，個個都避開佢，唔想同佢有任何接觸，覺得佢好污糟同好變態。始終好多人心中，俊仔形容乖巧，佢哋可能接受到壞男人風流好色，但係乖仔絕對唔可以同性扯上任何關係。乖仔衰咸濕，喺社會道德標準嚟講，係件好恐怖嘅事，更何況援交同亂倫呢？醫療中心只好炒咗俊仔，俊仔被迫隱居一段時間，等事件丟淡先出嚟搵工。
唔知點解，Tiffany亦因事件而曝光，佢以前流出嘅片再度興起。Tiffany身心受挫，原來放蕩嘅生活無法醫治過往嘅傷痛，最終佢自殺身亡。
至於張凱婷，佢達成剷除林宛琪呢個目的，而家援交界冇咗林宛琪呢個霸主，出現真空期，係張凱婷發圍好機會！張凱婷本來想喺網上踩多林宛琪幾腳，講佢明明超過三十歲仲扮少女、濫收客人開房錢等等；不過張凱婷睇見唔少關於林宛琪嘅討論，竟然有啲心軟。張凱婷心諗，與其花時間對付一個失敗咗嘅人，不如花多啲心機落自己嘅援交生意仲好啦！
點樣提升生意呢？張凱婷冇林宛琪咁有生意頭腦，佢見有人搞「黃色經濟圈」，不如搞個「援交黃色經濟圈」啦，反正林宛琪肯定係「藍色經濟圈」！雖然張凱婷的確反對修例，亦支持佢好友Mandy上街抗爭；不過你話你係黃絲，人哋一定信咩！所以張凱婷嘅「援交黃色經濟圈」對佢生意幫助唔大。
張凱婷再諗，有乜嘢可以增加生意額呢？張凱婷諗到Peggy同Pinky，但點聯絡到佢哋呢？張凱婷問過Rainie，但係佢話同Peggy兩姊妹唔熟，冇佢哋聯絡方法。直到有一日，咸濕強幫襯張凱婷，張凱婷問佢有冇Peggy同Pinky嘅聯絡方法，於是咸濕強將佢兩個電話號碼畀張凱婷。其實有Peggy同Pinky電話嘅人並唔多，始終佢兩個都好聽林宛琪話，唔會私底下將自己電話號碼畀人，要咸濕強花好多心機咁呃呃氹氹，先至得到。
張凱婷聯絡Peggy同Pinky，起初Peggy同Pinky都唔想理張凱婷，因為林宛琪單嘢過咗唔係好耐，再做援交會有風險，而且佢哋以前一直依賴林宛琪，自己唔係點識得接客。張凱婷明白佢哋嘅擔憂，並幫佢哋諗辦法，之後遊說佢哋⋯⋯其實張凱婷睇準佢哋仲等錢使，所以張凱婷喺呢方面說服佢哋，話會幫佢哋接客，自己抽佣遠低於林宛琪。就係咁，Peggy同Pinky加盟張凱婷旗下，張凱婷榮升為龜婆。
不過，張凱婷冇因Peggy同Pinky嘅加盟，帶來好大得益，因為社會事件的確會影響援交業。喺港共二十三年，即公元二零一九年，港人喺援交嘅消費明顯減少，一嚟社會事件帶嚟經濟唔好，大家少咗呢方面嘅消費；二嚟社會事件帶來交通不便同埋外出嘅危險，令到大家卻步；三嚟社會氣氛好似林宛琪三歲生日嗰陣，大家都冇心情扑嘢。
其實點止嫖客冇心情呢？好多援交妹乃至各行各業嘅打工仔，都冇心情做嘢，Peggy係其中之一。Peggy經常參與遊行，幾乎每星期都去，但有一次佢去遊行後，就下落不明，失去聯絡。Pinky同張凱婷大為緊張，張凱婷緊張嘅，唔止係佢唔見咗個生財工具，而係佢真係擔心Peggy嘅安危。始終，Peggy同Pinky仲係細路女，張凱婷喺佢哋面前係大家姐⋯⋯一直以嚟張凱婷都係被人照顧嗰個，佢未試過照顧人，都冇諗過照顧人；而家有兩個幾聽自己話嘅妹妹，張凱婷可以唔理咩？張凱婷彷彿意識到自己係Peggy嘅長輩，要照顧對方，更何況佢支持抗爭，同情抗爭者。張凱婷搵Mandy幫手，睇吓有冇Peggy下落；而當時Mandy已成為一名律師，有參與組織示威活動同支援被捕人士。Mandy當然好樂意幫手搵Peggy下落，但係搵唔到。
咁嘅情況，張凱婷同Pinky都冇乜心情接客，最多接啲熟客生意，咸濕強係其中之一。咸濕強最近經常加班，加班費賺唔少，所以佢一有時間就幫襯張凱婷，以發洩其淫慾，尤其是呢排張凱婷喺床上被動咗，激發起佢嘅獸性。有一次，咸濕強一入到房，就立即強姦咗張凱婷。咸濕強行為極為粗暴，比當年阿英對林宛琪仲粗暴，過程中仲要冇戴套，條撚亦插入咗唔應該插入嘅地方。張凱婷覺得非常噁心，事後身體不適。
張凱婷唔想再接咸濕強生意，佢以社會運動帶來交通不便為由而拒絕，但係咸濕強點會理佢咁多呢？皆因咸濕強有份參與鎮壓示威，覺得自己好威，成世都未試過咁威。雖然咸濕強都知好多人唔鐘意佢，但又點？佢而家做乜都得，捉你返差館點對你都得啦！
看官聽說，一個男人有權有勢，或者自以為好威、好勁，就會思淫慾；如果冇任何節制嘅話，嗰個男人只會變本加厲，做出常人唔敢做嘅事。咸濕強當然有過之而無不及，因為佢本身已經夠咸濕，張凱婷同林宛琪有咩服務佢未玩過呢？咸濕強需要新刺激，床上嘅佢只會變得更瘋狂，性需求比以前更強！所以佢一得閒就要舒發吓，當係減壓或獎勵自己喎。
對於張凱婷唔想做佢生意，咸濕強覺得係個笑話，張凱婷愈唔願意，佢嘅心癮就愈大。咸濕強覺得，而家冇人能夠抵擋佢嘅淫威，張凱婷搞緊「援交黃色經濟圈」，你估佢唔知咩！咸濕強利用呢樣嘢，威脅張凱婷，話如果張凱婷唔為佢服務嘅話，就會拉人。咸濕強仲話有片作為證據，張凱婷只好屈服。
其實自覺好有淫威嘅，點止咸濕強一個呢？成支警隊都唔知有幾多人係咁。咸濕強帶埋佢四位同事一齊淫辱張凱婷，佢哋著起制服，做咗好多張凱婷唔情願嘅行為，而且咸濕強利用威脅，所以唔畀錢。張凱婷好記得林宛琪嘅說話，話佢哋嘅身份係滿足客人嘅慾望，冇同理心係做唔到嘅。張凱婷見盡唔同類型嫖客，有啲客死慳死抵，都要幫襯張凱婷一次；有啲客係處男，人到中年仍未掂過女人身體，哪怕唔夠一分鐘就射，佢哋依然對張凱婷感激不已，視張凱婷為恩人；有啲客經過情傷或色情詐騙，喺張凱婷身上竟然得到心靈治療，甚至喺張凱婷面前喊。張凱婷冇都冇諗過，而家嘅佢竟然喺個客面前喊，咸濕強嘅慾望，佢承受唔起。
Pinky嘅情況都唔好，如果唔係急住搵錢，佢都唔想繼續做落去。Pinky比張凱婷勤力得多，就算心情幾差、出面幾咁危險、張凱婷問佢需唔需要休息都好，佢都堅持繼續接客，結果真係出事。有一日，Pinky交易完離開酒店嗰陣，樓下咁啱有示威，警察開始捉人，大量人群走避。Pinky傻更更都唔知發生咩事，畀人撞跌咗後就畀警察拉鬼咗。張凱婷得知後，連同Mandy去保釋Pinky，佢哋見到Pinky嗰陣，發現Pinky身上有唔少傷痕，好似被人打過咁，目光呆滯。離開差館嘅路上，Pinky講咗兩句話：
「我⋯⋯可唔可以唔做？」
「唔好同我屋企人講我做過嘅嘢⋯⋯」
張凱婷當然冇問題，而家咁嘅情況，仲諗賺錢咩！Mandy問Pinky去邊，如果佢唔方便返屋企嘅話，可以收留佢。Pinky謝絕，然後獨自離開，從此音訊全無，有詩為證：
別後不知君遠近，觸目淒涼多少悶。
事後張凱婷同Mandy食飯，不過張凱婷估唔到嘅係，呢次係佢兩個最後一次見面。Mandy作為社運份子兼被捕支援律師，當然係差佬嘅眼中釘。有一次遊行，Mandy被捕且失去聯絡；過多半個月後，Mandy從高處「跳樓自殺」身亡。
張凱婷好肯定Mandy唔係自殺，因為Mandy平時份人積極樂觀，點會自殺呢？而且佢哋最後一次食飯嗰陣，Mandy仲講咗好多光復後嘅香港應該點，加埋最近有好多所謂嘅「自殺」消息，你叫張凱婷點相信呢？係得張凱婷老豆老母先會信啫，日日喺度鬧Mandy呢啲人係廢青、讀書讀壞腦⋯⋯張凱婷冇咗Mandy，即係冇晒朋友，有時夜晚瞓覺發夢，佢會夢見以前同Mandy、俊仔、甚至林宛琪嘅開心片段，瞓醒時先發現原來係南柯一夢，眼睛已經充滿淚光。
張凱婷一方面應對各人離開而帶嚟嘅情緒壓力，另一方面要應付咸濕強嘅威脅，張凱婷覺得自己冇乜嘢可以輸，反而令到佢唔再怕咸濕強。張凱婷認為，如果佢仍然驚咸濕強嘅話，好似對唔住Mandy、Peggy同Pinky。就係咁，某一日張凱婷同咸濕強開房，大玩SM，張凱婷綁起咸濕強四肢，乘機閹咗佢！咸濕強最終失血過多，死咗。
畢竟未知後來如何，且聽下回分解。