援交學入門: 第十三回﹒二人，林家賣淫人數
「規矩同處女膜一樣，係用嚟破嘅！」林宛琪
林宛琪同張凱婷關係斷裂，倆人唔止工作關係結束咁簡單，而係完全反面，連朋友都冇得做嗰隻。大家可能諗，張凱婷嬲林宛琪大家仲理解到，但點解林宛琪同樣咁憎張凱婷呢？真係純粹為咗俊仔咁簡單？答案當然唔係啦！林宛琪事業發展順利，佢深信，除咗有Carrie、阿英同Donald嘅協助或啟發外，其他都係靠自己。林宛琪覺得再好嘅囡囡、人同事物，交由有眼無珠或唔識得管理嘅人如張凱婷，只有死路一條。援交事業嘅成功，為林宛琪帶來無窮嘅自信，佢亦相信佢其下嘅囡囡而家活得好、賺得多，都係多得林宛琪佢自己。如果冇林宛琪，Jenny有錢幫佢細佬還債？張凱婷能夠接到好嘅客人咩？林宛琪好清楚呢一點，所以有囡囡唔妥佢嗰陣，佢會變得敏感。
林宛琪同張凱婷冇再合作，一眾嫖客都覺得奇怪，始終林宛琪同張凱婷係援交界嘅黃金組合，一定有啲原因令佢哋冇再合作。林宛琪明白呢一點，佢亦深信冇咗林宛琪嘅張凱婷，乜都唔係，至少唔能夠好似以前咁風光，而且上次俊仔嚟到令佢諗起以前嘅傷痛；所以林宛琪認為，張凱婷短期內都唔會做援交。林宛琪喺網上發佈，話Yannes嫁人，唔再做援交喎！但事實係林宛琪判斷錯咗，張凱婷係有繼續接客嘅，只不過佢用新微信賬戶去接客，好多嫖客都知道，令林宛琪遭到一眾嫖客恥笑。
其實張凱婷跟咗林宛琪一段時間，你估張凱婷學唔到嘢咩！而且唔做援交，張凱婷都唔知自己可以做啲乜，所以佢已經下定決心，要做個出色嘅援交妹，超越林宛琪！張凱婷繼續用Yannes個名接客，雖然佢而家冇之前咁風光，但係冇林宛琪想像中咁差，因為點都有啲客鐘意佢，自然會去搵佢如咸濕強。張凱婷亦知道前路難行，佢需要做好多嘢先可以打敗林宛琪，佢唔可以畀以前嘅嘢所拖累，包括俊仔。有一次張凱婷同咸濕強雲收雨散後，問起俊仔近況，並從中得知俊仔工作嘅醫療中心地址；張凱婷於是扚起心肝，決定以身體檢查為名，接觸俊仔。點解張凱婷要接觸俊仔？其實都係想賺俊仔嘅錢啫！相比其他客，俊仔比較容易控制，因為佢比較怕羞，唔會亂嚟。張凱婷心諗，如果俊仔呢類人成為佢嘅熟客，賺錢都賺得舒服啲之餘，相信林宛琪發夢都估唔到，到時呢條死淫婦一定激到紮紮跳！
講就容易，行動永遠最難，張凱婷最終冇搵到俊仔。雖然張凱婷真係想鼓起勇氣搵俊仔，但每次再諗多佢一陣，張凱婷都會感到心痛。張凱婷好唔明，點解過咗咁耐，痛楚仲未完全消失呢？其實點止張凱婷一個人痛，俊仔亦一齊痛，痛到性慾都減低，連飛機都唔想打。每次想打飛機，俊仔都會諗起張凱婷，往事再次浮現，咁不如唔好打！
俊仔冇打飛機，同房嘅林宛琪留意到，而且都覺得奇怪。有一日，咸濕強幫襯林宛琪，林宛琪問佢同俊仔啲嘢，咸濕強話唔覺俊仔有咩唔妥，不過佢話張凱婷唔妥多啲；林宛琪問點解，咸濕強話張凱婷好似想搵俊仔咁；林宛琪再問點解張凱婷想搵俊仔，咸濕強諗咗一陣，就話張凱婷可能想做俊仔生意，並解釋佢之所以咁講，係因為張凱婷唔鐘意佢呢啲又猴擒又粗魯嘅人；而俊仔啱啱調返轉，又溫柔又怕羞，完全符合張凱婷口味！咸濕強仲話，如果佢係張凱婷，一定捉住俊仔唔放啦！
聽完咸濕強咁講，林宛琪都肯定俊仔同張凱婷有來往。對於自己細佬畀人當水魚，林宛琪當然唔忿氣。林宛琪諗住幫俊仔，但又唔知點幫好，同俊仔直接講又好似唔係太好，於是林宛琪決定同Carrie講，睇吓佢有冇咩辦法對付張凱婷。Carrie反對林宛琪對付張凱婷，始終佢兩個都係啱啱反面，驚林宛琪好快會後悔，反而覺得點樣從張凱婷手中搶回俊仔先係重要。
「做鴨？」林宛琪都估唔到自己會咁諗。如果俊仔做埋囝囝，可以畀俊仔發洩性慾之餘，自己亦可以賺多筆，於是林宛琪遊說俊仔。起初，俊仔唔敢相信林宛琪所講，佢家姐做援交已經畀佢好大震撼，而家叫埋佢做援交？冇乜可能啦，連叫雞都係叫得嗰一次，仲要過程唔成功添！雖然打飛機就打得多，但係俊仔床上經驗真係唔多，邊有條件做援交呢？
對於俊仔嘅睇法，林宛琪唔係咁睇。林宛琪認為，床上技巧可以訓練，而且俊仔身材同外貌都唔差，按道理俊仔有佢嘅市場價值。林宛琪知道俊仔耳仔軟，成日猶疑不決，於是幫俊仔諗埋佢擔心嘅地方，並逐一解答所有疑難。林宛琪嘅說話，俊仔冇反駁能力，亦唔知點答好，俊仔竟然有啲動搖⋯⋯但係佢又明白，如果畀佢媽咪孫雪娥知道，可能會搞出人命⋯⋯
俊仔同好多男人一樣，表面斯斯文文，彬彬有禮，但實質同咸濕強一樣，色迷心竅，呢頭話性慾少咗，過咗一陣畀林宛琪提吓，性慾又慢慢返嚟。俊仔成日諗住佢家姐嘅說話，愈諗愈入迷，佢有時會諗，如果真係做鴨嘅話，會係點呢？諗諗吓，俊仔好興奮，興奮到瞓唔著。觀察入微嘅林宛琪當然估到俊仔動搖緊，於是日日同俊仔講，日日引起俊仔條癮。經過林宛琪不斷嘅努力，佢終於化腐朽為神奇，俊仔終於願意加入其門下，過程幾咁勵志呢！
俊仔同林宛琪已經唔顧世俗嘅眼光豁出去，佢哋覺得，大家你情我願，又做足安全措施，有咩問題呢？至少比睇人哋唔願意流出嘅性愛影片，較有道德（雖然好多人唔係咁諗）。林宛琪同俊仔進行床上實戰訓練，起初佢兩個都有啲唔慣，尤其是俊仔，一度想放棄；但賺錢同咸濕驅使倆人發𡚒圖強，最終喺林宛琪嘅訓練下，俊仔成為一名專業嘅性工作者。
俊仔成為林宛琪其下唯一嘅囝囝，有時啲客想玩「二皇一后」，但又唔好意思問自己老友一唔一齊玩，呢一刻俊仔就大派用場！林宛琪亦諗過搵女人生意，不過佢由細到大都冇乜女性朋友，唔算熟悉女人心理，所以拓展女嫖客方面唔成功。俊仔工作量遠不及其他囡囡，亦因為咁，林宛琪放棄搵其他囝囝加盟嘅念頭。
另外，大家都知林宛琪並非等閒之輩，佢有辦法彌補張凱婷離開帶嚟嘅損失之餘，亦能繼續提升佢嘅援交生意，內容如下：
一﹒營造反差效果。AV帝王村西透曾經講過「營造出反差嘅部分最有色情感」，人之所以對對方著迷，就係對方有意想不到嘅驚喜。林宛琪明白呢一點，所以佢會根據各囡囡性格特徵，從而制定佢哋嘅待客之道。例如Amy性格比較怕羞、聲線細，林宛琪訓練佢未扑嘢前，仍舊保持原有性格，但正式扑嘢後，佢會變得好主動，叫得好大聲；另外有一位囡囡叫Kathy，佢短髮、小麥膚色，性格爽朗亦有啲MK，但喺床上，佢表現得比較被動同好嬌嗲。
另外，林宛琪規定除非客人特別要求，否則唔准著得性感去見客。表面上個囡囡冇乜嘢，但除咗衫發現原來係隱世巨乳、隱世美臀，你話個客興唔興奮呢！
二﹒賣性用品。雖然賣性用品嘅人愈嚟愈多，但針對嫖客咁賣嘅就冇乜。既然連偉哥都賣，點解唔賣埋一啲性用品例如避孕套、性玩具呢？而且唔係個個男人都接受到食偉哥，不如賣埋其他壯陽用品好似瑪卡？除咗賣性玩具，林宛琪亦知道雖然男人用唔著女性性玩具，但有啲男人好鐘意睇住女人玩；呢個時候，林宛琪等一眾囡囡大派用場喇！
三﹒提供處女，增設「處女支援計劃」，即係破處服務。林宛琪透過Carrie，再透過蛇頭，得到一啲大陸處女。所有處女都得到驗證，佢哋都係被人呃、自己或屋企人欠債而賣到香港。由於每個囡囡破處只得一次，機會難得，而且處女數目唔多，所以每次破處服務都可以賣到好貴，令林宛琪賺到笑！
四﹒輸入外國囡囡。既然能夠輸入處女同AV女優，而且香港係世界人口販運中心，輸入外國囡囡有幾難啫！林宛琪都係透過Carrie，再透過蛇頭輸入嘅。呢啲囡囡，由大陸鄉村到泰國山區、東歐到東非、白人到黑人都有；咁做可以擴闊客源，滿足唔同客人嘅口味。
五﹒增設網站。雖然林宛琪一直透過微信及各討論區宣傳，亦增設IG賬戶，但係佢覺得唔可靠。唔少人已經唔上討論區，而且各大討論區唔再容許援交資訊出現；增設唔同嘅社交媒體賬戶，好似能夠增加客源，但係社交媒體好難宣傳得好白，就算而家可以，將來都未必得。林宛琪心諗，討論區又好社交媒體又好，唔到佢控制、唔可靠；於是林宛琪增設網站，多一個渠道宣傳自己嘅援交生意，同時可以整合一吓佢所有嘅援交資訊，包括過往寫過嘅文章、各囡囡資料及檔期、最新消息等。網站出現，大大方便客人接收援交資訊，所有資訊一目了然，而且網站伺服器設於海外，就算差佬想捉佢都奈佢唔何。
另外，網站亦設有英文同簡體中文，方便遊客閱覽。對於遊客、尤其是商務旅客，林宛琪會收貴少少，當作手續費，因為唔係個個囡囡都可以用外語溝通。
六﹒增設員工。林宛琪援交事業愈搞愈大，客人同囡囡又多咗，令到林宛琪忙到甩肺⋯⋯於是林宛琪搵咗同佢相熟兼可靠嘅囡囡，例如Jenny同Tiffany，一得閒就幫佢處理援交嘅後勤、文書之類工作。林宛琪計返時薪畀佢哋，但係一啲敏感嘅工作，包括同Carrie等重要人物溝通，林宛琪點都要親力親為。佢哋嘅辦公地方，就係Carrie長租畀林宛琪嗰間酒店房。
七﹒會員積分優惠。喺網站內，客人可以免費登記成為會員，而且一啲資訊例如最新消息，只有會員先睇到。每位會員可透過購買援交服務或貨品累積積分，基本上幫襯五次性服務，就夠分換避孕套一盒。
不過有樣嘢大家都估唔到嘅，就係憑慈善捐款收據可換積分，一蚊換一分，一個月最多換五百分。林宛琪懷著助人為快樂之本精神，從此嫖妓變得有意義！咁有「善心」嘅女仔，仲要夠豪放、身材好，邊度有呢？
八﹒八折優惠。林宛琪體諒學生嘅經濟負擔，所以客人能夠提供有效嘅全日制學生證，可享八折優惠；同樣，客人能夠證明當日佢生日，亦可享八折優惠；教師節同父親節當日，分別證明到自己係一名教師同父親，都可享八折優惠。不過曾經有客人為咗證明自己係一名父親，攞咗張全家福出嚟，個客突然好內疚，立即畀錢，掂都冇掂過林宛琪，咁就走咗。
另外，每月頭五日都有唔同嘅八折優惠。每月一號係「巨乳日」，幫襯上圍35D或以上嘅囡囡可獲八折；每月二號係「長腿日」，幫襯四十吋或以上長腿嘅囡囡，同樣可獲八折；每月三號係「寂寞人妻之夜」，當晚幫襯人妻如Doris或玩人妻角色扮演，同樣可獲八折。如此類推，每月四號係「秘書訓練日」；每月五號係「學生身體檢查日」。
除咗八折優惠，林宛琪不定期推出各種限時優惠，例如某日朝早預約可享半價，或者會員透過積分可以參加幸運大抽獎，大獎係一次免費性服務，安慰獎都有避孕套一盒（當然，除咗安慰獎外，乜鬼大獎二獎都冇人成功抽中過）。
九﹒性愛教學。林宛琪明白，性經驗少嘅男士有唔少煩惱，佢哋唔少人床上表現笨拙，容易被另一伴嫌棄；就算去叫雞，太快射同軟會覺得嘥錢、唔抵。林宛琪亦明白香港欠缺性教育，好多人連基本性知識都冇，整到佢哋容易出事。林宛琪針對以上問題，增設「Yuki學堂」，共五堂，就客人需要同弱點，進行一對一實戰教學。五堂唔夠，唔緊要，可以繼續加堂。林宛琪絕對以學生為本，因材施教，有教無類，對每個學生都春風化雨，務求每個學生喺床上有所成長，並且「愉快」學習。
另外，如果學員想學「火車便當」等高難度動作嘅話，學費會貴少少。學員畢業後，可獲一次「罰留堂」八折優惠。所謂「罰留堂」，就係林宛琪扮老師，嫖客扮學生，之後⋯⋯你明啦！
雖然林宛琪會為顧客設想，為客人提供夢寐以求嘅服務，但係林宛琪都有佢自己嘅堅持，例如唔准拍片、唔玩屎尿、SM等變態嘢，而且只可以喺酒店房進行性交易，唔接受其他地方，同埋一定要戴套。雖然以上做法的確趕走部分客人，但充其量都係非常少數。始終，大部分客人都唔接受呢啲嘢，林宛琪咁樣講到明，反而提升客人對佢嘅形象，同時保障咗佢同佢其下囡囡嘅安全，一舉兩得。
林宛琪再次整理佢嘅援交經濟學，令到佢嘅援交生意早已脫離張凱婷嘅陰霾，而且蒸蒸日上，生意不斷再闖高峰！後嚟有一對仍然未破處嘅孖生姊妹——Peggy同Pinky嘅加盟，佢兩個破處計劃一出，震撼所有嫖客，因為今次一破就破兩個，而且仲要係孖生姊妹，大家爭住幫襯，林宛琪要好似拍賣咁，以價高者得方式賣出佢哋嘅初夜！最後由一位年近六十、身形同外貌似足林雪嘅大叔奪得。不過自從嗰次後，呢位大叔冇再幫襯，聽聞佢嗰次興奮過度，念念不忘，幾日後就歸天了！
Peggy同Pinky破咗處後，依舊大受歡迎，呢對孖生姊妹外貌上極為相似，性格就完全相反。家姐Peggy熱情奔放，為人爽朗；阿妹Pinky文靜內向兼溫柔。佢哋喺床上充滿默契，家姐叫床聲大，床上表現主動，會直接騎上客人玩女上位；阿妹比較怕羞，當佢家姐騎咗上去時，佢會伸佢條脷小小，輕輕咁舐客人乳頭，期間嗯嗯聲軟，嬌聲不絕。Peggy同Pinky喺床上嘅默契，唔使客人提示下，會自動互摸互奶兼「磨豆腐」。對於呢兩姊妹嘅默契，連林宛琪都感到驚訝，唔使點教佢哋就做得好好，並成為林宛琪嘅最大皇牌。
自此，林宛琪援交事業達到顛峰，喺援交界已無競爭對手，自然唔會放張凱婷於眼內。林宛琪同張凱婷嘅關係，跟張凱婷同俊仔關係唔同，雖然係有啲尷尬，但係佢兩個唔想喺對方面前淆底，所以佢哋唔會刻意避開對方，就算撞到都要扮到好有自信、好有精神咁扮唔識。不過林宛琪知道，佢唔會再喺屋企附近撞到張凱婷，因為佢已經買樓置業！雖然買樓上Carrie有財政上嘅少少幫助（Carrie老公睇實條數，佢已經盡幫喇），但係做援交做到去買樓，絕對稱得上神奇，至少近二十年都冇人做到，仲要買地鐵站上蓋，真係唔簡單！
林宛琪置業後，帶埋俊仔一齊住，佢哋終於各自有自己嘅房間。一男一女共處一室，俊仔好容易有損失，雖然林宛琪有時會帶Carrie上佢新居玩，發出淫聲畀俊仔聽到，林宛琪亦諗過叫埋俊仔一齊玩；不過援交工作以外嘅俊仔，會變得「正常少少」，至少唔會接受同林宛琪嘅亂倫關係，最多自己匿埋打個飛機算。
至於孫雪娥，林宛琪畀多啲家用佢，佢就收聲。其實孫雪娥仲以為林宛琪喺成衣公司工作，對於佢個死女包嘅工作，孫雪娥從不過問，亦冇乜興趣知道，佢只係關心林宛琪畀嘅家用。當然孫雪娥絕對冇諗過，佢個衰女包會係援交界風雲人物。
張凱婷有諗過同孫雪娥講，講佢個女做援交嘅；不過冇證冇據，講乜都冇用，佢亦知道林宛琪風光過以前，佢好唔甘心。張凱婷覺得自從識咗林宛琪後，就好似畀佢食住咁，自己未試過真真正正嘅發圍。對於呢方面，張凱婷愈諗愈嬲，佢覺得如果要發圍，就必須要鏟除林宛琪；於是，張凱婷不斷搜集林宛琪資料，以便攻擊佢。
攻擊林宛琪其中一個方法，就係搵返俊仔。張凱婷再次鼓起勇氣，透過咸濕強聯絡，但係咸濕強話俊仔唔會再幫襯援交；張凱婷亦試過到俊仔屋企附近搵佢，但係去到俊仔愈叫愈走，扮晒唔識張凱婷。當日俊仔一抽二掕將啲嘢搬上貨車，好似搬屋咁；張凱婷後嚟先知，原來俊仔搬去同林宛琪同居。
係妒忌定自作多情？張凱婷唔知道。俊仔嘅無情，加上佢同林宛琪嘅關係，令張凱婷報復心更重。張凱婷假假哋都做過偵探社兼職，佢諗住用佢嘅偵探技術，去得到林宛琪做援交嘅證據，但真係落手嗰陣，又唔知點搞好；張凱婷都有諗過搵Mandy或咸濕強幫手，但又唔知佢哋可以幫到啲乜。講真，除非有性愛影片，否則只有出入酒店嘅相，點證明林宛琪呢條死淫婦做援交啫！
每次交易後，張凱婷嘗試問嫖客，問佢哋有冇幫襯過林宛琪Yuki，以作資料搜集。其中一個三十歲嘅嫖客話幫襯過林宛琪，並喺網上發現佢同客人扑嘢嘅片段，片中仲有一個男仔係佢囝囝，一齊3P。張凱婷立即搵嚟睇，發然果然係真！而嗰個男仔，竟然係俊仔！雖然張凱婷早就得知，林宛琪其下有一個囝囝，但係佢冇諗到呢個囝囝就係俊仔。呢段影片流量唔高，但至少清晰見到林宛琪嗰衰樣，仲要標題寫住援交流出，今次仲唔發達！
其實林宛琪好注重安全，佢規定佢嘅囡囡電話要貼上防窺保護貼，以保障安全，但係佢竟然忽略咗防偷拍問題。張凱婷將影片下載，並燒成光碟，連同其他資料例如網站、相片等證據，一併寄到孫雪娥屋企。孫雪娥收到有關資料後，晴天霹靂，心跳不斷加速無法慢落嚟。孫雪娥立即打電話畀林宛琪，叫林宛琪同俊仔立即返嚟！不過聽語氣都知大事不妙，林宛琪為保俊仔安全，冇通知佢，自己一個返去見佢老母，睇吓發生咩事。
「兩姐弟，一個做雞，一個做鴨，你叫我點見人啊！」孫雪娥將張凱婷寄嚟嘅嘢攤喺林宛琪面前，林宛琪冇得抵賴。
「雞鴨鵝咪啱啱好囉，鵝姐！」林宛琪衝口而出，其實佢個心有小小怯。點知孫雪娥聽到呢句後，突然心臟病發，於港共二十二年、即公元二零一八年過身，終年五十九歲。
畢竟未知後來如何，且聽下回分解。