援交學入門: 第二回﹒十三年，距離解放的年數
「我做錯咗⋯⋯全世界好多男人都做錯咗嘅嘢。」成蟲
話說當年香港政府實行抵疊政策，中國大陸偷渡者只要到達界限街以南嘅香港市區，就可以獲得香港居民身份，所以孫小娥同佢老豆必須去到香港市區先叫安全；如果佢哋停留喺新界，有機會畀警察遣反返大陸，到時下場唔止坐監咁簡單⋯⋯
孫小娥同佢老豆喺新界左閃右避，並得到好心村民幫助，向佢哋提供食物同衫，甚至畀埋架單車佢哋去踩，踩去市區，咁佢哋終於嚟到香港市區，可以喺香港落地生根。不過鄉音難改，孫小娥喺入境處登記個人資料時，將「小」讀得好似「雪」字，入境處職員幫佢填個人資料，將「孫小娥」寫成「孫雪娥」。孫小娥同佢老豆都覺得，個雪字幾好聽，而且可以代表佢喺香港嘅新身份，於是將錯就錯，孫小娥從此改名為「孫雪娥」！
孫雪娥同佢老豆投靠佢阿叔到，佢阿叔喺街市賣鵝，孫雪娥同佢老豆幫佢手。不過好景不常，孫雪娥老豆於港英一百四十一年、亦即公元一九八二年過身，終年五十歲，死於神秘病毒。所謂神秘病毒，有一說法係愛滋。根據官方資料顯示，香港首宗愛滋病感染案例係港英一百四十三年，即公元一九八四年，喺之前並無相關記錄。應該話當時醫護界對愛滋仍然陌生，就算有人真係感染愛滋，醫生都未必知個病人感染啲咩，只能話係神秘病毒；所以，孫雪娥老豆可能係香港第一個感染愛滋而死嘅人！
冇計，落到香港後，孫雪娥老豆被街上嘅五光十色吸引。講緊嘅五光十色，當然係各種色情場所嘅招牌光管，乜鬼桑拿夜總會指壓一樓一魚蛋妹，咁鬼多色場架步，喺大陸邊有啊？就算有得叫雞啊，被人拉咗都好大鑊啦，除非你係幹部啫！香港就好唔同，只要面皮厚，做淫蟲又點？起碼唔會好似大陸咁，被人批鬥同打壓先。呢啲同大陸完全唔同嘅情況，簡直令孫雪娥老豆大開眼界，日日享用唔同嘅性服務，盡情享受溫柔鄉！
其實，孫雪娥老豆係老實人，喺惠東嗰時，大家都覺得佢係好男人、正人君子，邊會估到佢落咗香港後，變咗條死淫蟲呢！不過要講返句公道說話，喺鄉下個個女人都係養豬耕田，冇臭味先怪，尤其是佢嘅死人老婆，肥屍大隻又冇晒感情，孫雪娥老豆點會有心情同佢扑嘢啊！落到香港，佢只不過將多年嘅抑壓發泄出嚟，令到佢喺香港夜夜笙歌，成為砵蘭街名人，警察掃黃時不時遇到佢，黑白兩道對佢嘅咸濕成性，都寫個服字！
要數到孫雪娥老豆最鐘意嘅，都係私鐘妹。雖然私鐘妹價錢較貴，孫雪娥老豆幫襯得唔算多，但係私鐘妹勝在年輕，比佢個女仲年輕，而且畀人多一種女朋友、偷食嘅感覺。對孫雪娥老豆嚟講，幫襯私鐘妹似偷食自己幻想出嚟嘅孫女咁，夠晒刺激，刺激到患病身亡，有詩為證：
色字頭上一把刀，石榴裙下命難留！
老豆嘅死，孫雪娥大受打擊，成日斬鵝斬到喊，斬到好似自己個心臟都有事。當時鵝檔有個熟客，叫林華新，佢同孫雪娥同年，係一個文員仔，經常買鵝畀阿媽食。林華新見孫雪娥悶悶不樂咁款，於是上前安慰佢，安安慰吓，安出愛火花，倆人迅速戀上，並於港英一百四十三年、即公元一九八四年正式結婚。
結婚當日，林華新完全唔開心，係唔係暗示佢娶錯老婆？筆者唔係咁嘅意思，只不過係當日出現股災，林華新損失慘重⋯⋯
孫雪娥結婚，作為佢阿叔，本應高興，但係當日發生一啲政治事件，令孫雪娥阿叔感到不安。呢件政治事件，使得孫雪娥阿叔諗起當年喺大陸嘅痛苦經歷；就正正呢啲經歷，迫使孫雪娥阿叔冒住生命危險，點都要逃到香港。孫雪娥阿叔嚟到香港後，身無分文，但憑住自己嘅努力，打出一片天地。雖然孫雪娥阿叔稱不上富有，但至少衣食無憂，有自己嘅小生意，養活埋孫雪娥同佢老豆都不成問題。而家話十幾年後主權移交，話咩五十年不變，以孫雪娥阿叔喺大陸嘅生活經驗，中國共產黨講咩都唔可以信，信親都好大鑊，於是佢下定心移民。
孫雪娥阿叔無兒無女，單身寡佬，佢當孫雪娥係自己個女看待。孫雪娥阿叔本來打算帶埋孫雪娥同林華新一齊移民英國，林華新基本上都想移民，但係孫雪娥唔想。一來孫雪娥老豆死咗冇幾耐，老母亦葬喺大陸，突然移居到地球另一邊，心裡實在難受；二來佢而家先慢慢適應到香港嘅生活，啱啱先覺得自己係一個香港人，要佢去一個完全陌生嘅地方生活，仲要佢一句英文都唔識，去嚟托咩！以上原因，令到孫雪娥堅拒移民，而林華新只好婦唱夫隨，放棄移民念頭。孫雪娥阿叔只好自己一個移民，臨走前將街市間鵝檔轉讓畀孫雪娥，後來孫雪娥成為咗瑞和街街市大名鼎鼎嘅鵝姐！
講返孫雪娥夫妻嘅生活，自從被謝希大飛咗後，孫雪娥再冇同其他男人上床。相隔多年，佢終於有機會同男人享受魚水之歡啊！而嗰個男人，當然係佢老公林華新啦！其實林華新未同孫雪娥一齊之前，係個青頭仔，佢嘅第一次就係畀咗孫雪娥。話說新婚呢段期間，林華新喺床上表現笨拙，唔係未插先軟，就係一插就軟。後來好少少，插到幾吓，但好快射，往往未能滿足孫雪娥嘅性需要。為咗提升佢老公嘅硬度，孫雪娥不斷提升佢嘅叫床聲量，佢彷彿要將當年同謝希大搞嘢時嘅抑壓盡情發洩，或者佢根本唔記得咗自己身處香港公屋，而唔係惠東嘅農村地方。公屋家家戶戶住得近，而且唔少住戶唔閂門唔閂窗，鄰居偶爾會聽到孫雪娥嘅淫叫；不過基於尷尬，大家唔會走去同孫雪娥講。
經過多年努力，孫雪娥成功懷孕，並於港英一百四十五年、即公元一九八六年產下一名女兒，名叫林宛琪，花名牛丸。
畢竟未知後來如何，且聽下回分解。