末日生存日記: 第二章 災難

第二日訓醒，我內心越黎越唔平靜，好似呢個世界真係發生咗啲大件事。
「喂，你地幾條友，一個二個訓到成只死豬咁款，我覺得好似有啲唔妥。」我狂咁搖醒安仔佢地。
「我士多啤梨蘋果橙你啦，晨早流流係到發夢」
「唔係呢，我講真，我覺得呢幾日好唔尋常。你地手機係咪冇曬訊號，平時呢到唔會咁。同埋你地有冇發現，呢兩日我地都冇見到有人，平時放假一定唔會冇人，周街都係啲情侶或者成屋人出黎。」我越講越覺得件事唔對路。
「你咁樣講，好似又係人影都冇只喎，我地都係快啲落去睇下乜情况啦。」不愧係阿澤，幾個入面第一个清醒嘅人。
「真係麻鬼煩，個個都疑神疑鬼架。」安仔坐咗起身。
不過都係有一個人，叫極都唔醒。
「陳 鑫！！快啲起身啊，有大單野發生啊！」我狂咁大嗌。
「大佬，有乜事大單過訓覺姐。」鑫仔連眼都冇撐開過，迷迷糊糊咁樣講。
「屌你呀，真係可能有事發生啊！喳喳林落去啦。」其實呢，我平時係唔多講粗口嘅，不過鑫仔真係拖拉得濟，一時忍唔住。




「得啦得啦，我起身。」鑫仔終於意識到可能真係有問題，如果唔係我唔會咁激動。
一落到去，同山上面一樣，人影都冇隻。
「哇屌，有冇可能呀，咁橋大個地方一個人都冇？」安仔忍唔住講出咗我地每個人心入面嘅疑惑。
「冷靜啲先，我地先去一個地方穩定落黎先，之後再睇下發生咩事」啊澤提出嘅辦法，我地每個人都同意。
「去我屋企啦，我屋企黎呢到最近。」我屋企離呢到得大概十分鐘嘅路程，之前我都黎過呢座山好多次，都算熟悉路線。
一路上面，亦都冇見過一個人，好似個世界都停住咗時間，得返我地幾個人生存緊。
去到屋企樓下，平時一直坐係門口嘅看更啊叔都唔見咗人，電梯停運，好彩我屋企都唔高，住係四樓，如果唔係真係要行死人。
返到屋企，所有嘅設施物件都原封不動，唔似有發生咩事。
阿爸阿媽平時呢個時間應該返緊工，但係我心入面都係放心唔落，決定打個電話比佢地。
「你地各自都打一打電話比屋企人，睇下佢地有冇事。」




我叫埋安仔佢地都打電話，第一我估佢地都會擔心屋企人嘅安危，等佢地去報一下平安；第二就係我地上山上咗兩日，發生咗咩事都唔知，我地需要一啲知情人士講比我地聽究竟發生咗咩事。
「嘟嘟嘟—你撥打的電話暫時沒有人接聽，請遲啲再打過啦。」我阿媽同我阿爸一樣，都係冇聽電話。
「喂你地果邊咩情況，我呢到冇人聽電話。」
「我都係呀，嘩究竟發生啲咩，我屋企人會唔會有事。」阿朗不嬲都好關心自己屋企人。
「我細妹，佢都冇聽。如果比我知究竟邊條仆街搞到我細妹唔聽電話，我實揪佢出黎打鑊金！」安仔，名副其實嘅妹控。
「媽咪呀！你去咗邊呀！！」鑫仔直情喊咗出黎。
「各位冷靜少少先，我啱啱發現咗宜家好似有網可以用，不過慢到嘔。我去開啲新聞睇下，我地等陣先。」話即，啊澤拎出部手機，擺喺中間。
個網真係好L慢，等咗幾分鐘先至load到。
「香港末日發生，各區驚現喪屍，區內人心惶惶，已有不少地方徹底淪陷？」
呢個post上面仲要附上咗幾張現場直拍，相入面周圍都係已經破碎咗嘅房瓦同玻璃玻璃碎片，有一隻血肉模糊嘅人半跪喺地上面，唔係，如果有睇開電影嘅人就知呢個係咩，根本同電影入面嘅喪屍一模一樣！底下仲有唔少網民聲稱有見過同求救。




「咁戲劇性？係咪有人玩惡作劇呀，呢個電影情節黎架喎。」我心入面已經有真係世界末日嘅覺悟，不過都係唔相信件事，求其搵嘅藉口厄自己。
「我…以我多年嘅IT經驗……呢張圖絕對唔係p出黎嘅，係確確實實有人影出黎..」
唔通真係要世界末日？好荒謬…