末日生存日記: 第一章 不太平常的平常？

「滴滴滴」我一手㩒熄個鬧鐘，「唉，日日都係比個鬧鐘嘈醒，一早心情就唔多靚」。
大家好，我叫做許日宇，個樣呢，有少少靚仔啦，平時都比成堆女追，應該都算叫做下校草掛？」
刷好牙，求求其其食個阿媽牌煎蛋加麵包，就要搭車返學。
「其實真係唔知係咪人靚得濟，一出到街啲女個個係咁望實我，真係不認靚都唔得啦。最衰都係我阿媽，將我生得咁靚仔，又咁鬼死大只，身高閒閒地都有個186啦，魅力呢家野呢，唔知係福係禍。」
返到班房，又要對住個班主任黑口黑面，聽住啲老師廢up，日復一日，真係好鬼悶。
雖然話就話係4A班姐，睇落好似好威好勁咁款，不過等到你入咗黎呢班，先知個個為咗成績係到勾心鬥角，真係唔知為乜。
「喂阿宇，唔好唔記得今日放學之後我地要同安仔佢地上山去cam呀。」呢個係我老死—阿朗，同我同班，係我最好嘅兄弟之一，係呢個咁嘅時勢，有幾個真心嘅兄弟真係唔多架啦。
「叮噹 叮噹」發咗成日夢，終於夠鐘放學。
「咁耐架你地，我同啊澤佢地等咗你地好耐。」呢個又係我其中一個老死—安仔。
「得啦得啦，咪講咁多啦，我地出發！」




買完需要嘅食物野飲同帳篷，我地即刻動身上山。
我地幾個差唔多都係運動健將，上山呢樣野都唔使用幾多力，so easy啦。
「等下我啊你地班死仔，有冇搞錯呀明知我運動唔得架啦係都要拉我過來上山，好Q攰呀！」呢個係鑫仔，宅男一個，今次出都係比我地硬扯過黎。
「叫你平時運動多啲架啦，係都唔聽講。」
上到山已經六七點，我地幾條麻甩佬係咁玩玩食食，好快就已經去到深夜，玩到最尾，個個訓曬，包括我啦，無一例外。
 第二日，個個訓到晏晝十二點幾，訓醒是是但但洗個面，唔使返學，正！
又係咁樣玩咗一日。去到夜晚，男人的浪漫係咩？梗係同班巴打一齊飲酒啦！
飲到最尾，一個二個已經冧曬，冇一個飲得嘅。
我醉醺醺咁望住個天，真係好靚，每一粒星星好似有生命咁樣，滿天嘅繁星喺夜空中格外顯眼，就算喺月亮嘅身邊亦都毫不遜色，互相映照，令我睇到入曬迷。
啱啱想攞出部手機影低呢個風景post上ig，先發現手機冇網絡。




「冇訊號？有冇可能呀，之前我黎呢到都唔會冇網架喎。可能今日訊號唔多掂，聽日應該ok返。」
突然之間，我嘅心入面感覺到有一陣不祥嘅預感，心臟突然跳得好快，好似發生咗咩大件事咁款。
我突然醒起一樣野，明明平時呢座山都有唔少人係到開camping架，點解宜家一個人都冇，仲要咁靜嘅？
我認唔住去揣測究竟發生咗咩事，不過諗到最尾，都覺得冇可能發生啲咩，可能係酒飲多咗，個人都腎腎地亂諗野。
唔理咁多，訓覺。
現時現刻嘅我一定估唔到，之後發生嘅事比我想像中嚴重百倍千倍。