穿越時空，冒充平行世界嘅另一個自己，再去呃佢條女上床: （122）

「Wow dude！ Your costume is awesome！」

一個油紫塊面，笠住雞嘴嘅男人好興奮行到佢面前。

帝洛斯覺得奇怪，心諗呢個人類做乜打扮成咁嘅樣。

呢個男人其實係一個遊戲攤檔嘅職員，佢帶帝洛斯試玩佢地隻game。

Battle of Aliens。





呢隻就係美國鷹提過嘅嗰款外星人格鬥game，今年重製並重新推出市面。

帝洛斯喺部大電視見到自己，覺得好神奇，第二點神奇嘅係，除左佢之外，仲有其他外星人。

佢揸住個手掣，居然可以控制返自己，呢個係第三樣令佢覺得神奇嘅嘢。

「Can...Can I touch your hand？」

坐喺隔籬準備同佢挑機嘅細路，見到帝洛斯「cosplay」得咁像真，想掂一下。





帝洛斯即刻投向一個凌厲嘅眼神，嚇到個細路縮開手。

「Game Start！」

遊戲開始，帝洛斯操控返自己，個細路就用魔迪加。

雖然帝洛斯係第一次玩，但莫名地好快上手。

玩左一陣就㩒熟左啲掣，而且第一鋪就贏左個細路。





佢覺得都幾過癮，決定留喺度玩多幾鋪。

個細路輸左兩鋪,覺得無癮就走左，之後阿榮經過，俾帝洛斯嘅造型吸引而行埋嚟。

「Hey man，you are the best cosplayer I even seen！」

帝洛斯就問：「你玩唔玩？」

「得呀，玩咪玩！」阿榮拎起手掣，同對方挑機。

帝洛斯都係揀返自己，阿榮就揀左造型普普通通、體型細細粒嘅機械人。

「嗯？竟然揀呢隻？」

「我用呢隻好勁架，睇住嚟。」阿榮就返對方講中文。





帝洛斯已經識得chok啲大技出嚟，佢控制住「自己」揸住邪合劍埋身放技。

點不知，一靠近個機械人，「自己」就唔郁得，仲俾機械人彈走。

然後畫面上方，跌左三樣道具落嚟，有斧頭、弓箭同手槍。

阿榮控制住嘅機械人，噴出泡泡，將三個樣道具融合成一把武器，再瘋狂攻擊「帝洛斯」。

「K.O.」

就係咁，帝洛斯俾阿榮打敗左 。

「話左架啦，呢個角色我玩到好熟架。」





「再嚟！」帝洛斯唔忿氣。

佢地接住再玩多一鋪。

「我以前成日同我個best friend玩呢隻game，本來今日我地應該一齊嚟呢個festival，不過早排俾我發現左，原來佢一直背住我搞我老婆。」阿榮一邊玩，一邊同帝洛斯吐心事。

帝洛斯無理佢，一心只想打贏對方。

「後尾佢有主動同我道歉，佢知自己做錯左，覺得好對唔住我呢個朋友，咁你話我應唔應該原諒佢好？」

「咪嘈啦！」帝洛斯好不耐煩。

「K.O.」

結果阿榮一邊講一邊玩，都照樣打贏帝洛斯。





「好啦，我唔玩啦。」阿榮放低手掣。

「可惡！！！」帝洛斯捏爆個手掣，面目變得猙獰。

喺佢世界並唔容許「輸」呢一個字，更加接受唔到自己輸俾一個地球人。

「打輸一鋪機啫，洗唔洗…」

帝洛斯叉住阿榮條頸，眼神透露殺氣：「我唔准你講個『輸』字！」

「輸左鋪機有咩咁大件事！You’ re just crazy！Get off me！」

「我都話左！我唔要聽到個『輸』字！！！」帝洛斯暴怒，一拳打穿阿榮個肚。





阿榮吐出鮮血，當場斷氣身亡。

周圍其他人嚇得大聲尖叫。

帝洛斯大開殺戒，發洩心中憤怒。

一班時空使者知道出左事，已經用最快速度趕嚟捉拿帝洛斯，可惜都係遲左。

本來歡樂嘅遊戲動漫嘉年華，一瞬間變成屠殺場。