穿越時空，冒充平行世界嘅另一個自己，再去呃佢條女上床: （121）

※ ※ ※



喺好耐之前，時空裂縫係直接連接住兩個唔同嘅平行時空。

只要唔小心誤入時空裂縫，咁從此就會迷失喺另一個時空。

為左解決呢個現象，時空使者特意設置左時空中轉站，幫嗰啲迷途羔羊轉移返去原本嘅時空。





中轉站嘅佈置好簡單，只有四面純白色嘅墻，兩個著黑衫嘅時空使者，一個櫃檯。

仲有一部外表好似升降機嘅時光機。

呢日， 一男一女嘅時空使者收到上頭通知，話時空守序者33568，亦即係子瑜，已經好耐無返去報道，有曠工之嫌。

上頭想二人幫手用時空電腦，搜索一下子瑜走左去邊。

就喺呢個時候，時空中轉站嚟左一位不速之客。





一隻人形嘅獨角獸，帝洛斯。

佢一時好奇之下，穿過停機坪上空嘅時空裂縫，嚟到左呢度。

見到唔尋常嘅來訪者，櫃檯兩個時空使者都打醒警覺。

「喂，呢度係邊度嚟架？」帝洛斯行到櫃檯前問。

依家嘅佢嗰件盔甲恢復完整，啲傷口全部好返曬，因為佢吸收返由身體分裂出嚟嘅矮仔外星人，以此治愈身上嘅傷。





「我地呢度係時空中轉站，睇嚟你唔小心進入左時空裂縫。」櫃檯前嘅男仔回答。

「時空中轉站？即係咩？」帝洛斯繼續問。

「簡單嚟講，呢個世界好多個平行時空，有時有啲人唔小心，行錯去唔屬於佢嘅時空，咁我地呢度就會帶佢地返去。」個男仔解釋。

至於櫃檯嘅女仔就拎起讀碼器，想嘟一嘟帝洛斯基額頭，以辨識對方所屬嘅時空。

帝洛斯以為個女仔想攻擊自己，神經反射式作出防禦，隻手好似菜刀一樣插穿女仔條頸。

個男仔嚇到成個人彈起，並即刻掹槍自衛。

「砰！」

支槍係激光追擊槍，威力都有返咁上下。





可惜對於帝洛斯而言，呢啲咁嘅攻擊等同搲痕。

個男仔見自己嘅攻擊起唔到咩作用，於是啟動中轉站嘅防禦系統。

隨即，警報響起，天花板嘅重力裝置開啟，限制帝洛斯嘅移動。

另外，左右兩面牆原來收埋左兩碌電磁炮，瞄準之後，一左一右開火夾擊敵人。

「哈！你唔係以為搞啲咁嘅花臣，就對付到我下話？」

帝洛斯輕蔑一笑，發一發條尾就打爆兩碌炮。

跟住佢伸個懶腰，輕鬆突破重力限制，再飛身一下將個男仔，成個頭批左落嚟。





過程中，鮮血濺到佢隻手。

「頂，整污糟曬。」佢hi一hi櫃檯邊，hi走啲血。

之後，佢望下部電腦，發覺無乜嘢好睇，最後行埋去部時光機度。

入到去，時光機即時就出現語音提示：「請閣下輸入想前往嘅平行時空。」

喺右手邊有塊panel，上面有個虛擬鍵盤可以輸入數字同英文。

「頭先條友呢個世界有好多個平行時空，即管就睇下咩料。」帝洛斯隨手㩒幾下個panel。

A、L、7、9。

下一秒，時光機合埋道門，同時喺帝洛斯頭頂，出現左一道強大嘅吸力。





佢都未反應過嚟，眨下眼轉移左去AL-79呢個時空。

呢一個亦都係美國鷹所屬嘅時空。

時空轉移成功，帝洛斯現正身處於一個遊戲動漫嘉年華。

呢度有各式各樣嘅攤檔，販賣模型公仔以及遊戲試玩等等，而且好多人cosplay唔同嘅遊戲或動漫人物。

帝洛斯一身原汁原味嘅造型，可以話完美融入其中。