穿越時空，冒充平行世界嘅另一個自己，再去呃佢條女上床: （123）

※ ※ ※



子瑜同Mike等人，知道左帝洛斯去左其他時空搗亂。

不過未理解到為何會發生件咁嘅事。

返去避難營後，佢地嘗試分析返成件事。





「係我地…係我地令到帝洛斯，穿越左去第二個時空。」子瑜得出一個咁嘅結論。

「點解咁講？」Mike唔明白。

「Mike，你記唔記得，我曾經同你講過，當出現一股足以令時空扭曲嘅力量，咁就有可能產生出時空裂縫。」

「Er…好似有少少印象。」

「無估錯嘅話，我地見到嘅嗰道時空裂縫，就係因帝洛斯同魔迪加大戰所造成，佢地嘅力量一定強大到扭曲左時空。」子瑜解釋。





「咁都係嗰兩隻外星人搞出嚟，唔關我地事架。」阿鬼就話。

「你地再諗真啲，嗰一日有外星人嚟揾魔迪加尋仇，當時嘅魔迪加無任何還擊之力，正常情況下，佢一定會被仇家消滅，但最後我地救左佢，令佢得到重新甦醒嘅機會。」

「我諗我明你意思，如果當日Mike無出手救到魔迪加，咁佢就唔會順利甦醒，佢無甦醒就唔會揾帝洛斯開戰，就唔會出現時空裂縫。」張醫生順住子瑜嘅邏輯推敲。

「係，無錯，阿頭佢話得我啱，係我破壞左時空嘅秩序。」

「當時出手嘅係我，都唔關你事。」Mike對子瑜講。





「如果唔係我叫你信魔迪加、叫你去救佢，咁你都未必會出手。正常情況下，係唔應該隨意插手另一個時空所發生嘅事，而我身為時空使者，居然無意識到呢一點，所以都係我嘅失責。」子瑜將責任攬上身。

所謂「牽一髮而動全身」，呢個世界所有發生嘅事都係互相扣連。

當初子瑜擔心，佢地繼續留喺呢一個唔屬於佢地嘅時空，會影響到時空嘅秩序，結果真係噩夢成真。

令佢內疚嘅係，自己不但無阻止到呢一切嘅發生，仲間接造成左件事。

然而，呢刻心情低落嘅不單止子瑜一個，美國鷹亦都成個人頹曬。

最好嘅朋友死左，佢心情難以平復。

阿榮同佢由細玩到大，係佢自己衰賤格搞人老婆，破壞左一段咁珍貴嘅友誼。

其實佢已經知錯，曾經試過同對方認衰仔，甚至叩頭認錯，可惜對方唔係好理佢。





本身佢諗住返去本來嘅時空後，將自己喺呢度遇到外星人嘅經歷，親口講一次俾阿榮聽，希望對方會理返自己。

可惜，佢已經再無呢個機會。

「Fuck！Fuck！Fuck！」美國鷹爆粗發洩。

三個Mike離開間房，由對方一個人沉澱下。

出到門外，阿鬼同張醫生一齊行落去樓下。

阿鬼feel到隻手臂好似鬆左，想揾人維修下，張醫生就去醫療區幫下手。

Mike就選擇去開解一下內疚緊嘅子瑜。





「無嘢呀嘛，你仲自責緊呀？」

「都係因為我...因為我嘅失責...先害左好多人...」子瑜坐喺床邊，托腮歎氣。

「其實唔關你事，要追究嘅話，所有嘢都係因我而起，係我拎左你部時光機穿越左嚟呢度，仲俾外星人整爛左部機，搞到我同你困左喺呢度，之後先發生一連串嘅事。」

Mike繼續講：「假如一開始我無穿越嚟呢度，咁就咩事都唔會發生，我先係嗰個始作俑者。」

子瑜知道對方想減輕自己嘅內疚感。

「所以你唔好再自責啦，我地依家應該諗下辦法點樣補救。」

「呢層我都知，不過無論係離開呢度又好，去幫手捉返帝洛斯又好，我地點都要先經過嗰道時空裂縫。」

「嗯，咁我地聽日訓醒就過海。」Mike講完又問，「話時話，我部iPod呢？」





「喺呢度，你想攞返走呀？」子瑜喺枕頭底拎出嗰部iPod。

「入面有個playlist，每當心情唔好或者有煩惱嗰陣，我都會開嚟聽。」

Mike打開佢嘅playlist：「你聽一聽，或者會令你暫時忘記嗰啲，唔開心嘅事。」

子瑜帶上耳機，眼甘甘咁望住Mike，腦入面突然諗起阿蚊佢地講過：一個男人係出於愛，先會分享佢鐘意嘅嘢俾你。

「怦怦！砰砰！」之後佢嘅心跳，不由自主咁加速。

「Sorry Sorry！唔知你兩個喺度拍緊拖，打攪左你地添。」阿蚊無敲門就行入房，見到二人坐得好埋。

「我地…」





阿蚊打斷Mike嘅說話：「得架啦得架啦，你地慢慢二人世界，我同Vincy、Suki都識做架啦。」

講完，阿蚊就閂埋門，轉身離開。

房間內，又再次得返Mike同子瑜兩個。