穿越時空，冒充平行世界嘅另一個自己，再去呃佢條女上床: （112）

Mike返到自己房，見到阿鬼真係上左大隻佬機械人嘅身，連個樣都變埋。

變成阿鬼原本咁嘅樣，有兩撇鬚，頭髮撥嚟撥去，懶喺chok咁款。

「點...點解會咁嘅？」Mike感到不可思議。

「靠嘅係呢粒靈魂螺絲。」阿榮手上拎住一粒手指尾咁粗嘅螺絲。

「呢粒嘢有乜咁特別？」Mike拎上手睇一睇粒螺絲。





「呢粒螺絲可以吸收人嘅靈魂，只要將螺絲裝入去機械人身上，咁人嘅靈魂就能夠同機械人嘅軀體二合為一。」

阿榮講完，就同阿鬼一齊擰轉身，二人拉低件衫，展示佢地背脊上鑲住嘅靈魂螺絲。

呢個時候，Mike醒返起，自己曾經有懷疑過阿榮係機械人。

結果真係如佢所料。

「原來你真係機械人。」Mike對阿榮講。





「係，本來我已經死左，係阿Mike將我嘅靈魂注入到機械人身上，令我可以喺呢個世界繼續生存。」阿榮提起逝去嘅好友，臉上不禁流露出一絲憂傷。

「咁離奇？可唔可以再講多啲？」Mike問。

阿榮點點頭，跟住將呢個時空嘅Mike嘅故事，分享俾大家聽。

其實，呢個時空嘅Mike同其他四個Mike一樣，中學嗰陣都係游開水，無奈一次大病就令佢無法再比賽，甚至連游水都無得再游。

遇到同樣嘅挫敗，呢個時空嘅Mike一樣係感到灰心及沮喪。





當時佢喺度諗：呢個身體唔得，咁換個更強、壞左都可以隨意修理嘅身體咪得囉。

於是，佢就開始研究兩樣嘢：機械科學同神秘學。

佢下定決心，要研發出一個機械人，並想將自己嘅靈魂轉移去機械人身上。

為左達成目標，佢不單止學習整機械人，仲去埋泰國，探訪當地嘅巫醫，尋找靈魂轉移之術。

喺四處拜訪嘅過程中，除左成功揾到靈魂植入去機械人嘅方法之外，仲意外得到嗰條魔蟲同嗰本秘笈。

雖然有左靈魂轉移嘅方法，但係最後佢卻無實行到。

因為要靈魂脫離肉身，得一個辦法，就係要死。

要用條命嚟博，風險太大，所以佢都係放棄左。





當佢以為呢世都唔會用到嗰幾粒靈魂螺絲，點知外星人就出現左。

外星人入侵第一日就大肆破環，阿榮更不幸咁被外星人殺死。

為左救返朋友，佢喺櫃桶底，摷返幾粒封存已久嘅靈魂螺絲出嚟。

再用巫醫教過佢嘅招魂方法，將對方嘅靈魂召喚並收入螺絲，繼而裝埋嗰粒螺絲落去，本來為自己而設嘅機械人之中，最後成功令阿榮復活。

「Wow！ 又識整機械人又識巫術！勁呀！」美國鷹聽完故仔，不禁讚歎呢個時空嘅Mike好犀利。

「係，全靠佢，我先繼續生存到落去。」阿榮可以話欠左呢個時空嘅Mike一條命。

「估唔到呢個世界，會有靈魂轉移呢種咁不可思議嘅事。」張醫生摸摸下巴，覺得好神奇。





「好啦，講返我先，老老實實，大家覺得我呢個look掂唔掂？」阿鬼撥一撥頭髮，好似啲健美先生咁谷起啲肌肉。

「掂，不如你又試下有無恢復到，穿越時空嘅能力？」美國鷹問。

「好呀！」阿鬼撻幾下手指，眨下眼佢就憑空消失。

當大家以為佢成功穿越左，下一秒對方就喺門口外面行入返嚟。

「你頭先穿越去第二個時空？」張醫生問。

阿鬼搖搖頭：「無呀，啱啱我只係由間房，轉移左出去門口出面。」

始終呢個都唔係阿鬼原本嘅肉身，本身跨時空嘅穿越能力，無法完全咁發揮出嚟。

依家嘅佢，頂多只能喺同一個時空內瞬間轉移。





「Hey，做咩靜左嘅？」美國鷹問沉默不語嘅Mike。

「無咩，諗緊嘢啫。」

聽完另一個自己嘅故事後，Mike受到好大衝擊。

大家都面對同樣嘅挫折，估唔到挫折不單止無打擊其他Mike，反而仲開啟左佢地另一個人生。

原來廢嘅唔係「Mike」，而係自己。

之後Mike成晚都訓唔著，輾轉反側，反思自己失敗嘅人生。

而喺另一個間房，子瑜都係囉囉攣訓唔著。





雖然佢已經叫自己，唔好再諗Mike係咪鐘意自己，但越係唔去諗就越係會諗，搞到成晚都心思思。

呢兩個訓唔著嘅人起身行出房，想呼吸下新鮮空氣。