穿越時空，冒充平行世界嘅另一個自己，再去呃佢條女上床: （111）

自從得知自己真正細佬已經死左，長腿家姐終日鬱鬱寡歡。

阿鬼假扮「Mike」回魂，借住「姊弟重逢」，讓對方釋放抑壓嘅感情。

雖然過程中爭啲俾識穿，但最後都係成功令長腿家姐信服。

見到「Mike」鬼魂安心上路，對方嘅心情總算都好返少少。

阿鬼咁樣幫左阿榮一次，阿榮都禮尚往來，想幫阿鬼一次。





「你想唔想有返一個身體？」阿榮問。

「下？你有辦法咩？」

「我有辦法可以將你嘅靈魂，同機械人融合。」

「咁神奇？」

「嗯，無錯。」





阿榮問Judy借左一個大隻佬機械人，然後帶阿鬼去一個無人嘅房，用呢個時空嘅Mike所用過嘅方法，將阿鬼嘅鬼魂同機械人結合。

與此同時，喺另一邊廂，Mike食完晏晝飯，就去揾子瑜。

早上佢同Judy搞嘢嗰陣，練成左秘笈第八招。

有左招式，咁就需要一個招式名。

之前佢啲招式名，全部都係取用iPod入面嘅歌名，為左保持一致，第八招理想當然用返同樣嘅改名方法。





佢坐喺床邊，低頭㩒緊iPod，揾一揾有咩啱用嘅名。

子瑜就坐喺佢隔籬，想問今朝未問到嘅嘢，卻又睄到對方膊頭有撻紅印：「嗯？你呢撻咩嚟架？」

撻嘢係同Judy留低嘅「咖喱雞」，不過Mike唔好意思講出口：「Er…被蚊咬…紅左啫…」

「蚊癩咁大撻架咩？同埋，今朝早Judy揾你做咩呀？」子瑜又問。

「無咩呀，咪傾下閒計咁囉，做咩咁八卦？」

「講大話…」子瑜細細聲講左句。

「你話咩話？太細聲聽唔到。」

「我話嗰日你話唔要部機，咁點解唔送俾阿蚊佢地，淨係送俾我嘅？」





請教過阿蚊佢地，子瑜學識左婉轉咁去問。

「唔係喎，頭先你嗰句嘢有咁大段嘅咩？」Mike碌下碌下，終於揾到適合嘅招式名，「OK，就用呢個名！」

「喂呀，問緊你嘢，快啲答啦！」子瑜有啲心急。

「咁嗰陣係得你行過嚟，咁我咪送你囉。」

「仲有呢？」子瑜追問。

「Hey！你快啲過嚟睇下！阿鬼上左隻機械人身！So amazing！」呢個時候，美國鷹好雀躍咁行過嚟話。

「上左身？咩料呀？」





「你快啲返嚟我地間房睇下咪知！」

「好呀！等埋！」

Mike俾返部機子瑜，同美國鷹返左自己房。

仲未問到想問嘅嘢，子瑜有啲失落。

「唔好諗！唔好諗！」之後佢又叫自己唔好再諗，當務之急佢應該係諗辦法離開呢個時空，而唔係諗埋啲情情塔塔嘅嘢。