穿越時空，冒充平行世界嘅另一個自己，再去呃佢條女上床: （113）

「咦，乜你未訓嘅？」子瑜見到Mike行出房門。

「無…起身屙夜尿啫…」

「但廁所喺呢邊喎。」子瑜指住走廊另一邊方向。

「哦…一時記錯左...」Mike調轉頭，行去子瑜嗰一邊，「係啦，點解你又未訓嘅？」

「我…」





「砰！！！」

突然之間，成棟建築劇烈一震。

「發生…發生咩事？」二人嚇左一大跳。

「砰！！！」

又一下撞擊，建築再次劇烈搖晃。





本來喺夢中熟睡嘅人，全部都被嚇醒左。

「Oh my god！What happened？」美國鷹連同其他人衝出房門。

「砰！！！」

成棟嘢瘋狂咁受到撞擊。

「我地落去睇下咩事！」Mike帶頭行落樓，同層嘅人緊隨其後。





「砰！！！」

子瑜一時企唔穩，爭啲仆落樓梯，好在Mike及時扶住佢。

被對方捉住隻手嘅一瞬間，子瑜有種觸電嘅感覺。

Mike佢地同埋其他層數嘅生還者，紛紛落到去最低一層。

「砰！砰！砰！」

出面有啲嘢想撞開博覽館嘅大門。

Judy指令啲大隻佬上前頂住道門，並叫大家唔好慌張。

過左一陣，出面嗰啲不明嘅敵人停左落嚟，無再衝撞大門，但卻就繼續撞擊其他地方。





成棟展覽館係咁喺度震，雖然外墻有鋼鐵加固，但感覺隨時都會俾出面啲嘢撞入嚟。

「咁唔係辦法，不如我地出去睇下咩事！」美國鷹擸埋碌烈焰炮，想Mike出去睇下。

Mike點點頭：「好！」

Judy就話：「貿貿然出去好危險架喎。」

「但坐以待斃都係辦法。」Mike同美國鷹推開門行出去。

第一眼就見到，本身守住門口嘅兩個機械人變成左廢鐵。

依家仲係凌晨五點幾，天色未光，四周圍仲係黑媽媽。





美國鷹射出一炮烈焰彈，雖然打唔中任何目標，但火光喺黑暗之中掠過，照到有三個巨型陀螺。

「你睇唔睇到係咩怪物？」Mike問。

美國鷹搖搖頭：「唔係睇得好清楚。」

「Mike！接住！」呢個時候，子瑜拋個發光扣針俾Mike。

Mike將扣針掛喺心口，發出嘅亮光令佢地睇得再清楚一啲。

「旋轉陀螺，B+級外星怪，只要破壞個旋轉軸，咁佢地就會停低。」美國鷹講出敵人資料同弱點。

隨即，Mike單手舉起拳頭，使出閃電招式。

十幾道耀眼嘅雷電如飛劍一般，從四方八面攻擊。





不過敵人又點會企企定硬食，當然即刻就避開。

二人接連繼續出招，火焰、雷電、旋風、劍光輪流出現。

要射中特定某個位本來就唔易，再加上敵人嘅速度快，變得更加難擊中底部嘅旋轉軸。

佢地都有試過攻擊其他地方，但旋轉陀螺一路猛咁轉，咩攻擊都一下子被化解。

咁都不得止，三個陀螺組成三角陣，將二人快速包圍。

三個陀螺不停咁換位，形成三道無形嘅銅墻鐵壁，並且一直收窄範圍。

Mike同美國鷹被徹底包圍，揾唔到出口。





好在喺呢個時候，變成機械人嘅阿鬼瞬間轉移，以強壯嘅身體半路攔下移動嘅陀螺。

阿鬼fing一fing頭髮，懶型咁講：「俾你地搶曬風頭，我都型返下先得架嘛！」

Mike同美國鷹趁機離開個三角包圍陣。

除左阿鬼之外，Judy都叫埋其他大隻佬幫手。

陀螺體型龐大，旋轉速度飛快，縱使十幾個大隻佬合力，都無法令佢地停低，最多只係減慢左旋轉嘅速度。

「呼…呼…」

Mike嘅呼吸變得沉重，再咁落去佢實會因為氣促，而無法繼續戰鬥。

所以唔可以再拖落去，一定盡快搞掂呢幾隻嘢。

「大家讓開！」Mike叫其他人散開，然後單手揮舞長劍。

劍柄上嗰粒靛寶石發光，隨之揮動嘅長劍捲起冰雪風暴。

呢招正是秘笈嘅第八招：劍雪漩渦。

冰寒嘅風雪形成巨大漩渦，同時吹襲三個轉動嘅陀螺。

唔洗三十秒，三個陀螺就結成冰雕，再都郁唔到。

「鏘！鏘！鏘—」

再揮劍數下，Mike就將三個陀螺斬成碎片。

與此同時，天空破曉，晨光照亮大地。

危機已經解除，Mike鬆一口氣，同美國鷹、阿鬼仲有班大隻佬，轉身返入去避難營。

「Hi，早晨！」

忽然，背後聽到一把聲。

擰轉面一望，無端端有個男人，帶住兩個矮仔外星人行過嚟。