穿越時空，冒充平行世界嘅另一個自己，再去呃佢條女上床: （105）

「咦？做咩一個人匿喺度嘅？」子瑜發現Mike獨自躲藏於一角。

「無嘢…唔關你事…」

子瑜坐到Mike旁邊，遞足左包朱古力：「食粒朱古力啦，個人會開心返啲架。」

「我邊有唔開心…」

「唔洗扮啦，頭先已經見到你悶悶不樂咁嘅樣。」





Mike無出聲回應，靜左七八秒後，除低曬耳機，遞部iPod俾對方：「送俾你。」

「嗯？做咩無啦啦送俾我？」

「我唔想再用，睇下你要唔要，唔要我揼左佢。」Mike想同過去嘅自己撇清關係，唔想再繼續用呢部iPod。

「你又唔洗咁衝動。」子瑜阻止對方亂揼部機。

「咁好啦，我就蝕底啲，暫時幫你好好保管住先，亦當係之前間接令你受傷嘅補償，你幾時想要返隨時問我攞啦。」





「咁都當係補償？」

「係架啦，不如你講多啲部機點用。」

就喺Mike教緊子瑜用部iPod嘅時候，其他人大嗌Mike同子瑜個名，似乎喺度揾緊佢地。

佢兩個以為出左咩事，行去睇下。

超市內嚟左幾個身穿護甲，笠住頭盔嘅人，佢地身邊傍住一班大隻佬。





呢班人好熟口面。

其中一個人除低頭盔：「點解…點解又多一個Mike嘅？」

「Ju…Judy？」 Mike認得呢個女人，啖諗左一陣先記起對方個名。

「哈，你終於記得我個名啦。」Judy笑一笑。

「識架？」美國鷹問Mike。

「見過一次咁囉。」Mike醒起呢個Judy之前帶住一班機械兵，救走左阿榮同長腿家姐仲有其他人。

「唔止一次，我地好耐之前喺個機械人比賽度見過架啦，同埋我都唔知你原來有咁多個孖生兄弟。」

Judy數數在場嘅Mike，加埋隻鬼魂，一共有四個。





Mike知道Judy當左自己係呢個時空嘅Mike：「Er…情況有啲複雜…一時三刻我都唔知點同你解釋。」

「哦~不過點都好，你無事就好啦。」Judy對Mike講，「係啦，我地頭先喺呢帶搜尋生還者，咁啱見到你地匿喺呢度，不如我帶你地返去大本營，嗰度安全啲架。」

Mike問問其他人嘅意見。

眾人商量左一陣，都覺得無問題，決定跟Judy返去大本營。

五六隻白色機械馬駐足喺超市門口，Judy騎上白馬，主動伸手拉Mike上馬。

「喂喂喂，等埋呀！」阿鬼都想騎馬，但一跳上去，個身穿過隻馬，騎極都騎唔到。

「噠噠噠噠—」





白馬喺滿目瘡痍嘅高樓大廈之間穿梭。

嚟到一個廢墟，見到一間半圓球體嘅建築。

「太空館？」Mike第一眼以為係太空館。

「你認錯啦，呢度係展覽中心，我地用鋼鐵將佢加固左，依家就係我地避難營。」

呢個好似太空館嘅半球體建築物，就係Judy口中嘅大本營，嗰啲被救嘅倖存者全都住喺裡面。