穿越時空，冒充平行世界嘅另一個自己，再去呃佢條女上床: （104）

呢個時候，阿鬼都開聲：「照咁睇，我算係比較好彩，我中左肺炎死唔去，醒左之後，仲多左穿越時空嘅超能力。」

「雖然我地嚟自唔同嘅平行時空，但估唔到大家都一段咁相似嘅經歷！That’ so amazing！」美國鷹感到好出奇

跟住三個Mike各自分享更多故事，唯獨Mike變得沉默。

一直以嚟，佢都以為自己係悲劇男主角，將人生嘅失敗歸咎於自己嘅不幸。

到頭來先發現其他平行時空嘅自己，原來都經歷過一樣嘅挫折。





唔同嘅係，對方願意接受現實，踏出一步走出陰霾。

相反，佢自己卻一路耿耿於懷，自暴自棄。

之前佢以為美國鷹之所以入到大公司，買到大屋，全靠佢生活喺西化嘅環境之下。

佢以為張醫生讀到醫生，係因為屋企人俾錢谷佢去補習。

直至呢刻佢先發現，自己同佢地最大嘅分別，並唔係在於生活嘅環境，或者時代背景，而係在於心態。





人地無被挫折嘅陰影，一直籠罩自己嘅人生。

事實上，人生永遠唔會一帆風順，無論喺邊一個時空，每個人都會遇到挫折同打擊。

面對挫折嘅時候，點樣去應對，可能就成為左呢個你，同另一個平行時空嘅你嘅分別。

弔詭之處係，可否喺挫折中振作，好多時候只在於一念之差。

Mike就係諗唔通，只係識得自怨自艾，結果就一事無成。





所有嘢都係佢咎由自取。

「Hey，做咩靜左唔出聲嘅，不如你再具體講下你個case係點？」美國鷹問Mike。

「Er...Er...我都係…咁上下啦…」Mike感覺羞愧，恥於開口。

之後佢全程都心不在焉，默不作聲。

大家行下行下，由比較近工廠區嘅位置，嚟到較多高樓大廈嘅商業區。

離遠見到維多利亞港，估計呢度應該係尖沙咀。

對面海順理成章就係香港島，喺嗰度零零捨捨好明顯，見到一座好高好高嘅建築物，睇落仲要高過ICC大廈。

呢個時空嘅尖沙咀，無論格局佈置，定還是建築物都同Mike嗰個時空嘅有出入。





受到外星人破壞，當中有一部分樓宇嚴重受損，瓦礫碎片散落一地。

佢地嚟到一間超級市場，裡面有水同食物，亦有電筒可提供照明，好適合喺度落腳。

除此，超市隔籬就有一間藥房，張醫生入去執左啲藥，幫Mike解決佢氣促嘅問題。

「呢啲藥對你有幫助。」張醫生遞左幾粒藥丸同水俾Mike。

「哦，多謝。」Mike食完啲藥，然後就一個人行開左，匿去一個貨架後面。

佢嘅心情依然低落，個腦不停喺度諗緊，假如自己當初可以積極一啲面對挫敗，或者佢嘅人生會有其他更好嘅可能性。

塞住耳機嘅佢一邊聽住歌，一邊望住iPod背面刻住嘅「champion」。





咁多年嚟，佢都唔捨得揼走呢部機，原因就係佢仲留戀緊過去，唔肯對以前嘅事釋懷。

原來有啲嘢放唔低，人係無辦法向前。

聽住低沉嘅音樂，Mike感到一陣又一陣嘅失落。