穿越時空，冒充平行世界嘅另一個自己，再去呃佢條女上床: （106）

行落馬後，Mike等人跟住Judy佢地，慢慢行入避難營。

半球體建築嘅兩道門都係半圓形，門前有兩個揸盾牌同斧頭嘅大隻佬守住。

Judy展示手上嘅通行證，嗰兩個大隻佬雙眼發出光線，掃描張證後，就打開兩道門。

Judy話呢度原本係展覽館，入去門口果然就有塊banner，寫住「歡迎嚟臨工業自動化展覽會」。

個場館好大，唔計地下總共有三層。





地下呢層都分左兩個區域，一個係救護區，大約六個醫療人員負責幫傷者療傷。

另一個區域似係機械人修理區，一班維修人員修理緊啲大隻佬機械人。

「你地有無人受傷？洗唔洗檢查下？」Judy先帶Mike等人去救護區。

「仆街！點解你地會喺度架！」張醫生嚇左一跳，仲爆埋粗。

佢之所以咁激動，係因為救護區有三個姑娘，同屋企嗰三個老婆生得一模一樣。





「快啲話我聽，係咪我眼花，點解我會見到嗰三隻老虎乸嘅？」張醫生淆到匿喺Mike嘅背後，唔敢直視三人。

Mike望一望，點點頭：「你無眼花，佢地真係同你三個老婆好似樣。」

「做咩你個孖生兄弟咁驚嘅？」Judy問。

「Er…呢三個姑娘生得好似佢老婆，勾起左佢啲唔開心嘅記憶。」Mike答。

「哈哈，唔洗咁驚，我可以肯定佢地唔係你兄弟嘅老婆，因為呢三個都係機械人嚟。」Judy解釋。





「Robot？Wow，真係睇唔出喎。」美國鷹覺得出奇。

「佢地係用於醫療方面嘅機械人，識得探熱、包紮、量血壓等護理嘅工作。」Judy再講解多啲。

「你聽到啦，機械人嚟架渣，」Mike叫張醫生唔好驚。

「機...機械人？」張醫生突返個頭出嚟，仔細打量三個姑娘。

論樣貌，的而且確係生得餅印一樣，然而舉止動靜卻同自己三個老婆好大分別。

張醫生拍拍心口，鬆一口氣。

跟住，Judy帶埋大家去機械人維修區。

嗰幾個維修人員一見到Mike，就好驚喜咁打招呼，仲話大家好耐唔見。





對於Mike嚟講，呢班人從來都無見過：「對唔住，我唔識你地。」

「搞錯呀，以前機械人大賽嗰陣，我地成班一齊捱夜set programme架喎。」其中一個戴帽嘅修理人員對Mike講。

「係囉，咁你都唔記得？太無記性啦！」另一個手臂有紋身嘅修理人員都覺得奇怪。

呢個時候，Mike都唔怕坦白：「其實我唔係你地認識嘅嗰個Mike，而我地四個亦都唔係咩孖生兄弟，我地都係嚟自另一個平行時空嘅Mike，之前一個唔覺意穿越左嚟呢度。」

「咩...咩話？」Judy聽到一頭霧水。

Mike繼續講落去：「我根本就唔識你地，亦無同你地參加過咩機械人大賽，你地啱先講嗰啲嘢，我一句聽唔明。」

「雖然你生得同Mike一樣，但就唔係我識嗰個Mike？」Judy眉頭緊皺，嘗試理解對方嘅說話。





Mike點點頭，同Judy講：「無錯，你地認識嗰一個嘅Mike，早就已經俾外星人殺死左。」

Judy無法相信，眼神中閃爍住驚訝嘅神情：「我…我認識嘅…Mike…已經…死…死左？」

「無見咁耐，做咩開啲咁嘅玩笑？哈哈！」戴帽嘅維修工唔相信Mike嘅說話。

「我講嘅都係事實，信唔信就由你地。」MIke回應。

「Judy，我諗Mike都係一時攰得滯，頭腦唔清晰啫，你快啲帶佢地去休息下啦。」有紋身嘅維修工就話。

「哦…好…」Judy回過神，帶Mike佢地上去樓上。

展覽館嘅上一層被改建成倉庫、廚房，倉庫中儲存左唔少糧食，柴米油鹽樣樣齊。

再上兩層間左好多間房，變到成間酒店咁，目前已經住左千幾個倖存嘅人。





Judy帶大家嚟到最頂一層，為佢地八個分配房間。

每間房有四張帆布床，子瑜同另外三個女仔一間，四個Mike包括阿鬼就一間。

「咁你地好好休息，到時開飯嘅話，會有廣播通知。」Judy對Mike講。

「其實我頭先講嗰啲嘢...」

「我...我諗我需要時間消化下...」Judy講完，就急急腳行出房門。

同一時候，好耐無見嘅阿榮咁啱經過房門，見到四個Mike，打左個突：「Mike？Mike...Mike...Mike…四個？」