穿越時空，冒充平行世界嘅另一個自己，再去呃佢條女上床: （91）

「美國Mike」非常雀躍，行埋嚟問Mike：「Unbelievable！點解呢度會有外星人出現嘅？」

「呢層我都唔清楚，不過我反而想知，點解你會知隻蜈蚣怪嘅弱點？」Mike反問。

「因為呢隻嘢我見過。」

「下？你見過？」Mike同子瑜不約而同嚇左一跳。

「你條友整爛左嗰本外星人圖鑒入面，其中一隻外星人咪就係呢隻蜈蚣囉，佢個名叫Sesca。」





「食…食s…食咩話？」Mike問。

「Sesca，音譯嘅話應該就叫錫斯卡。」「美國Mike」答。

Mike諗返起自己都揭過下對方嗰本書，當時佢唔小心撕左嘅一頁，上面嘅圖案就係之前見過嘅八爪魚怪。

「我想問，你嗰本書係咪有隻外星人，上身係捕蠅草咁嘅樣，下半身就似八爪魚？」

「有呀有呀，乜你都見過？」「美國Mike」對眼好似發光一樣。





「係，之前見過。」

「Wow！ That’s so cool！除此之外，你仲見過邊種外星人？」

「美國Mike」興奮到已經唔記得曬佢同Mike之間嘅恩怨，lur住對方講多啲俾佢聽。

Mike唔係好想理條友，「皮褸Mike」嘅死令佢感到沮喪。

本來佢同子瑜可以靠對方嘅穿越能力，離開呢個時空，但係估唔到對方出場無幾耐就瓜左。





佢地幾個行去「皮褸Mike」條屍度，「醫生Mike」踎低摸一摸大動脈：「佢已經死左，無得救。」

而呢樣嘢唔洗佢講，其實大家都有眼見。

條屍心口穿左咁大個窿，心肝脾肺腎爛曬，根本係神仙都救唔返。

「唉…」Mike同子瑜望住條屍歎氣。

「嗚嗚…我係咪死左？」

突然間，眾人耳邊傳嚟一把低沉嘅聲音。

擰轉面一望，「皮褸Mike」成個人棟左喺度。

「嘩！鬼啊！」





Mike同子瑜嚇到大嗌，「美國Mike」驚到匿喺「醫生Mike」背後。

「乜我真係變左鬼…」「皮褸Mike」苦口苦面，想撥一撥自己嘅頭髮，但隻手一掂就穿透過去，摸唔到任何嘢。

「冤有頭債有主，係隻蜈蚣怪隊冧你，你要揾人報仇，就落地獄揾蜈蚣怪啦。」Mike見到鬼驚過見到外星人。

「我頭先落左地獄，個閻羅王話唔肯接收我。」

「唔肯接收你？我之前聽過一個講法，如果你唔屬於嗰個時空，咁你就無得投胎。」子瑜講嘢嘅時候，唔太敢直視隻鬼。

「咁點算呀？我係咪成世要留喺度做遊魂野鬼？」

「呢層我都唔知。」子瑜眼尾睄一眼隻鬼答。





「噠、噠、噠。」

變成鬼嘅「皮褸Mike」啪手指，嘗試穿越，結果當然係唔成功：「原來死左穿越唔到，咁我點返去原本嘅時空，然後去投胎？」

佢呢個問題，在場無一個人識答。

見到大家驚到縮埋一舊，鬼魂就話：「你地洗唔洗咁淆底，我都唔係好得人驚啫？」

四人嘅視線由上慢慢掃落去，鬼魂個樣係同生前一樣，正正常常咁。

不過再望落啲，佢個心口穿大窿，幾鬼驚嚇。

佢地四個頂唔緊，轉身調頭走人。

「等埋呀喂，唔好瀨低我！」鬼魂追上去。





飄住咁行點都快過用腳行，而且又唔會攰，Mike佢地走去邊，隻鬼就跟去邊，點樣都擺脫唔到。

最後，四人都無辦法，賣唔甩隻鬼就焗住要收留佢。

作為條件，隻鬼必須要黐墻行，無乜嘢都唔可以突個人出嚟。