穿越時空，冒充平行世界嘅另一個自己，再去呃佢條女上床: （90）

喺無情巨鑽嘅摧殘下，「皮褸Mike」心口俾鑽穿個大窿。

Mike再次召喚出長劍蒼靝，對付突然現身嘅蜈蚣怪，並叫其他人快啲散開。

「鏘！鏘！鏘！」

利刃同鐵鑽相互攻擊，激撞出陣陣火花。

隻蜈蚣怪好高防，面對Mike密集又強勢嘅攻擊，完全頂得住，而且又識得捐落地底避招，真心難搞。





眼見正面對抗搞唔掂，Mike就兜去後面，想攻擊蜈蚣怪條尾，結果俾敵人睇穿左。

隻蜈蚣好似條蛇咁捲曲個身，將對手重重包圍住。

佢一條條巨大嘅蜈蚣爪又硬又尖，如齒輪一般輪轉，攻擊對手。

好在Mike有套甲頂住，否則一定俾啲蜈蚣爪拮死。

「Hey！Head！佢頭頂有個凹位，嗰度係佢嘅弱點！」呢個時候，「美國Mike」向住處於下風嘅Mike大嗌。





「弱點？」Mike揮劍切斷，三隻圍埋嚟嘅蜈蚣爪。

「係！去攻擊佢頭頂嗰個凹位！」「美國Mike」指住蜈蚣怪個頭。

Mike聽完對方咁講，都無諗太多，反正點都試左先。

佢借使出爆裂旋風嘅反作用力，一躍跳上半空。

就如「美國Mike」所講，蜈蚣怪頭頂有個位真係凹左入去。





Mike揸住把劍，想對準個位攻擊，但敵人稍微郁一郁就移左位。

半天吊嘅Mike打唔中目標，好快落返地，同時跳出蜈蚣怪嘅包圍圈。

假如個凹位真係敵人嘅弱點，咁就要對準嚟攻擊。

問題係，巨型蜈蚣個頭成三四樓咁高，想用近攻擊中，睇嚟要等到對方再鑽入地底先得。

唔知係咪蜈蚣怪發現左Mike嘅心思，遲遲都唔肯用最拿手嘅地底攻擊，一直留喺地面同Mike玩消耗戰。

「Come on！攻佢頭頂！」旁觀嘅「美國Mike」相當肉緊。

「得啦！咪嘈啦你！」Mike同敵人磨左咁耐，佢都已經失去耐性，好想速戰速決。

既然近戰唔得，咁唯有試下用遠攻。





佢放低長劍，召出白色太陽槍，對準敵人頭部，射出火焰子彈。

蜈蚣怪岳高頭，用鐵鑽嘅底部硬擋，就係唔俾對手打中自己頭頂。

火焰彈嘅威力只係足以將把鐵鑽表面燒焦。

多番進攻都被化解，Mike有少少束手無策。

後知後覺嘅佢終於諗返起，自己練左嘅秘笈第六招。

咁嘅情況下，呢一招應該用得著。

Mike舉高支槍，向住蜈蚣怪個頭開左五槍。





今次蜈蚣怪避都唔洗避，因為全部都射偏曬。

五粒子彈就咁喺蜈蚣怪頭頂上空飛過，連邊都hi唔到。

睇落Mike嚴重失準，但其實好戲在後頭。

嗰五粒子彈霎時間改變方向，本來直線嘅彈道突然折射，朝住蜈蚣怪頭頂嗰一個凹位攻擊。

第六招係射擊者隔空控制射出嘅子彈，令子彈改變軌跡。

Mike以自己命名呢一招，就叫「麥克折射線」。

隻嘢個頭頂即刻著曬火，好快火勢仲蔓延至成個頭，最後「Boom」全個一聲炸開。

「Yes！Yes！Yes！」「美國Mike」振臂歡呼，仲興奮過親手打敗敵人嘅Mike。





啲火燒到無嘢好燒，蜈蚣怪個頭只剩返嗰把巨型鑽頭。