穿越時空，冒充平行世界嘅另一個自己，再去呃佢條女上床: （92）

頭先同隻鬼「捉依因」，搞到Mike同子瑜差啲蕩失路。

好在子瑜記得路牌，最後摸下摸下都揾到方向。

一路上，「美國MIke」係咁問嘢，問點解外星人會入侵地球，又問Mike點解識得出技。

Mike無佢咁好氣，覺得條友好q煩。

反觀「醫生Mike」份人比較安靜，亦都無提起，之前Mike搞佢三個老婆嘅事。





大約十分鐘後，佢地順利返到診所。

「咦，你幾時多左咁多個孖生兄弟？」掛喺門口嘅魔迪加問Mike。

「佢地唔係我孖生兄弟，講起嚟有排講，得閒先同你解釋。」

「美國Mike」拎隻公仔上手，仔細打量：「點解隻熊啤啤識講嘢嘅？唔通都係外星人？」

「呵！本大爺就係宇宙之王魔迪加！」





「哦！我知啦！Mordica！無記錯，你嘅戰鬥力係第二犀利！但我印象中你個樣好似唔係咁。」

「你講咩呀！本大爺係宇宙最強！依家只係仲處於休眠狀態，先會變成咁嘅樣，等我徹底甦醒，你就知道本大爺有幾厲害！」

「下？無可能，我唔會記錯嘅，戰鬥力最勁嗰隻叫Delaus帝洛斯，佢無論係初形態定係final形態，數值都係最強。我以前打機成日都用你，但都好得難打贏帝洛斯。」

「打機？又關打機事？」Mike問。

「乜我無同你講咩，嗰本外星人圖鑒係源自一款格鬥game，隻game就係以外星人做題材，叫Battle Of Aliens，有無聽過？」





「無，完全無聽過，咁所以本圖鑒，其實只係一隻格鬥game嘅周邊產品？」

「Yes！隻game令我迷上外星人題材，至於嗰本書係我多年嘅珍藏，結果俾你條友整到…唉！不過算啦，家陣見到真嘅外星人，感覺仲正！」

「咁即係話，喺你個時空，蜈蚣怪、八爪魚怪、魔迪加同其他外星人，都只係虛擬嘅遊戲角色，但喺呢個時空就係真實嘅怪物。」

「呢啲唔出奇嘅，Rick and Morty入面啲平行時空，都係咁上下玩法啦。」

原來「美國Mike」都有睇Rick and Morty，Mike卒之喺另一個自己身上，揾到少少共同點。

阿蚊、Vincy、Suki聽到腳步聲，估到子瑜同Mike返左嚟，一齊行出去迎接。

佢地見到無端端多左兩個「Mike」，大嚇左一跳，追問發生左咩事。

Mike同個美國人講嘢，已經講到口水都乾，唔想再長篇大論同三個女仔解釋。





於是佢就叫子瑜幫手：「我好口渴，你嚟同佢地解釋下咩情況。」

講完，佢攞走子瑜手上啱撕開包裝紙嘅朱古力，仲有樽裝水，然後行入醫生房。

「喂，支水我飲過架！」

「得啦，無所謂啦！」

診所入面，依家有一個真正嘅醫生。入到房，Mike剝走條褲，俾屎忽個傷口「醫生Mike」睇下。

對方望兩眼：「無事，皮外傷嚟啫。」

「哦，咁都好啲。」Mike休返條褲。





「點解魔迪加突然無左聲氣嘅？」「美國Mike」揸住隻公仔，點搖點fing都無反應。

「係咁架，隻嘢成日唔應機。」

Mike呢句啱講完，除低醫用手套嘅「醫生Mike」，無端端搭住佢膊頭，好認真咁對佢講：「多謝你！」