穿越時空，冒充平行世界嘅另一個自己，再去呃佢條女上床: （75）

呢個時候，子瑜企出嚟幫Mike講說話：

「大家聽我講，呢條友係就係鹹濕啲，佢搞人條女係佢唔啱，不過除此之外，呢幾日佢都無做出啲咩損害大家嘅事，而且仲奮身保護過大家，咁就證明佢唔係壞人。」

「收皮啦！所謂保護大家，根本就只係想博取我地嘅信任，等我地放下戒心！」占士繼續煽風點火，「大家唔洗理呢條女講嘅嘢！呢條女同個冒牌貨係一夥嘅！」

「占士，你越講越離譜喎，我承認我係衰格，呃左Lulu上床，但係我保護大家，並唔係博取…」

「嗚嗚嗚嗚嗚—」Lulu特登用喊聲掩蓋Mike嘅說話。





「得啦！你唔洗再講！我地已經聽夠你嘅大話！唔該你將肚入面條蟲，同埋嗰本秘笈交返出嚟，然後自動自覺消失喺我地面前，我地唔想再見到你呢個冒牌貨！」

占士拎出嗰個放住秘笈嘅黑盒，要求Mike用指紋解鎖。

「我地都俾你呃得透啦！」「還返原本個Mike哥哥俾我地呀！」「呢度唔歡迎你！走啦！」

大家都聽信占士嘅說話，決定要趕走Mike。

面對群情洶湧，Mike想解釋但眾人卻已完全聽唔入耳。





「快啲解開個鎖，嘔返條蟲出嚟！」占士眼掘掘咁扯住Mike嘅衣領。

「呢度唔歡迎我，我可以走，但係我真係唔知，點樣先嘔到條蟲出嚟。」

「咁不如我幫下你，劏開你個肚…」

「咚隆！」

突然間，地下猛烈震動。





今次地震同之前嘅好唔同，震感係一路咁增加。

「砰！！！」

禍不單行，天花板破裂，天啲石屎逐忽逐忽咁跌緊落嚟。

「你地唔好再拗啦，間廠好似冧緊，我地快啲走啦！」阿榮扶住三個受傷嘅𡃁仔，帶頭快步行出去，工廠對開嘅空地。

其他人都知情況不妙，拿拿聲跟住阿榮跑出去。

天色已黑，周圍黑媽媽，只見前方兩盞閃爍嘅藍色菱形燈。

子瑜拎出剛才執到嘅發光扣針，照向前面。

兩隻矮仔外星人飄住行緊過嚟，佢地身後有一隻好巨型嘅蜈蚣，以S字形嘅方式行走。





巨型嘅百足撞冧同摧毀曬附近嘅工廠，造成強烈嘅震蕩。

除左迎面而來嘅外星人，喺半空之中，有一個漂浮嘅發光三角錐體，每個平面都延伸出一條類似插頭嘅物體。

相信呢個三角錐體怪係同矮仔外星人一夥。

兩個矮仔外星人帶住條蜈蚣，越行越近，眾人惶恐不安，越退越後。

「嘭唥！」身後傳出左可怕嘅倒塌聲，令眾人止步。

回頭一望，身後嘅玩具廠成座冧左，頓時間變成廢墟。

望住細佬條屍埋沒喺瓦礫中，長腿家姐已絕望消沉。





灰塵散去後，喺廢墟中，出現一隻人形怪物。

佢向上高高一跳，下一秒就閃現返到矮仔外星人身邊。

隻人形怪物手持高自己一個頭嘅斧頭，頭頂生滿尖刺，塊面有四隻眼，露出獠牙嘅血盤大口就生喺胸前。

兩個矮仔外星人喺距離五十米位置，停低腳步。

「喂！呢班外星人係咪你惹返嚟架！」占士捉住Mike嘅衫領質問。

「咁都入我數？我鬼知班外星人點解會無端端出現？」

Mike啱講完呢句，嗰兩隻矮仔外星人，一齊用手指指住佢，示意三隻外星人攻擊。

「頂你個肺，真係你條仆街累街坊！」





「好啦喎，我忍夠你啦！」Mike推開占士。

喺二人爭執之時，斧頭怪揸住斧頭，直衝過去，而蜈蚣怪喺個嘴伸出一把巨型電鑽，鑽左入地底。

賤格嘅占士一腳踢Mike出去送死。

咁樣被人陰一嘢，加上斧頭怪驚人嘅速度，鋒利嘅斧頭眨眼間已殺到面前。