穿越時空，冒充平行世界嘅另一個自己，再去呃佢條女上床: （76）

「爆裂劈友拳！」Mike以招擋招，用拳頭擋住強勁嘅劈殺。

斧頭劈落嚟，將佢成個人震開，連退後左幾步。

堅硬無比鐵拳居然碎開左，拳頭更被斬傷流血。

占士嚇到無鞋挽屐走，調頭匿返入人堆中。

同時間，鑽左入地底嘅巨型蜈蚣，從地底升上嚟。





佢嗰把巨型電鑽頭鑽穿地面，由下而上攻擊。

電鑽就出現喺腳底，Mike避無可避，只能再次以招駁招。

佢揮出鐵拳，同腳下旋轉嘅電鑽硬碰硬。

「鏘！」

鐵拳同電鑽猛烈對撞，擊出火花。





鐵拳比唔上巨大嘅電鑽，唔單止鐵拳粉碎，Mike更被擊上半空，再從半空跌落地下。

佢成個人狠狠咁撻落地，背脊痛到好似裂開咁。

漂浮喺半空嘅三角錐體怪，亦開展佢嘅進攻。

佢伸長佢嘅插頭，刺入兩隻飛過雀仔體內，跟住控制兩隻雀仔好似飛鏢咁，飛埋去向Mike攻擊。

斧頭怪亦乘勝追擊，以極快速度，跳起劈擊。





連身都未起到嘅Mike，猶如砧板上嘅豬肉，已經無處可逃，等待被宰割。

佢瞇埋眼，以為自己必死無疑，無料到竟然出現救兵。

有個大隻佬揸住個盾，為佢擋下凌厲嘅斧頭，以及嗰兩隻雀嘅捨命攻擊。

咁都死唔去，Mike拍拍心口，定一定神。

大隻佬出拳還擊，但斧頭怪一下就避開，並隨機反擊。

佢dup低頭，連續發射頭頂嘅尖刺，射穿大隻佬嘅頭。

只係型左一秒，大隻佬就冧低。佢個頭被尖刺刺穿，露出電線、電路板及鋼料。

照咁睇，呢個大隻佬應該係機械人。





隨即有更多嘅大隻佬出現，去對付嗰三隻外星人。

「Mike，你無事呀嘛！」

嗰三個被Mike救左嘅女仔跑嚟扶起Mike。

本來子瑜都想過去扶，不過慢左一步：「係囉，你未死得呀嘛？」

「未死得。」Mike回答。

救兵唔止班大隻佬，有個著住護甲，笠住頭盔嘅人，騎住一隻機械白馬嚟到Mike面前。

「我無認錯人呀嘛？你係Mike？」嗰個笠住頭盔嘅人跳落馬。





「Er…你係邊位？」

「我係Judy，你記唔記得我？」除低頭盔後，對方露出真面目，居然係個靚女。

「Sorry…我唔知你係邊個。」Mike如實回答。

「咁…咁都唔出奇嘅…畢竟我地都只係見過幾次面，你唔記得都唔出奇。」Judy眼神閃過一絲失望。

事實上，喺Judy眼前呢個Mike，同佢認識嘅Mike，本來就係兩個人。

「呢度咁危險，你地大家快啲跟我地離開呢度啦，我帶你地去我地嘅大本營，嗰度安全架。」Judy身後仲有十幾匹機械馬，同埋五六個戴住頭盔裝甲嘅同伴。

至於嗰啲大隻佬，睇嚟都係Judy佢地嘅機械兵。

Mike叫Judy幫手帶其他人走，而佢自己就選擇留低。





佢知道班外星人嘅目標係佢，假如佢跟埋一齊走嘅話，可能會連累埋其他人。