穿越時空，冒充平行世界嘅另一個自己，再去呃佢條女上床: （74）

「占士你講緊咩？乜嘢真嘅Mike假嘅Mike？」長腿家姐眉頭緊皺。

「我地認識嘅嗰一個正直無私嘅Mike已經死左！呢條友係冒牌貨！」占士手指指實Mike。

「細佬，發生咩事呀？你同占士係咪有啲誤會？」長腿家姐聽到一頭霧水。

「占士你噏咩春呀？阿Mike個樣係點我地會認錯咩？除非佢識變臉啫，如果唔係點樣假冒？」

「講到尾，你點證明Mike係冒牌嘅先？」





「咪就係，占士你唔好喺度鳩噏好喎。」

其他人都紛紛起哄，大家都表示唔相信眼前嘅Mike係冒牌貨。

「大家要證據呀嘛！好！」占士叫左兩個人，喺後門抬左一條死屍入嚟。

條屍無左個頭，全身已經腐爛，發出陣陣惡臭。

「真正嘅Mike死左，呢個就係佢條屍，我諗大家就算認唔到佢個人，但都一定認得出呢道護身符。」占士喺屍體條頸度除低一道護身符。





「呢個護身符…」

長腿家姐一眼就認得出，呢個就係佢幫佢細佬求嘅護身符：「點…點解會咁嘅？點解道符喺呢條屍身上嘅…」

「因為呢條屍先係你細佬，先係真正嘅Mike！」占士語氣非常肯定。

條友吞啖口水繼續講：「幾日前，呢個冒牌貨親口同我地講，佢係另一個Mike，話真正嘅Mike已經死左，當時我同阿榮以為佢講笑，不過最近我發現，呢條友啲行為同我所認識嘅Mike好唔同，於是我地今日特登出去揾，點知真係俾我地揾到呢條屍。」

「嘩！發生咩事啊？」「唔通真係有兩個Mike？」「問題係點解假得嚟會咁真？」





劇情一百八十度逆轉，眾人議論紛紛。

「事實擺在眼前，你個冒牌貨仲有咩好抵賴？」占士質問Mike。

咁嘅情況下，Mike除左坦白之外，都無第二個選擇：「無錯，我唔係你地認識嘅Mike，我係從另一個平行時空穿越嚟呢度，雖然我個樣同死左嘅Mike生得一樣，但其實我對你地、對呢個時空係一無所知。」

此話一出，眾人就更加嘩然。

「即係話…我真正嘅細佬已經死左…而你係另一個佢…」長腿家姐露出無法相信嘅表情。

「喺我原本嘅時空，我根本就無家姐。而喺我穿越嚟呢個時空嗰日，你細佬為左救我，已經俾鐮刀怪殺死左。」Mike解釋。

「你講大話！我地嘅Mike根本就係俾你條爛坦殺死嘅！」占士竟然一口咬定Mike係殺人兇手。

「你講咩呀？你唔知頭唔知路，就唔好亂屈喎！」Mike反駁。





「Mike肚入面嗰條魔蟲，點解會去左你個肚度？唯一解釋就係你殺左佢，然後搶左佢肚入面條蟲！」占士硬砌Mike生豬肉。

「你無嘢下話？條蟲係嗰個Mike臨死前嘔出嚟，咁啱嘔落我個口度架！」Mike繼續反駁。

「你唔好用啲咁荒謬嘅藉口解釋啦！解釋就係掩飾！你唔單止殺死左Mike，而且仲冒充佢嚟欺騙Lulu，欺騙我地大家！」

「嗚嗚嗚嗚…即係話…呢幾日同我上床嗰個…嗚嗚嗚…你個衰人…居然假扮我嘅Mike…欺騙我嘅肉體…嗚嗚…」Lulu委屈咁掩面抽泣。

「古有伊底帕斯弒父娶母，今有你條粉腸殺死另一個自己，再搞人條女！你真係好卑鄙呀！」占士引經據典，瘋狂指責Mike。

「嗚嗚嗚嗚—」Lulu假作痛悲，喊得再淒厲一啲。

相反，長腿家姐面無表情，傷心到好似失去左魂魄咁。