穿越時空，冒充平行世界嘅另一個自己，再去呃佢條女上床: （73）

大家有危險，Mike即刻出手對付四手怪。

佢先嚟一招爆裂旋風，攻擊敵人手臂，令對方鬆開手，放開左個細路。

然後再直衝過去使出「爆裂劈友拳」，一嘢就打到隻怪飛上天花板。

四手怪狠狠咁撞上天花板，再狠狠咁跌落地下。

「隻嘢我嚟對付，你地快啲匿上二樓！」





Mike講完呢句，阿榮就帶頭帶大家跑上樓上。

四手怪同之前一樣，雖然受左傷，但傷口會自動復原，好快就企返起身。

三招都對付唔到，Mike決定就試下用新招，召喚武器——白色太陽槍。

四手怪兩手變成錐，Mike瞄準佢其中一隻手，發射出烈焰子彈。

隻怪避唔切，子彈命中成功，高溫嘅火焰燒融左成把錐，重點係融左之後就再無復原。





睇嚟呢隻嘢係怕火。

為左唔破壞工廠，Mike退後引隻四手怪出去外面。

太陽差唔多落曬山，趁仲有少少餘光，可以睇得清楚瞄準到，Mike打算速戰速決。

佢一連射出五六粒火焰子彈，隻怪盡全力閃避，但都有一隻手被打中。

四手怪家陣就得返兩隻手。





本來以為可以輕鬆搞掂，殊不知隻怪居然仲有一招。

佢心口三條白色間條，發出極刺眼嘅白光。

「Mike！小心啊！」子瑜一直喺隔籬旁觀，無跟大家匿上二樓。

白色強光令Mike嘅眼球刺痛，痛到根本擘唔開眼。

四手怪發射強光嘅同時，當然就要反攻，佢助跑跳起想攻擊Mike。

強光雖然無直射子瑜，但都好殘眼，佢半遮住對眼，見到四手怪跳起攻擊：「上面！Mike！佢喺你頭頂上面！」

Mike咩都睇唔到，只能夠相信子瑜嘅說話，舉槍指上半空，連續發射三粒火焰彈。

結果，三粒子彈全部命中，四手怪全身被高溫之火燒到融左。





當強烈嘅白光消去，Mike先慢慢擘返開對眼。

四手怪已經融化成一堆黑色漿糊。

喺漿糊之中，子瑜發現有一舊細細地長方形，類似扣針嘅物體。

佢唔怕污糟，拎上手望下，上面印有三條白色間條。

「咩嚟架？」Mike行過去望兩眼。

「唔知呀。」子瑜用手指掂一掂三條間條，隨即舊嘢就發出白光。

件嘢個size 唔大，光亮度啱啱好。





「哈，呢件嘢睇嚟可以當電筒咁用。」子瑜再掂一下，熄左啲光，跟手就將件嘢收落件衫入面。

解決左四手怪後，眾人就慢慢由二樓行返嚟地下。

慶幸無人死亡，最嚴重嘅都只係手臂𠝹損左。

長腿家姐行到Mike面前問：「細佬，你頭先去左邊啊？擔心死我啦！」

「Er…我…」

正當Mike要開口解釋時，啱先差啲俾怪物殺死嘅細路走埋嚟，扯住Mike嘅衫尾問：「Mike哥哥，你又話無論有咩事，你都一定會保護我地嘅，但頭先點解你唔喺度嘅？你去左邊啊？」。

「係囉，Mike，你去左邊啊？」「我地以為你有咩事呀？」「Mike你去左邊啫？」

其他人一人一句關切咁問阿Mike。





Mike猶豫左一陣，鼓起勇氣，決定同大家表露自己嘅真正身份：「其實我…」

「唔洗再諗住講大話啦！你個冒牌貨！」

結果一開聲，就俾占士搶走發言。

占士行過嚟，踎低搭住細路嘅膊頭，指住Mike講：「弟弟，呢個Mike哥哥係假架！佢根本唔會保護我地，真嗰個Mike已經死左！」