穿越時空，冒充平行世界嘅另一個自己，再去呃佢條女上床: （36）

「你…你…你係…」Mike驚訝到幾乎講唔到嘢。

原因係眼前呢個男人，同自己個樣生得簡直一樣。

唯獨係有兩個地方唔同，第一係個男人留左兩撇鬚，第二個男人著住一件好型嘅黑色皮褸。

「你唔洗太驚訝，首先我唔係你嘅孖生兄弟，其次我亦都唔係複製人，其實我都係叫做Mike，係一個生活喺同你唔同平行時空嘅Mike。」

「咩話？所以你係從另一個平行世界嚟到呢度？」Mike追問對方。





「係呀！話時話你有無老婆？玩唔玩換妻呀？」自稱來自另一個平行宇宙嘅Mike問。

「下...」Mike一頭霧水，完全搞唔明眼前係咩情況。

「唉！睇你呢個反應，好明顯就係無女啦。」

「你...你真係從另一個平行世界穿越嚟呢度？咁即係話你都有時光機？」Mike無理對方講嗰啲咩換妻，繼續追問落去。

「時光機？無喎！我一直都係靠超能力喺唔同嘅平行世界穿越。」





「超…超能力…?」

「係呀，係咪覺得好有型呢？」「皮褸Mike」每講完一句嘢，都要撥一撥頭髮。

「……」Mike靜左，唔知講咩好。

「最近呢，我想揾各個平行時空嘅自己，一齊搞個換妻party，最衰你又無女，如果唔係肯定預埋你。」

「……」Mike依然都係俾唔到任何反應。





「乜你喺呢個時空溝唔到女咩？」「皮褸Mike」問。

Mike唔好意思答「係」，不過唔出聲其實就反映左個答案。

「唔係呀嘛？點解呀？」

「個人無出息，咁咪溝唔到女囉。」Mike回答。

「溝女講出息架咩？最緊要有鬚，夠型就得架啦。」

「Er...請問係咩意思…」Mike覺得呢條友好九唔搭八。

「你唔知你呢個時空係咪啦，反正喺我嗰個時空，唔係個個男人都留到鬚，所以有鬚嘅男人就代表有型！有型就好易溝到女！」

「皮褸Mike」捋兩下自己執鬚：「不過靜靜雞話你知，其實我呢兩執鬚係假架。」





「哦…」

「除左有鬚之外，仲有一樣嘢好緊要，其實溝女就同做人一樣，千其唔好怕失敗！明唔明？」

「都…都明嘅…」Mike開始有啲唔想理呢條友。

「明就跟我講一次！溝女同做人一樣，千其唔好怕失敗！」「皮褸Mike」撥一撥頭髮，好認真咁講。

「唔洗啦，明就得架啦。」

「要架要架！快啲講啦！」

Mike勉為其難應付對方：「溝女同做人一樣…千其唔好怕失敗…」





「好！講得好！咁我都要走啦，我要去下一個時空繼續物色人選，希望下一個平行世界嘅Mike佢有女啦！」

「皮褸Mike」講句再見，然後噠三下手指，眨下眼就憑空消失左。

Mike企喺原地，搣一滅自己塊面，好痛，咁即係代表唔係發夢。

唔通頭先嗰條友真係有超能力，隨意就可以穿梭唔同平行時空？

Mike無考究太多，亦無從去考究，而且都無將呢件事、以及剛才嗰條友講過嘅說話特別放上心，只當係一次無聊奇怪嘅偶遇。