穿越時空，冒充平行世界嘅另一個自己，再去呃佢條女上床: （35）

一路行緊嘅時候，Mike feel到後面好似有人吊住佢尾。

而嗰個人當然就係子瑜。

子瑜越諗就越覺得Mike有景轟，決定偷偷地跟蹤，睇下對方咩料。

Mike知道自己俾人跟緊，提醒自己唔好慌張。

佢將耳機連上iPod，隨意㩒左首Nowhere Boys嘅最後的搖滾出嚟聽下，然後故作鎮定咁一邊行，一邊哼住歌。





佢嚟到平時去開嘅ATM㩒錢，點知卻發現戶口得80蚊，唔夠100蚊，連錢都㩒唔到。

隨即佢send左條語音訊息問蛇頭：「偉哥，早幾日我派傳單個單job，點解仲未過數嘅？」

半分鐘之後，偉哥覆返個訊息：「屌你！個客周到你揼佢曬啲傳單落垃圾桶，炸曬型話唔找數，仲話我求其揾啲人hea鳩佢，柄左我一獲呀屌你！」

Mike都知衰，同偉哥講句唔好意思，又問：「咁偉哥，呢兩日有無咩job介紹，要係即日出糧嗰種。」

「有，今日同聽日下晝有間熱狗鋪搞週年大酬賓，佢地爭個人扮公仔，即日出糧，你做唔做？」





「做，梗係做啦。」Mike爽快答應。

「地址、時間我陣間send俾你，仲有呀，你呢排做乜撚嘢呀，成日都揾唔到人，你係咪唔想撈？」

「唔係，梗係唔係啦！我呢排係有其他嘢忙緊，我以後會兼顧得好啲架啦。」

Mike最近掛住穿越時空，搞到開工不足，身上就得返五十蚊。

為左留返少少錢責下袋，佢選擇唔食lunch，直接就去開工。





佢嚟到旺角一間賣熱狗嘅鋪頭，照老細吩咐，笠上又厚又重嘅吉祥物公仔衫，扮成一隻熱狗企喺鋪頭門口招徠客人。

與此同時，佢睄到嗰個著住黑色緊身衫嘅女仔，就喺遠處偷偷地監視，當正佢係賊咁（雖然佢真係。）

身上件公仔衫密不透風，著左一陣就已經身水身汗，Mike餓住個肚，企足六個鐘，最後只係賺左兩百五。

子瑜企左成日都發現唔到咩端倪，不過始終覺得Mike有景轟，想再觀察多一陣。

收左工都繼續俾人跟，Mike覺得好煩。

行行下，佢突然轉入一個球場，行入去男廁。

一般球場嘅廁所都有兩個出入口，Mike從另一個出口離開。

子瑜跟跟下，經過一檔賣格仔餅嘅鋪頭，一時為食分左心，就咁樣俾對方走甩左。





佢鐘意食甜嘢，雞蛋仔、格仔餅呢啲都係佢至愛。

行遠到一百米外，Mike見條女無追嚟，拍拍心口，鬆一口氣。

點知突然間，有條友搭住佢膊頭，叫停佢。

「Hi！你係咪Mike Cheung張啟恆？」

Mike擰轉面，注視身後叫佢嘅男人，擘大個口得窿，呆撚左。

個男人掃視一眼Mike ：「係啦係啦，你就係呢一個平行時空嘅我啦！」