穿越時空，冒充平行世界嘅另一個自己，再去呃佢條女上床: （37）

一覺訓醒，Mike準備又要返工。

佢呢種靠打散工為生嘅人，手停就口停，唔開工隨時連飯都無得開。

老豆老母仲訓緊覺，廁所堆污糟衫又係堆埋堆埋無洗。

Mike估計佢地琴晚又係打麻雀打通宵。

佢先洗左堆衫，跟住食個杯麵，填飽個肚就去開工。





呢兩日佢都無拎部時空裝置出嚟用，其一係因為要返工搵食，其二就係怕會俾子瑜偵測到部機嘅位置，暫時唔太敢拆開錫紙。

子瑜一連兩日暗中觀察Mike，但都唔見對方有咩異常舉動，都係正常返工放工。

佢開始懷疑自己係咪怪錯好人，亦都擔心可能真係部偵測機器出左錯。

「嘟…嘟……」

偵測信號依然非常微弱，令佢難以確定時空裝置嘅真實位置。





面對咁嘅情況，佢一時間未諗唔到對策，行去亞皆老街買兩底朱古力雞蛋仔，幫個腦補充下糖分，之後再慢慢諗計，亦都無再跟蹤Mike。

太陽已經落左山，Mike終於收工。

孭住厚重嘅公仔衫企足成日，佢又熱又攰，本來想慳錢想行返屋企，不過攰得滯，都係選擇搭巴士算。

屋企無人，老豆老母都唔喺度，Mike返入自己房，見到所有櫃桶都拉開曬，啲嘢都俾人摷過嚟。

就連平時收埋喺床下底啲陳舊物件，包括兩塊封塵嘅獎牌，都摷埋出嚟。





呢兩塊獎牌係佢Form 5嗰年，參加一個全港游泳公開賽，喺一百米自由式同二百米自由式項目中，贏返嚟嘅冠軍牌。

除左有獎牌之外，Mike一直珍而重之嘅iPod Classic，都係當其時贏得冠軍所獲得嘅獎品。

想當日阿榮都有同場比賽，而成績卻三甲不入，不過如今對方係港隊，Mike就只係個一事無成嘅廢青。

Mike過老豆老母間房睇下，裡面無任何被翻弄過嘅痕跡，即係話得佢間房啲嘢俾人摷過。

呢個時候，佢老豆開門行入屋。

Mike第一時間行出廳，質問對方：「係咪你地今日摷過我啲嘢？」

「係呀，琴晚手風唔好，我同你老母輸左十幾底，咁啱月尾又洗曬啲錢，咁我地咪摷下你間房，搵下有無三五千收埋囉，點知搵勻成間房，連斗零都無個。」

「無撚嘢下話？未經我同意就入我房，仲要摷到我啲嘢亂曬？」





「最多陣間幫你執返整齊間房囉，係啦，你家下身上有幾多錢，借住啲嚟俾我同你老母找左條麻雀數先啦。」老豆問佢。

Mike一臉唔情願喺銀包um左五舊水出嚟，呢筆錢係佢呢幾日身水身汗，扮公仔賺返嚟嘅。

「得五舊水咁少？」

「點呀你，要就要，唔要就罷就！」

「要！緊係要啦，有好過無！」

佢老豆一邊數下啲錢，一邊就同Mike講：「話時話，早幾日我撞到你中學個friend阿榮，人地依家好把炮喎，出去代表香港比賽，聽講仲贏到唔少獎金，諗返起以前你同佢…」

「得啦得啦，以前嘅嘢咪撚拎出嚟講！」Mike打斷對方說話。





「唓！唔講咪唔講囉。」 佢老豆袋好嗰五舊水，然後入自己間房，搬左兩張麻雀摺檯出嚟。

「無啦啦你做咩搬兩張檯出嚟？」Mike問。

「唉！老陳間屋爆水渠，搞到無地方開檯，咁我咪叫大家上嚟屋企打麻雀，陣間會有五六個人嚟架，你快去搬埋你間房張櫈出嚟。」

老豆呢頭講完，嗰頭Mike個阿媽帶左班師奶同阿伯上嚟。

佢地八條友開兩張檯，逼喺客廳嘈喧巴閉，圍埋打麻雀。

Mike閂埋房門，塞住耳機，將iPod嘅聲量較到最大，但都仲係聽到出面嘈吵嘅聲音。

最後佢實在頂唔順，決定落樓出街靜一靜。