穿越時空，冒充平行世界嘅另一個自己，再去呃佢條女上床: （26）

吸取上一次穿越嘅經驗，今次Mike事前做左啲準備。

首先諗定幾套策略去引開另一個自己，又或者直接啲，索性扑暈對方。

其次佢都執一執自己個樣，「醫生Mike」係戴金絲眼鏡，咁佢就喺床下底，摷老豆嗰副陳年老花鏡出嚟，拆左兩塊鏡片之後就拎嚟戴。

跟住，佢摷勻自己間房，搵到佢唯一一件恤衫。

佢覺得做得醫生，平時應該都著得四四正正，因此特意著得斯文一啲。





搞搞下時間都差唔多中午十一點半，一切都準備就緒。

攞埋自己嘅隨身物品，包括銀包、電話，以及部iPod Classic後，Mike打開「醫生Mike」嘅界面，並按下嗰粒中間圓形掣，展開第二次跨時空嘅旅程。

話分兩頭，正搵緊自己部時空裝置嘅子瑜，剛好嚟到Mike住嘅嗰棟唐樓樓下。

佢偵測到部機已經相當接近，以為即將就搵得返部機，點不知，突然間偵測信號消失左，且顯示部機又轉移左去另外一個時空。

明明已經都近在咫尺，偏偏就爭嗰少少，子瑜當堂成個人頹左。





同時佢意識到實係有條友攞左佢部機，周圍穿梭唔同嘅平行宇宙。

佢心諗嗰條友將人地嘅嘢據為己有，實在非常可惡，發誓一定要摷對方出，再好好教訓一下。

佢㩒一㩒手上部偵測機器，轉換探測模式，改為搜索方圓二十里附近有無「時空裂縫」。

時空裂縫可以連接去到「時空中轉站」。

喺嗰度，子瑜可以隨意選擇想去嘅時空，呢個亦都係除時空裝置之外，唯一能穿梭其他平行世界嘅方法。





問題係，時空裂縫出現嘅地點同時間都係隨機，每次出現都只會維持幾秒，而且大多數都出現喺高空或者深海。

而子瑜手上嘅偵測機器無任何顯示同反應，咁就代表呢一刻呢附近，都無出現時空裂縫。

係咁嘅話，佢都無其他辦法，暫時就只能等「嗰條友」穿越返嚟呢個時空。

畫面一轉，手持時空裝置嘅Mike，順利完成時空轉移，嚟到「醫生Mike」身處嘅世界。

佢望望周圍，發現自己正喺一棟住宅入面嘅十八樓電梯大堂。

以呢度咁靚嘅環境睇，呢棟樓似係高尚住宅。

「叮！」有一架𨋢到達十八樓。

門一開，「醫生Mike」行左出嚟。





Mike第一時間擰轉面，退後兩步，並用衫領遮住自己個樣。

「醫生Mike」出到𨋢，一臉愁容咁歎氣。

Mike一邊遮住自己個樣，一邊靜靜雞吊住對方尾。

「醫生Mike」嚟到一間屋嘅門口，猶豫左好耐，企左好耐都唔入去。

如要扑暈對方，Mike認為呢個係落手嘅好時機。

佢雙手合十，握實拳頭，急步行上去諗住從後偷襲。

「唉！」





點不知，「醫生Mike」歎一口氣，突然擰轉身，嚇到Mike即刻扯高衫領，遮返住塊面。

「醫生Mike」頭dup dup直行直過，完全無理過Mike，跟住行返出電梯大堂。

等𨋢期間，佢錄左個語音訊息send出去：「瑤瑤，醫院嗰度呢…Er…有啲突發嘢…所以…所以我今日之內應該都返唔到嚟…你地三個唔洗等我架啦…」

錄完一次send左出去後，佢另外再錄多兩個，內容完全一樣，只係稱呼唔同左，由瑤瑤變左Yoyo同欣欣。

「叮！」

send完message，啱啱好部𨋢就到，「醫生Mike」行入去，落返樓下走人。

匿埋一邊嘅Mike，目睹曬成個過程。

佢估計對方口中嘅瑤瑤、Yoyo同欣欣，應該就係嗰三個老婆，兼且從另一個自己一系列嘅舉動中，感覺對方好似唔太願意返屋企咁。





Mike對此表示唔理解，心諗如果自己有三個老婆，肯定晚晚收工就趕返屋企扑嘢。

另外佢推斷「醫生Mike」就係住喺呢棟樓，頭先企喺門口好耐都唔入去嘅嗰一個單位，應該就係對方屋企。

Mike執返正身上嘅恤衫，慢慢行到去嗰一單位，按下門鐘。