穿越時空，冒充平行世界嘅另一個自己，再去呃佢條女上床: （23）

回歸到原來嘅時空，自然要過返喺呢個時空原本嘅生活。

Mike洗左啲污糟衫，拖左塊地，到下晝佢就去返工。

打得散工，咁就代表乜嘢工都係來者不拒。

下午太陽正猛，烈日當空下，佢嚟到尖沙咀海防道派傳單。

派傳單呢啲工係就係下欄嘢，不過為兩餐，乜都要做架啦，要怪就怪自己無出息。





Mike一路派傳單，一路心不在焉，個腦喺度諗，假如自己生活喺西方世界，受西方環境教化同熏陶，可能都會好似另一個自己咁，會有一番作為。

至低限度應該唔會好似依家咁喺度派傳單。

明明大家都係叫Mike，身高、外貌全部一樣，點解人地就係成功人士，而自己就咁失敗？

佢埋怨自己唔識得揀時空出世，並深信如果自己生活喺第二個平行時空，人生一定會截然不同。

所謂「無比較就無痛苦」，平時同人比較已經夠慚愧，同另一個自己比較，就更加慚愧。





由下晝派傳單派到夜晚，Mike見攰又肚餓，想快快脆派曬，跟住收工返屋企。

「先生，拎張去睇睇。」Mike將手上一張傳單，塞俾一個經過嘅男人。

「Mike？」個男人停低接過傳單。

「阿榮？」

Mike眼前呢位身材高大嘅男人就係阿榮。





對方無好似另一個平行世界嘅「Roy」咁，一見到面就攬頭攬頸打招呼，亦都無稱兄道弟。

「你最近幾好嗎？」阿榮只係點點頭，禮貌式問候。

「ok啦，過得去咁啦。」Mike擠出尷尬嘅微笑，「你呢？你仲游緊港隊？」

「嗯，係呀，下個月準備出埠比賽。」

「哦…咁...咁祝你游出好成績…」

中學時期，Mike同阿榮係學校游泳隊嘅隊友，二人當時關係非常好，只係後來Mike退出校隊後，佢地就漸漸疏遠，好少聯絡。

「你幾點收工？收左工不如過來同學聚會？我地就喺呢附近食飯。」阿榮問。

「同學聚會？」





「係呀，早兩日占士喺個group度，約大家今日出嚟食飯，你無睇到message咩？」

Mike早兩日去左另一個時空，當然無睇到群組訊息，不過就算睇到，佢都唔會應約。

佢從來都唔鐘意呢啲同學聚會。
因為每次同學見到面，實會問你返咩工，搵幾多錢一個月，大家都暗啞底喺度互相比較。

Mike最憎呢啲場合，所以幾乎每次同學聚會都唔會去。