穿越時空，冒充平行世界嘅另一個自己，再去呃佢條女上床: （22）

前無去路，後有追兵，點算好？

Mike一邊喘氣，一邊掃視四周，意識到自己真係無路可走。

佢望住手上嘅時空裝置，此刻唯一可以脫險嘅方法，就只有啟動呢部機，直接離開呢個時空。

問題就唔知部機開唔開得著？

唔理啦！得唔得都要試一次！





Mike將手指公放喺環形轉盤上，順時針轉動幾下。

「時空裝置，啟動。」

結果令人喜出望外！部機居然撻得著！

「掃描，完成。」

熒幕照出一道紅光掃描Mike，隨即再投影出一個立體畫面。





Mike Cheung（TP-76），呢個正是屬於佢嘅界面。

上面顯示出嚟嘅資料同之前基本相同，唯獨性經驗一欄，無再顯示佢係青頭仔

「Haha, got you！」「另一個Mike」已經殺到埋身。

Mike深呼吸一口氣，對準時空裝置中間粒圓形掣，出力㩒落去！

喺佢頭頂即時出現一個大光圈，並發出極強勁嘅吸力，一剎之間將佢成個人吸走。





短短一秒間，Mike就憑空消失得無影無蹤。

「另一個Mike」目睹呢一幕，下巴幾乎跌到落地下，唔敢相信自己雙眼，感到極之不可思議。

至於Mike不但成功脫險，兼且終於都由另一個時空，轉移返到去自己原本嘅時空。

狹窄嘅空間、雜亂嘅書檯、堆滿紙巾嘅垃圾桶，Mike無睇錯，呢度就係自己間房。

佢拍拍心口，鬆一口氣。

啱啱真係好驚險，俾另一個自己揸住支槍追左九條街，走遲一步都隨時瀨嘢。

奇怪嘅係，點解部時空裝置又會忽然開到機？

明明都無特別㩒咩掣，都係轉動個轉盤，因乜解究之前一直都開唔著，但啱先又得？





Mike諗左一陣都諗唔明，乾脆唔去考究咁多，將部時空裝置擺返低。

「滋滋—滋滋—」

與此同時，電腦旁邊嘅電話喺度震，有人打嚟搵佢。

「偉哥？」Mike接聽電話。

「頂你個肺！你搞乜春呀，call你兩日都唔覆機，咁大個人學人玩失蹤呀？」

呢個打過嚟「柄」人嘅叫偉哥，係平時介紹散工俾Mike做嘅蛇頭。

Mike拎開部電話，睇一睇個mon，上面顯示今日嘅日子係二月十六日。





即係話，兩個平行時空嘅時間係並行而走，佢喺另一個時空過左兩日，返到嚟自己嘅時空，時間就由二月十四變成二月十六。

「喂出聲啦屌你！」偉哥繼續鬧。

Mike馬上耍冧並解釋：「對唔住，呢兩日我屋企有啲事，所以唔得閒返工。」

「咁都要覆下機架！做人俾啲交帶好唔好？」

「唔好意思，係我唔啱。」

「頂！算啦，陣間下晝有單job，你做唔做呀？」偉哥問。

「做呀做呀。」Mike諗都唔諗就答應。

「拿，你應承得就唔好再甩底啦下，如果唔係下次我搵第二個架啦。」偉哥警告。





「知道知道，我一定準時到。」

收左線之後，Mike打左聲乞嚏。

佢全身光脫脫，淨係得條底褲，攝一攝就凍親。

佢打開櫃桶，摷兩件衫褲出嚟著，然後行出間房。

「咦？你個衰仔捨得返嚟啦咩？呢兩日躝左去邊？」佢老豆從廁所行出客廳，見到個仔就問。

「Er…呢兩日返夜呀嘛…」

「返夜？但朝早都唔見你喎，我睇你去左躝街渣掛，好心啦，你得閒就做下家務，我同你老母平時咁忙，你做仔嘅都要分擔下先得架。」





「哦，知啦…」Mike心諗佢地日日掛住打牌，梗係唔得閒啦。

「唔同你講咁多，我夠鐘返工。」

臨出門口前，佢老豆叮囑：「今晚我同你老母去打牌，堆污糟衫幾日無洗架啦，漚到臭曬，你得閒就洗左佢，同埋拖下塊地、抹下啲塵啦。」

Mike「哦」一聲話好。

老豆老母掛住打牌唔理自己，呢啲佢早已習以為常。

喺半個鐘頭之前，佢仲身處喺兩層獨立大屋，插緊鬼妹，家陣一下子返到嚟殘舊嘅唐樓，令Mike感覺有啲唔真實，就仿佛發左一場夢咁。

然而，佢心入面好清楚，知道嗰一切都唔係發夢，發生嘅所有嘢統統都係真實。

包括佢破左處呢單嘢，都係真嘅，而呢樣嘢應該都算係佢喺另一個平行時空，所得到嘅最大收穫。