魔王（完）: 負責任

「circle…」「叫番我上神。」

我找到她，但她仍然很生氣。

「對唔住。」我說：「頭先我一心只係想報仇。」

「你講得岩，我的確係唔想重啟，因為重啟之後我就會失去記憶。我知我冇本事唔開心，因為我唔可以要求你為左我而放棄重啟。我只係冇諗過我係你心目中，地位都唔及你兄弟。」她有些難過，我走近她，她後退。我衝上前一手把她擁入懷，她掙扎，但我擁得更緊。她眼眶沾濕了我衣襟：「我知我唔應該同你一齊，但我阻止唔到對你嘅感覺。但係而家不再重啟，我更加冇機會再同你一齊…」

「我頭先已經同上帝講左我同你嘅事，亦都同佢講左佢地開會之後嘅結果我會一力承擔。」她聽到我這句，嚇得呆望著我。「我暫時唔會番去住，我會留番低照顧屋企同朋友百年歸老，順便收拾番殘局。」我拖住她的手，對她微笑。「你去邊，我去邊。我唔會要你一個承擔。」她堅定地說。「我就話因為我係魔王，身份冇得改變。但你唔同，佢哋有權將你降維，剔出管理層。」我表示出對她的擔心。「如果冇得做管理層，咁就可以名正言順同你一齊。對我黎講咁唔系懲罰，係獎勵。」「其他人個個都用盡辦法提升維度，你偏偏想降維。你話呢個世界邊有人好似你咁傻？」我留戀地看著她的臉，「咪得我一個咯。」我烘近她，對準她的唇瓣吻下去……





最後一件事，就是去找回兄弟的靈魂帶他返回肉身，改回原有的壽命，帶回病房，完成後就可以恢復地球停止了的時間。我直奔地獄，一眾下屬已經在此恭候我多時。

「魔王大人！」他們六個也在，一看到我，立刻走過來圍住我。「點呀？結果如何？」「而家仲洗唔洗打呀？」「大人你同上帝傾左d咩呀？」…「點解我而家先知你地原來咁八卦架呢？」我取笑他們，「我地擔心你炸！」火王爺一臉憂心，拉住我不放。我向他們鄭重說：「我地議和左，暫時我唔會再重啟宇宙。而家有兩件事要大家幫手：第一，我會親自送周洛仁嘅靈魂返肉身，改番做之前嘅命數。你哋順便檢查下多利夫留低左咩蘇州屎。第二，我會繼續用何啟天嘅身份留喺人族直到我嘅朋友命數完結之後我先會番黎，我亦都會執番啲手尾，而你地都要用能力幫手重建番d建築。呢兩件事神族都會幫忙。」他們都興奮起來，一切將回復原狀，而且低維度時空所過的時間向來比高維度快，意味着我很快回來。「不過…」當我說不過，他們都嚴肅起來。

「有件事你哋遲早都會知道，所以我打算而家話俾大家知。我同紫龍上神破壞左規矩，我已經同上帝講咗，對於呢件事我會一力承擔。」他們被我嚇得猶如得知自己被降維一樣，不知所措。「你哋…幾時開始架？點解一直都…冇察覺嘅？」火王爺十分驚訝，「估唔到魔王大人你唔聲唔聲溝走咗紫龍上神…」「紫龍上神喎…」「估唔到魔王大人都會為左個女人做壞規矩。」神使官、監官和死神帝在說。「對唔住。」我認真說。一直沒作響的鬼判和惑使官也上前：「魔王大人，我地知道你並唔係故意，而且規矩其實只係擔心我地會因為親密關系而偏私。但係跟左你咁耐以黎，無論係你嘅想法、行事定為人，我都我相信你。」惑使官也和議：「鬼判講嘅，我好贊同。跟左你咁耐，你嘅無私同義氣，一直都改變緊我。」「你倆個真係好骨痹呀！」火王爺打了個抖，大家也笑了。「多謝你地。」我拍拍他們的肩。「你要早去早回呀大人！」「知道啦。」「唔使擔心呢度，我會搞掂。你去搵你朋友先啦。」鬼判一手推走我，我對他微笑，他也點頭，大家也對我點頭，我便去找回周洛仁。