7日交友apps奇妙體驗: 【初入交友apps】

【初入交友apps】

夜闌人靜，寒氣逼人。

新年流流，這該死的天氣，真想忽然有逆天的超能力去改變它。

媽啊，十二度！？不想我活就出句聲，香港有多久沒有這種天氣了。

其實2015年前一直都有，不過全球暖化緣故，香港人好久沒有接觸過真正的寒冷了。





或許因為太久沒接受過寒冷的洗禮，我需要躲在被窩裡瑟瑟發抖，儘管身上已經有三件衣服，兩條褲子，一雙襪子，手腳依然感到冰冷。

家人們都去了拜年，我因為不想受到三姑六婆們每年重複的(幾歲喇？讀中幾喇？有冇女朋友啊？讀書點樣啊？)之類弱智應酬問題，他們又不是真的想知道，但卻死要面子，問呢樣嗰樣，令我們這些半成年人受罪，所以我情願放棄食好西的機會，選擇自己煮晚餐草草了事。

「唉，真係好鬼悶，想揾人謦兩句欬。」食完晚餐後的我躲在被窩裡刷著whatsapp列表。

「唔...同佢唔熟，下個。」

「唔...佢大喇叭嚟，容乜易將我啲心事講曬畀其他人聽，下個。」





「唔...佢唔錯喎，就佢啦。」終於揾到個平時喺學校啱謦嘅，又唔會做大喇叭嘅朋友。

我：「喂，得唔得閒啊。」

友人A：「咩事？聽咗你講咩先答你得唔得閒。」

我：「冇，想問人謦欬啫，好鬼悶。」

友人A：「你冇去拜年咩，我見你家姐有po story㗎。」佢認識我親姐。





我：「費事畀班三姑六婆問嚟問去啦。」

友人A：「火柴人sticker OK」

我：「咁你得唔得閒啫。」

友人A：「要陪女，唔得閒，下次再揾你。」說罷佢線上中變成了目前時間了。

我：「仆街仔，重色輕友，因住扑嘢馬上風啊，祝你生仔冇屎忽添啊。」

一分鐘後，友人A再度上線。

友人A：「放心啦，我會戴套，唔使你擔心，今次真係bye，得閒再謦。」

我望住呢則信息，心中百感交集，想打一堆字發洩我嘅心情，不過其實友人A又冇做錯啲咩，同佢又係老死，所以最後send咗句「屌你老母，記住咪搞死人哋啊。」





之後又陸陸續續喺WhatsApp揾咗唔少人，不過結局嘛……你知道的。

腦海中忽然閃過一個想法，不過我一直都很抗拒，畢竟我有點避忌玩這種東西。

冇錯，就係交友apps，一個既神秘又可恨的平台，前者係因為未試過接觸，後者係因為玩咗之後，遇到各式各樣奇葩的人。

再三思考後，又問了有試過在平台玩開的朋友，終於敵不過夜間的寂寞，按了下載。

不過我自己也在手機錄音承諾，七日限期，玩夠七日一定要刪了它，絕不會沉迷下去。

Dee~ Dee~【提醒您  已經下載完畢】

終於，這趟充滿奇妙旅途的大門，被我一手推開了，一個懵懂無知的少年會遇上什麼人呢？













一打開apps，我也不打算隱藏係什麼apps，就係HMD(Heymandi)，只需輸入自己的資訊，你的想法，興趣...還提醒我用一句話來介紹自己，讓更多朋友喜歡你。

這apps有趣地方在於，無需上傳照片，意味著你可能遇到一個超級伏的人，又或者一個超好條件的人，想象空間非常大，我係屬於後者，經常想遇到一個超級好的人。

我隨便打了點什麼【自己的年齡，設定了自己的性別，還有目的：「想揾人謦欬」】

我一個菜雞，見到同年紀相約人就匹配，然後過了五分鐘，我終於匹配成功。





(名字)18c：「halo」

我：「你好」

30秒後，我見對方沒有反應。

我：「你做緊啲咩？」

然後聊天室顯示【對方已離開】

我心中百萬個【WTF】，使唔使啊，問你做緊咩啫，我滿面表示無奈，不斷苦笑著，隨後按了右上角逃生門的按鈕，也離開了那聊天室。

我純粹當做覺得係遇到奇葩，沒有再多理會，又重新投入無限匹配，刷新，匹配，刷新。





終於，第二個幸運兒出來了，今次我吸收教訓了，選擇自動打招呼先，也學第一個人那樣。

我：「halo」

17c 長傾：「Hi」

我：「新年快樂」

17c 長傾：「新年快樂」

我：「有冇去逗利是啊？」

17c 長傾：「冇啊😔」

我：「點解嘅？」

17c 長傾：「唔想見到班親戚，成日問嚟問去」喔，原來係同道中人！？

我：「咁橋嘅，我都係，自己喺屋企冇去拜年」

一分鐘後，冇任何回覆，為咗唔想令場面冷落下來，我又再度發問。

我：「咁你點解會玩呢個apps嘅？😂😂」

又過了一分鐘。

17c 長傾：「悶」一個字。

我心諗，你唔好再遲啲覆？冇興趣不如quit咗佢啦，無謂浪費大家時間，不過我冇講出口，畢竟我在這裡也是為了解悶，難得匹配到一個人，我不願這麼容易放棄機會。

我：「Er...你有冇咩想謦？」

17c 長傾：「謦？？🤨🤨」

我：「你當係【傾】字啦」

17c 長傾：「okay，其實我冇咩想傾喎」

我：「...」咁你到底上嚟做乜？？？

我：「咁你有冇拍過拖？」方才Whatsapp時朋友跟我說這話題是最熱門的，用佢嚟開話題實冇死，都可以知道個女仔咩料。

17c 長傾：「有啊  我A5」

A5！？你老吹咋，其實我唔多信，17歲A5，即係佢成個中學生涯都喺度拍拖喎。

我：「點解拍咁多次散拖嘅？」我真係想知佢咩心態，A5，對我而言，係一個遙不可及的距離

17c 長傾：「冇啊，頭三次不歡而散，之後就一直都有人追我，我咪受囉，一個拍咗半年，一個就拍咗一年半。」

我完全唔識畀反應，佢又繼續說道，可能女生在這方面真的很感性吧，有一堆說話。

17c 長傾：「其實我都唔想拍散拖㗎」

我：「奈何啲男人真係犯賤嘅」我嘗試附和她「對佢好，又唔識得珍惜。」

17c 長傾：「個個ex臨分前都同我講我好好」
「但係對唔住」

佢又發表一堆偉論：「其實好多時候都係淡」「一係出軌」「一係唔愛😖😖」

我：「明嘅，明嘅。」其實我唔撚明。

之後佢又問：「ummm……你覺得喺段感情入面係咪需要陪伴」

我：「吓？你講緊廢話？」「拍拖唔係為咗有人陪咩，唔係嘅話拍嚟做乜？」本來諗住打埋仲有啪啪啪嘅(即係性)，不過唔想令佢覺得我係個變態，都係收翻埋佢。

17c：「咁如果雙方都愛，但係其中個男仔因為佢要遲啲比賽而陪唔到女朋友咁多，而要分手，其實係咪淨係得分手呢個選擇？」

我：「點解會得翻分手呢個選擇...(睇嚟係事主親身經歷，我唔過問咁多)， 除非真係好chur，日日出街個種，24小時都要報道咁，又或者個比賽真係好重要， 但最尾都唔應該會分手囉，其實有愛就自然會有包容，係睇下可以包容到咩程度， 就咁睇落去其實好小事咋喎」

17c 長傾：「完全唔係24小時報道」「我所有嘢就哂佢」「佢覺得對我唔住」「佢覺得我值得更好」

其實睇完我覺得佢吹水多啲，不過為咗仲有得同人謦欬解悶，我選擇繼續陪佢謦落去。

我：「即係佢覺得自己唔適合你，所以提分手， 都幾自私下」我嘗試分析，理解，總結。

17c 長傾：「係😖😖」

佢又繼續：「加上佢話自己好冇安全感」「佢叫我等佢忙完先復合」「我都唔知等唔等好」「我淨知道好w t f」

我：「...」我心諗，仲等佢？等受罪咩。

我：「依家情況就好似係，佢搵把刀拮完你之後，你啲血一直喺度流，之後話會搵塊膠布幫你黐上去😂😂」

「其實你真係唔使咁犯賤，move on 感覺會好啲。」









17c 長傾：「唉，快啲鬧醒我」「我完全唔識醒」「我淨係知道自己好容易陷入愛情，但係我係真係會好愛好愛嗰個男仔」「最終搞到自己好傷」一連串四句嘢，搞到我唔知點覆佢好，不過畀人叫鬧醒佢種感覺都唔錯。

我：「咁分得手自然有問題㗎喇， 就算一齊返個問題都會喺度，只不過係你視而不見， 你試諗下一齊翻之後，經常都要喺類似呢啲問題繼續煩，點解唔搵個真係對你好嘅，你覺得投資落佢身上係正確嘅，又有機會真係發展到落去嘅人」接著「好似你個例子咁，佢明顯將你嘅地位擺得唔高，咁佢當又出現咗其他重要嘅事，咪都一樣會咁樣做，咁你何必呢？」

17c 長傾：「我真係想搵個人穩定落去」「但係次次都唔得」「我問過係咪我嘅問題」「但係佢哋個個都話係自己問題」「我會成日覺得係自己未夠成熟去拍拖」嘩，今次係五連擊。

我：「加油啦，祝你早日揾到個啱你嘅人。」其實係我想end topic，我上嚟玩交友apps唔係為咗解悶咩，點解變我幫人解決煩惱，不過呢種幫到人嘅感覺都唔差，但唔係我追求嘅。

17c 長傾：「多謝你啊，聽咗我講咁耐，又畀咁多意見我，不如換個IG？」

對我而言，IG呢啲係屬於極度私人嘅嘢，我唔會亂咁畀人㗎，但係……有女仔追蹤喎，都唔係咩壞處啫，喺佢嘅連續嘴遁之下，我輸咗畀佢。

就係咁，我獻出咗IG畀人生第一個網友，亦都開始對交友apps有新嘅體驗，同個陌生人謦欬嘅感覺都唔錯，開導人好似做聖人咁，會有滿足感。