短篇sweet故合集: 晚晚跑步都撞到同一個男仔

只要有足夠動力，呢個世界上咩都有可能發生。
就好似我呢個平時追巴士都喘氣、中學陸運會經常缺席嘅人都會下定決心跑步減肥一樣。
無計，失戀嘅力量實在太強大，前男友嘅移情別戀令我一個衝動就加入咗運動減肥大軍。
我決定將悲憤化為運動量，提升自己，要我前男友後悔。
等到我減肥成功，佢想同我復合嘅時候，我要狠狠拒絕佢。
一幻想到個賤男悔不當初、低聲下氣咁求我嘅表情，我就覺得自己充滿幹勁。
但好可惜，我太高估自己嘅決心。
我嘅熱情只維持咗兩日。
第一日因為有新鮮感，所以唔算難捱；第二日我開始覺得吃力，但都死撐落去。
今日第三日，我終於喺跑到目標路程嘅一半時停咗落嚟。




其實唔係我嘅體力撐唔到落去，而係心理上冇辦法堅持。
我本身就係一個唔鍾意運動嘅人。
我喘氣，打開電話一睇：跑咗2km。
我覺得自己跑咗好耐，乜原來先得嗰2km⋯⋯
我離開緩步徑，行埋一邊，幾乎係跌坐喺側邊嘅長櫈上。
一停落嚟，我就感覺到成個身體都散發住熱力，心跳一下一下咁好急促，但汗又唔算多。
我乜都冇做，淨係喺度發吽哣，感受住心跳一下下咁慢落嚟。
幾分鐘後，我被一股寒意激得打咗個冷震。
坐咗咁耐，啱啱運動完嘅熱一早已被秋夜嘅涼意驅走。
忽然一股悲涼湧上心頭。我個鼻一酸，喺頭頂綠樹影子嘅掩飾下開始低頭喊咗起嚟。




點解我咁黑仔俾人戴綠帽⋯⋯點解我明明下定咗決心跑步，但第三日就失敗⋯⋯
我承認自己有少少鑽牛角尖，但我被挫敗感淹沒，呢一刻根本冇辦法理智思考。
好彩而家係夜晚，呢邊冇乜人經過，我可以放肆咁喊一場。
“Time: 25 minutes; Distance: 2.0 kilometres.” 電話嘅計步app嘅女聲突然宣布，原來我頭先唔記得咗㩒暫停，佢就一直計住時間。
我喊得更加淒厲。
我唔需要你提醒我有幾廢呀⋯⋯
正當我沉浸喺自責嘅情緒時，眼前突然出現一片雪白。
我有少少嚇親，唔記得咗喊，慌張咁抬頭。
有個男仔企咗喺我面前，遞咗張紙巾俾我。
死，喊得太忘我，冇留意有其他人嚟添。




我頭先唔會喊得太大聲掛⋯⋯
一瞬間我嘅悲傷被尷尬取代，我即刻耷低頭，慌張咁接過佢嘅紙巾點頭道謝，唔敢望佢個樣。
我望住地下，淨係見到對方黑色嘅波褲同跑鞋。
好彩對方冇講啲咩，見我攞咗紙巾就跑開咗。
我望住佢嘅背影好有節奏咁一下一下越跑越遠。
原來佢都係嚟跑步嘅。
如果可以好似佢咁快就好喇⋯⋯
又一股涼意襲來。
都係快啲返屋企啦。我企起身，搓一搓手，縮埋一嚿咁行返屋企。
一邊行一邊又好奇咁諗：點解個男仔可以著咁少衫都唔凍嘅。
乞嗤！
我捽一捽個鼻。
聽日要著件厚啲嘅衫嚟先得。

第二晚，我又遇到嗰個男仔。




一開始，佢就喺我前面幾步嘅距離。雖然見唔到佢個樣，但睇個背影同跑步嘅姿勢我就知道係佢。
佢今日又係著勁少衫。我低頭望咗望自己加厚嘅T-shirt同長運動褲，忍唔住打咗個冷震。
不過我都冇得觀察個男仔太耐，因為好快佢就拋離咗我，越跑越遠，直到最後我完全睇唔到佢個背影為止。
我喘氣，感覺冷風隨住我急促嘅呼吸源源不絕咁灌入我嘅口鼻。
點解佢可以跑咁快？！我跑咗十分鐘都冇已經覺得自己就嚟死。
隔咗一陣，我意志力仲喺度同自己想停嘅心搏鬥緊。
唔可以停！我一邊喺內心用盡力氣嘶吼，一邊龜速前進。
其實我懷疑啲路人就咁行都快過我⋯⋯
然後我又再離遠見到個男仔。
我估佢已經跑完去盡頭嗰邊，所以調頭跑返嚟。
人哋已經跑完一程，我仲喺半途中苦苦掙扎緊。
五十米⋯⋯二十米⋯⋯十米⋯⋯我哋距離越嚟越近。
喺準備擦肩而過嘅時候，佢睄咗過嚟一眼。
我心中一緊，不自覺咁將自己嘅身體挺直，又忍住喘氣嘅衝動，扮平靜。
直到我哋經過咗大家，我先鬆一口氣。




死啦唔通佢認得我？
諗起自己琴晚喊到好似身處無人之境嘅模樣，我暗暗咬牙。
早知就控制下自己⋯⋯
唔驚嘅，琴晚咁黑，佢應該睇唔到我個樣。啱啱佢應該只係唔覺意咁睄咗睄我啫⋯⋯唔好咁自戀啦趙寶瑤。
接住落嚟嘅路程，我不斷同自己重複呢段說話，提醒自己唔好諗咁多。
不知不覺間，我竟然都跑到咗盡頭。
我驚喜萬分。乜咁快就到喇？！
睇嚟係我頭先諗嘢諗得太入神轉移咗注意力，所以先唔為意。
諗諗吓，我好似又唔覺啱啱跑過嚟有幾辛苦喎。
我靈光一閃。
我已經發現咗跑步唔辛苦嘅秘訣！
就係轉移視線！
我頓時充滿鬥志，開始跑回程。
諗其他嘢⋯⋯諗其他嘢⋯⋯
但一時間我又唔知要諗咩好。




正當我絞盡腦汁思考緊嘅時候，熟悉嘅人影再次向我跑過嚟。
咩料，佢又跑完一程喇？
今次佢經過我嘅時候，又睄咗我一眼。
我好肯定今次唔係咩「不經意」、「唔小心」，佢真係望我！
但我仲未嚟得切仔細探究佢嘅眼神係善意定惡意，佢就經過咗我。
因為佢嗰一眼，我嘅鬥志莫名被激起，雙腳嘅速度不自覺咁加快。
唔可以俾佢越過我！我為咗維護自己莫名其妙嘅尊嚴而下定決心。
我以為我身上會發生熱血漫畫入面描寫嗰種「主角鬥志被激起後，佢體內一股力量突然被激發，令佢意想不到咁贏過咗強大敵人」嘅情節。
殊不知一百米內，我嘅體力就透支。
一陣風掠過，個男仔仍然輕輕鬆鬆咁超過咗我。
我脆弱嘅決心亦隨即被吹散。
我咬牙。
其實我同個男仔三唔識七，佢望我應該都冇乜意思，可能純粹係覺得意外，諗緊點解有人會跑得咁慢。
但呢一刻，佢就係我假想敵。





之後連續幾晚，我都遇到個男仔。
每一次都係同佢擦肩而過之後就俾佢超越返。
久而久之，我已經由一開始嘅尷尬不甘變到自暴自棄。
是但啦，我又唔識佢，唔通佢會行埋嚟笑我咩。我自我安慰。
諗通咗之後，我就心安理得咁繼續晚晚龜速跑步。
呢一晚，我又見到個男仔。
佢今晚應該早咗嚟，因為我啱啱去到跑步嘅地方嘅時候見唔到佢，係跑咗一陣先見到佢由遠處折返。
連續幾晚嘅相遇令我開始變得留意佢呢個人。
同前幾晚一樣，佢同我擦肩而過咗。
奇怪嘅係，當佢再一次折返並超越我嘅時候，佢一直keep住喺我前幾步嘅距離。
發現到呢樣嘢嘅時候，我激動得幾乎要痛哭流涕。
跑咗咁多日，我嘅速度終於跟得上佢喇！！！
不枉我堅持咗咁耐。
我跟住佢又跑咗一小段路。
同之前一樣，我開始覺得枯燥，同埋有少少唔夠氣。
轉移視線轉移視線⋯⋯我喺心中默念。
期間嗰個男仔一直以不緊不慢嘅速度喺我前面，我嘅目光不由自主咁望落佢對腳。
佢跑得幾有節奏，唔太快又唔太慢。佢嘅鞋底因為同地面接觸而一下一下咁發出「踏、踏、踏」嘅聲音。
望望下，我雙腳都不自覺咁跟著佢嘅速度而提高、落下、再提高、又落下。
我漸漸開始同佢同步。我發現，呢個跑步節奏真係幾舒服，冇之前跑得咁辛苦。
望住個男仔，我突然諗起練琴用到嘅拍子機。
我爭啲俾自己腦海中冒出嚟嘅念頭搞到笑咗出聲。
就係咁，我一直偷偷摸摸咁跟住個男仔跑咗好長嘅一段路。
我覺得自己嘅速度好似真係快咗，亦冇咁喘。
唔知佢知唔知道我一直跟住佢呢？望住前面呢個男仔嘅背影，我心入面好奇咁諗。
由於我哋距離都幾近，跑緊嘅時候，我不斷聽到面前呢個人嘅喘息聲。
唔係好重，但每一下都勉強令我捕捉得到。
我自己都喘緊。
空氣中我同佢嘅喘息聲互相呼應，隱隱有種交纏喺一齊嘅意味。
我面一紅。
我喺度諗緊咩呀⋯⋯
跟喺人哋後面已經夠奇怪喇，而家仲要喺度亂幻想。
我覺得自己勁變態。
我嘅呼吸同腳步因為呢一下分心而亂咗。好快，喺我未嚟得切反應嘅時候，我腳下一亂，身體竟然向前仆。
我諗呢啲就係所謂嘅樂極生悲。
我驚慌咁深吸一口氣，身體準備迎接堅硬嘅地面。
希望唔好係塊面落地⋯⋯我只可以喺心入面默默祈禱。
呢個時候，前面嘅背影注意到我嘅動靜，速度奇快咁擰咗過嚟。
然後佢啱啱好接住咗失平衡向前跌嘅我。
「小心！」
一剎那溫熱嘅氣息撲鼻而來。我嘅膊頭被對方穩穩扶住。
頓時，佢手心掂住嘅地方有股熾熱升起，隔住衣物傳向我嘅皮膚，激起觸電似嘅感覺。
但我冇辦法投入咁享受呢種感覺。
「我⋯我好似拗柴⋯⋯」
我反手捉住佢嘅手臂，面容扭曲。
媽呀，要學偶像劇情節，點解唔可以學得足啲唯美啲⋯⋯我喺內心咒罵。
腳踝嘅劇烈嘅刺痛不斷傳嚟，我眼眶中有淚水打轉。

好彩而家唔算太夜，附近間跌打館仲未閂。
個男仔好好心咁孭住我一步步咁行去跌打館。
呢個動作明明好心動，但呢一刻我咩心思都冇晒。
「唔好意思呀麻煩到你。」我唔係講客氣說話，而係真心愧疚。我邊估到自己跑個步都會做出呢啲蠢事？
本身淨係自己幻想下都唔緊要，但當現實中真係搞到人嘅時候，我又變得好唔自在。
「好小事，下次小心啲喇。」佢嘅語氣冇唔耐煩，希望唔係扮。
好快，我哋就到咗跌打館。入面個醫師拍緊烏蠅。
見到我哋嘅身影，佢眼神一亮。
「嘩，整親邊度呀放佢落嚟等我睇睇。」唔知係咪錯覺，我竟然從個醫師嘅語氣中聽出幾分躍躍欲試。
我有啲想走，可惜我走唔郁。
「嗱阿妹，好小事啫。」個醫師手捧住我嘅腳踝睇咗幾眼。「一陣我幫你啪一嘢就⋯⋯」
講都未講完，佢就一嘢啪咗落去。
「呀！」一瞬間腳踝傳嚟鑽心嘅痛楚，我忍唔住尖叫。
但痛完之後，好似真係好咗。我輕輕咁郁咗郁腳踝，痛楚的確比之前減輕。
至少我而家可以自己行路喇。
出咗跌打館，一股尷尬喺我同個男仔之間蔓延。
「唔該晒你⋯⋯」我諗唔到講咩好，唯有再次向佢道謝。
「下次真係要小心啲喇。」佢笑。「你頭先跑得咁慢都拗柴，可能係俾嘢kick親。」
我勁心虛。
諗起拗柴嘅真正原因，我覺得有啲羞恥。
「係⋯係囉，頭先地下好似有嚿嘢搞到我kick咗kick。」我硬住頭皮回答。
諗諗吓又覺得自己好廢。原來我真係跑步慢到俾佢注意到⋯⋯
呢個時候，我哋經過頭先嚟嗰條路。
「咁我返去跑步喇，你快啲返屋企唞吓啦！」個男仔對我揮一揮手，然後就行向嗰條路。
「拜拜。」我都同佢揮手。
唞咗兩日，我掙扎住咁去返跑步。
我驚我再唞耐啲，之後就會懶，唔再嚟。
我行去緩步徑嘅時候，個男仔咁啱跑到我附近。
我哋視線唔小心對上。
下一刻佢向我跑過嚟。
「你隻腳冇事喇？」佢問，聲音微喘。
「係呀。」
「一齊跑吖。」佢好自然咁邀請，神情亦無半點奇怪，彷彿只係隨口一問。
我應承咗。
因為上一次跟佢跑，我的確跑得快咗。
今次我終於係光明正大咁跟著佢，而唔係好似上次咁偷偷摸摸。
佢刻意放慢咗速度，同我維持住幾米嘅距離。搞到我就算攰都唔敢停，費事將佢嘅速度拖得更慢。
睇嚟我跟佢跑都係好事，起碼咁樣我就會盡力去跑。
但好快，我就後悔。
「唔得喇我，停得未呀⋯⋯」我上氣不接下氣，腳步越嚟越重。
「挺直個身！唔好彎腰！就完㗎喇，堅持埋佢！」個男仔唔知幾時開始由帶領住我變成緊緊跟喺我後面，逼我繼續跑。
但佢已經講咗好多次「就完」⋯⋯
教練，我想返屋企呀！！！
我欲哭無淚。
後來，我每次跑步都俾個魔鬼教練跟住。
雖然好想直接唔再嚟，但我又覺得咁樣好對唔住佢。
好啦，其實係因為佢靚仔⋯⋯又大隻⋯⋯
不過，多得佢嘅魔鬼式訓練同我渴望進步嘅心，我終於可以堅持唔停咁跑完5k喇！！
多謝溫仲衡（我免費教練）。
原來佢真係長跑教練嚟。唔怪之得我進步得咁快啦（自己講）。
熟咗少少之後，我問過佢點解無啦啦教我呢個三唔識七嘅人跑步。
「嗰陣見你跑咗幾日都跑得咁慢，睇到我好辛苦，職業病發作。」
「哦⋯⋯」仲以為佢想借啲意接近我添。
話時話，究竟我嗰陣係跑得有幾差，先令佢咁頂唔順，就連放咗工都要幫人訓練⋯⋯

星期日嘅夜晚，我部電話響唔停。
即使我狂cut線，對方仍然孜孜不倦咁打過嚟。
我俾佢嘅堅持打敗，最後都係聽咗電話。
「教練，今日星期日呀，放過我啦⋯⋯我對腳好酸呀⋯⋯」我唔俾對方任何開口嘅機會，一聽電話就開始扮慘，意圖勾起佢嘅同情心。
「酸就跑多幾轉，等身體習慣下。」可惜呢招對魔鬼教練嚟講冇用，佢嘅聲音裏只有冷酷同無情。
我真係服咗佢。佢成日打電話嚟，搞到好似係我爭佢錢咁。
但其實呢一切都係我自己攞嚟，係我知道自己會偷懶，所以之前拜托過佢督促我跑步。
「我一定會係咁拖延，你到時一定要用盡所有方法逼我落街！」冇幾耐之前由我親口講出嘅說話仍然歷歷在目。如果可以回到過去，我一定會狠狠咁打自己幾巴。
扮乜嘢勤力？喺屋企hea唔開心咩？咁多口做咩呢？
「唉，」我聽到溫仲衡嘆咗口氣，睇嚟佢都覺得我好難搞。「咁啦，如果你今日肯跑，我就請你食宵夜啦。」
「我要食串燒。」我舔咗舔嘴唇。
肯跑下話，跑一百米都係跑吖，我沾沾自喜。
「成交。」佢應承得爽快。
我迫不及待咁換衫落街。行到跑步嘅地方，溫仲衡已經喺度等緊我。
佢額上有薄汗，因為佢每次喺我嚟之前就已經自己跑咗陣，等我嚟到之後就專心陪我跑。
其實呢個免費教練真係唔話得，仲要自費請我食嘢吸引我嚟跑步。
「係咪我肯跑就有宵夜食先。」熱身嘅時候，我向佢再三確認。
可能係我期待嘅表情太過明顯，佢忍唔住笑咗出嚟，嘴邊一個酒窩浮現。
「冇錯，如果你可以喺37分鐘內跑完5k，我就請你食串燒。」
？你頭先唔講嘅？？
我立即轉身就走。
「返嚟。」溫仲衡一早估到我會有咁嘅反應，喺我成功轉身之前佢就捉住咗我嘅手臂。
我憤慨咁轉頭，想鬧佢卑鄙，卻對上佢似笑非笑嘅表情。
「想去邊？」佢語氣平淡，但我從中聞到一絲威脅嘅味道。
我即刻唔敢出聲。
媽咪呀⋯⋯佢嗰種教練嘅氣場真係好得人驚⋯⋯
「開始啦。」佢彷彿冇留意我嘅情緒一樣，自顧自咁宣布。
我敢怒不敢言。
喺溫仲衡嚴厲嘅督促下，我最後辛辛苦苦咁跑完5k。
因為要趕住喺佢講嘅時間內完成5k，今次跑完我真係得返半條命。
「36分48秒。幾好吖，達到我set嘅標準。」佢若無其事咁舉錶宣布我跑步所用嘅時間。
究竟佢係咪痴線，點解跑完5k都呼吸自如，好似冇事發生咁嘅？？
「好喇，可以去食串燒喇。」佢講。
但我啱啱跑咗咁耐，而家完全唔想食嘢。
都唔知佢今日係咪一早知道我跑完會唔想食嘢，所以先至咁豪爽話會請我食宵夜。
「呢餐記住先，之後搵日請你食啦。」
聽住先啦。
最後佢陪我沿住頭先跑步嘅路徑散步，等我唞順條氣。
夜晚陣陣涼風吹過。行咗一陣，我身上嘅燥熱都漸漸散去，心情慢慢變得舒暢。
其實堅持到最後嘅話，跑完步的確好舒服。
呢個時間，路上冇其他行人，只有我哋兩個，格外安靜。
「第一次見你嘅時候，你喊緊，我遞咗張紙巾俾你，你仲記唔記得？」行行吓，溫仲衡突然開口，打破咗呢刻嘅寧靜。
乜原來佢認得係我呀？
我點咗點頭。
「其實我一直都想問你，你嗰晚點解喊嘅？後尾又見你成日鳩下鳩下咁，我仲以為自己嗰陣係認錯人。」？？？
咩鳩下鳩下，講嘢小心啲好喎。我關注點完全錯晒。
不過我最後都係如實咁同佢講。可能係秋天夜晚嘅氛圍太舒服，太容易令人放下戒心。
聽完我講之後，溫仲衡沉默咗幾秒，然後開口：「其實我以前都戴過綠帽。」
「吓？！」我語氣勁驚訝，甚至有少少失禮。
「做咩呀，好出奇咩？」佢好似被我嘅反應娛樂到。
唔係講笑，我懷疑佢係為咗安慰我而作出嚟嘅。
「你咁靚仔都戴綠帽？」
弊，唔小心講咗真心話添。

「我之前係肥仔嚟。」溫仲衡緩緩開口。
聽到呢度，我即刻上下打量佢。
又真係睇唔出喎⋯⋯
然後，溫仲衡向我娓娓道來。
原來佢同我一樣，當初都係因為前度嘅背叛而開始跑步。
「同佢分手之後，我的起心肝減肥，想威俾佢睇。而到我真係成功減肥之後，佢的確有返嚟搵我復合。」溫仲衡仍然係望住前方，一步一步咁行緊，但實際上已經陷入咗自己嘅回憶。
「咁咪好囉，即係你成功咗。」我接過話頭。
如果係我個ex嚟搵我，我一定會仰天大笑三聲，然後用盡畢生學過最尖酸刻薄嘅言語嚟攻擊佢，再狠狠拒絕。
但溫仲衡笑住搖咗搖頭。
「唔係咁㗎。」佢話，「一開始我都以為自己會好開心。但事實上，當佢搵我嘅時候，我竟然乜嘢感覺都冇晒，包括憎恨。所以我淨係好平靜咁拒絕咗佢。」
我唔明。
點解面對一個背叛過自己嘅人，溫仲衡可以做到連憎恨都冇？明明係佢被對方傷害，點解最後件事可以咁輕描淡寫就揭過咗？
「最後我終於發現，原來當時分咗手之後一直傷害緊我，令我食唔安訓唔落又充滿仇恨嘅人，係我自己。」溫仲衡以呢句說話作結，然後靜靜咁望住我，好似話中有話。
我有啲迷茫，所以冇出聲。
「俾另一半背叛，你要做嘅係同佢分手，而你已經完成咗你最應該做嘅嘢。」溫仲衡平和嘅聲音喺我耳邊響起。「至於分手之後，你做嘅任何嘢都應該只為自己而去做。」
「趙寶瑤，你要諗吓你係為咗咩而咁辛苦跑步。如果只係為咗報復你個ex，佢呢個人係咪咁值得你為佢付出努力同汗水？」
梗係唔值得啦！我幾乎係下意識就喺內心反駁，不過我冇講。
而溫仲衡都冇追問我嘅答案。
呢一個晚上秋意正濃，我同溫仲衡一齊散住步咁離開空無一人嘅緩步徑。
之後嘅日子，我仍然跟住溫仲衡跑步，間中為咗偷懶同佢鬥智鬥勇。
「教練，今晚唔好跑步喇，我哋去食串燒啦！」呢日換緊衫嘅時候，我忽然醒起我哋之間嘅串燒之約，所以難得主動打電話俾佢。
平時都係佢奪命追魂call咁催我落街跑步。
「好呀。」佢語氣輕鬆。
收線之後，我即刻除咗身上嘅運動衫，換咗件短版T裇再加短牛仔裙。
難得呢排跑步減肥有咗少少成果，梗係要狂露！
不過秋天夜晚都幾涼，我最後都係著咗件毛毛外套。
然後，我用三十分鐘化咗個妝。
話時話，平時見溫仲衡都係去跑步，每次又素顏又着運動衫又跑到出晒汗咁，我都係第一次喺見佢之前打扮。
佢最好讚下我，如果唔係我就唔同佢食。
落到樓下嘅時候，溫仲衡啱啱好喺遠處行緊過嚟。
佢今次都冇着運動衫，淨係笠咗件hoodie，下身一條黑色牛仔褲，睇落去起碼後生咗兩歲，感覺冇監督住我跑步嘅時候咁嚴厲。
但望到我呢一身打扮，佢竟然冇講啲咩，淨係同我打咗聲招呼之後就帶住我行。
行咗一陣，我終於沉唔住氣：「你冇發現我有咩唔同咗㗎咩？」
講完之後，我呆咗呆。
我講嘢個語氣咁似女朋友撒嬌嘅⋯⋯
諗到呢度，我面一紅，輕咳一聲扮唔為意。
溫仲衡都窒咗窒，然後擰過嚟望咗我一眼。
「化咗妝下話。」佢笑，「幾好睇吖。」
算你啦。

溫仲衡帶我去嗰間串燒好好食，好食到我唔記得咗節制。
「好飽呀。」大快朵頤後，我滿足咁抹咗抹嘴，身體放鬆咁向後挨。
然後我就發現出事了。
因為食食下嘢覺得熱，所以我食到半路除咗件毛毛外套搭咗喺櫈背嗰度。
呢一刻，冇咗外套嘅遮蓋，我一挨後就見到自己個肚腩好明顯咁凸起咗。
而我嗰條修腰嘅牛仔裙亦好盡責咁將我條腰箍到實一實。因為咁，我腰上嗰團肉就好似被人刻意勾勒過咁，更顯突出。
我嚇到倒吸一口氣，迅速將櫈背上嘅外套扯落嚟着返，仲拉高埋拉鏈。
好彩我發現得早，萬一一陣企起身先知就大鑊......
「你凍呀？」溫仲衡見到我一連串動作，淨係問咗句。
睇嚟佢冇發現異樣。Safe!
食完串燒，我哋準備起身走人。
「喂你喺度嘅？」一把熱情嘅女聲響起。
我抬頭望去，一個身材苗條嘅女仔企喺我哋張檯隔離，表情帶點不敢置信同一絲嘅......熱切？
當然，佢嘅視線唔係望向我，而係望向溫仲衡。
「喂你又喺度嘅？」溫仲衡表情驚訝。
「係呀，同幾個friend嚟食嘢。」
佢哋兩個喺度寒喧，而我低頭扮玩電話，想將自己嘅存在感降低。
但其實我嘅內心極唔平靜。
個女仔邊個嚟？！
「女朋友呀？」個女仔笑住望咗我一眼，我卻莫名感受到敵意。
「Friend嚟。」溫仲衡仍然係同樣嘅微笑。
個女仔表情稍為放鬆，但眼底嘅探究同懷疑依舊。
我真係好想一嘢企起身，然後充滿氣勢咁宣示主權。
但呢一個瞬間，我嘅眼神喺溫仲衡同個女仔之間遊移，然後偷偷摸咗摸自己嗰個囂張嘅肚腩。
唔通......溫仲衡鍾意呢type女仔？高高瘦瘦，個性又熱情大方。
相比之下，我呢種on99矮得得嘅女仔好似真係冇乜可取之處。
突如其來嘅自卑感充斥住我，我情緒有啲低落。
同溫仲衡傾咗幾句之後，個女仔終於行開。
而佢走咗之後，我哋都起身走人。
返屋企嘅路上，我一反常態咁有啲沉默。
喺我仲組織緊語言打算問個女仔嘅身份時，溫仲衡就開咗口：「唔好亂諗啦，只係之前嘅同事嚟。」
「我都冇諗住問......」被佢輕易就篤爆咗我內心嘅諗法，我唯有鬥氣咁否認。
「你完全唔care咩？」溫仲衡輕描淡寫咁問咗一句，仍然係眼望前方，彷彿只係隨口一問。
我嘅心臟不由自主咁狂跳。
佢係咪試探緊我？！
沉默思索咗幾秒，我決定掉返個波俾佢。
「你...你好care我care唔care咩？」頂，搞到好似玩急口令咁。
「Care呀。」佢好快就答，又若無其事咁睄咗我一眼。
我呆咗呆，佢咁講究竟係咪我諗嗰個意思……
呢個時候，我哋已經行到馬路邊，而綠色公仔嘅燈就喺我哋上方閃下閃下。
「我哋要快啲。」溫仲衡吐出一句，然後就好自然咁拖起我隻手，快步走向馬路對面。
於是，我就喺一種類似暈眩嘅狀態下迷迷糊糊咁同佢一齊過咗馬路。
過咗馬路之後，溫仲衡冇鬆開到手。
我偷偷哋望咗佢一眼，發現佢耳仔有少少紅。
「望前面啦。」佢唔自在咁講，但又要扮冷靜。
隻手仍然冇鬆開到。
咁我梗係都唔放手啦，嘻嘻！