短篇sweet故合集: 偵探x騙子
八月份嘅中午，淺藍色嘅天空純淨得好似被仔細擦洗過一樣。烈日當空，艷陽明晃晃咁高掛喺天上，散發住穿透機場採光玻璃窗嘅熾熱。
好彩機場入面夠冷氣咋。周汝程拖住行李喼心諗。
佢踩住高踭鞋，好似行catwalk咁行到機場門口，玻璃自動門應聲打開。
一陣悶熱潮濕嘅空氣隨即撲面而來，空氣中夾雜住汽車廢氣嘅混濁。
周汝程皺眉，快步行到冇幾遠嘅馬路旁。高踭鞋敲打地面所發出嘅「咯咯」聲為佢嘅心情添上咗幾分煩躁。
佢頂住太陽毒辣嘅目光，抬手截咗架的士。
周汝程坐入充滿陣陣涼意嘅車廂後不禁嘆咗口氣。
L市嘅夏天果然唔惹小。
到咗自己一早book好嘅酒店門口，佢先算真真正正咁鬆一口氣。
一行入去酒店就被冷氣包圍嘅感覺實在太爽喇。佢感歎。
酒店內嘅香薰味道亦令佢心情舒暢。
酒店行李員自動自覺咁行過嚟幫佢拎行李，一路跟住佢行到酒店櫃檯，然後低眉順眼咁企喺一邊等佢check in。
Check in完入𨋢，行李員好盡責咁眼觀鼻鼻觀心，企得好直，一句聲都冇出。
到目前為止，周汝程大致上對一切都好滿意。
如果部𨋢都有埋香薰就好喇。佢皺一皺個鼻，心諗。
隨著「叮」嘅一聲，升降機已經到咗佢間房嘅樓層。
「請跟我嚟呢邊吖。」行李員為佢帶路。
入到房，周汝程環視四周。
間房俾想像中寬敞。一入門口左手邊係有磨砂玻璃牆嘅浴室，房間中央係一張加大雙人床，房最入面有張大書枱，隔離係一個衣櫃。
果然係一分錢一分貨，好彩我冇貪平揀啲低評分酒店。周汝程心諗。
喺L市呢個咁平民嘅地方有呢種質素嘅酒店的確係好唔錯。
周汝程滿意咁點頭，佢從行李員手中接過行李喼，隨手放喺床尾，然後喺手袋攞咗個銀包出嚟，摷咗張五百蚊遞俾行李員。
佢感覺行李員本來公式化嘅微笑呢一刻終於變得真誠。
行李員接過貼士後向佢道謝，簡單介紹咗幾句注意事項就準備離開。
周汝程叫住咗佢。
「唔好意思呀，請問你哋嘅餐廳喺邊呀？」經過成個朝早嘅奔波，佢感覺自己飢腸轆轆。
「餐廳喺一樓。」對方禮貌嘅笑容不改，令人無可挑剔。
「好，唔該晒。」
行李員走咗之後，周汝程隨意踢走對高踭鞋，用力一坐就坐咗喺床上。
床墊彈力十足，瞓上去一定好舒服。
佢咁樣諗嘅同時，實際上的確真係咁樣做咗。
結果佢一瞓就瞓到夜晚七點。
周汝程係餓醒嘅。
房入面啲燈一直開住。佢一擘大眼，雙眼就被刺得狂標眼水。
隔咗一陣佢終於適應咗房內嘅光線，佢再次張開眼，然後坐起身。
「咕嚕咕嚕」嘅聲音由佢個肚傳嚟。
周汝程呆坐咗一陣，起身行去書檯。上面擺咗張餐廳客房服務嘅餐單。
佢懶得落餐廳。
佢拎起餐單，隨意掃咗上面嘅字一眼。
然後忽然僵住，視線停留喺餐單上面某一點，久久不能移開。
周汝程book酒店嘅時候睇過簡介，呢間酒店總共七層，得一間餐廳。
餐單上面有寫餐廳嘅位置。
喺二樓。
佢快速回想今日入住時嘅情況。
「餐廳喺一樓。」佢好清楚記得跟著佢上嚟嘅行李員係咁樣答佢。
唔通個行李員記錯咗？但酒店人員點可能會記錯，呢間酒店又唔係大。
周汝程再仔細諗咗諗有冇其他奇怪嘅細節。
然後佢記起今日搭𨋢上嚟嘅時候，自己其實隱約聞到𨋢入面有種奇怪味道⋯⋯
係咩呢⋯⋯佢苦苦思索。
過咗幾秒，周汝程瞪大雙眼。
係煙味！佢心跳加速。
為咗照顧客人嘅感受，一般酒店都唔容許酒店人員身上有煙草味或者其他怪味。
而嗰個行李員身上有煙味。
呢間酒店算係L市最好嘅一間，規矩亦好嚴謹，員工理應唔會犯呢啲錯。
除非⋯⋯
一股寒意湧上心頭。
嗰個行李員可能根本唔係酒店員工嚟！
佢仲俾咗五百蚊貼士人⋯⋯
我堂堂一個偵探，竟然咁輕易就俾人呃咗五百蚊⋯⋯周汝程崩潰抱頭。
其實周汝程之前已經聽講過L市有啲人會混入酒店扮員工呃遊客貼士，但佢冇諗到連市內最高級嘅酒店都有呢種情況。
發現自己俾人呃咗之後，佢連飯都冇心情食。
佢決定去附近行吓視察環境。
始終佢今次山長水遠嚟L市唔係為咗旅行，而係有案要查。
成件事要由半年前講起。
半年前嘅某一日，周汝程嘅一個朋友突然喺signal搵佢。
「我懷疑我老公之前同我一齊去旅行嘅時候識咗個女人，仲俾個女人搶錢。」
原來上年十二月，呢個朋友同老公一齊去咗L市旅行，喺佢哋住嘅酒店識咗一個主動同佢哋搭訕嘅酒店女員工，佢話可以推介L市好玩嘅地方俾佢哋，仲好貼心咁做咗佢哋嘅導遊，陪佢哋去咗啲景點。
但遊覽期間，呢個朋友感受到佢老公同個女員工之間嘅關係有變化，好似有啲曖昧。
後尾佢同老公一齊喺房休息嘅時候，對方總係搵藉口出去。
佢懷疑丈夫係去搵個女員工。
到咗旅程嘅最後一日，佢老公突然臉上帶住傷痕咁返咗嚟房。
「做咩事傷成咁？」朋友問。
但佢老公只推說係自己跌親。與此同時，佢身上嘅現金不翼而飛，但佢解釋只係跌咗。
返返嚟之後，出於某種直覺，呢個朋友偷偷哋攞咗老公嘅銀行卡去睇餘額，發現餘額係零。
佢質問佢老公，但對方死都唔肯講。
佢懷疑呢件事同個女人有關，但佢冇證據，丈夫亦唔肯透露任何嘢。
於是佢就搵周汝程，希望佢可以幫手嚟L市調查。
周汝程而家住緊呢間酒店並唔係當時嗰間，而係喺附近。
佢暫時未諗好下一步，亦唔知個女人咩樣，所以今次嚟係想視察一下環境先而唔直接去嗰間酒店，費事留得太耐打草驚蛇。
呢單係自從周汝程喺師父手上接手偵探社之後嘅第一單案，亦係佢第一次獨自調查，所以佢一定要好謹慎。
喺呢度做酒店員工，個女人好可能本身就係L市人。嚟L市之前，周汝程係咁樣諗嘅。
但經過今日，佢諗法有啲唔同。
周汝程諗起今日扮行李員嘅男人。
個女人好可能同佢一樣都係扮酒店員工嚟呃錢，只不過個男人係呃貼士，而個女人就喺男人手上呃錢。
甚至乎，佢哋好可能係同黨嚟，只不過大家分頭去唔同酒店行騙。
諗到呢度，周汝程喺行李喼度攞咗需要嘅用具，然後出咗房門。
冇辦法喇，而家咁嘅情況佢唔可以太小心翼翼。
佢一定要快啲搵到呢個男騙子先。萬一佢哋呃得七七八八之後轉場，就好難再搵到佢哋。
好彩佢記得個男人咩樣。
周汝程急急忙忙咁喺酒店入面搵咗一圈，但唔見人。
正當佢打算放棄，去外面搵嘅時候，佢突然靈機一觸。
個男人係食煙嘅，佢呢刻會唔會只係喺後樓梯？
始終而家先夜晚七點幾，正正係住客check in嘅高峰期。人一多，酒店大堂就更亂，佢冇可能放棄呢個絕佳機會。
所以如果酒店其他地方都唔見佢，佢好可能只係去咗食煙。
周汝程果斷咁搭𨋢上七樓，然後行去後樓梯，由上而下逐層逐層咁搵。
終於，喺行緊落去三樓嘅時候，佢聞到煙味。
佢加速行落去。
冇人，但煙味變得更濃。
周汝程掩鼻，放輕腳步再行落去。佢喺三樓同二樓間嘅轉角位停低，探頭望落去。
一個男人喺二樓食緊煙，佢嘅側面向住周汝程，低頭㩒緊電話。
男人身穿黑色短袖T恤，下身卻係正式嘅西裝長褲。佢腳邊有一件一睇就知係俾人隨意掉落地下嘅酒店制服。
周汝程瞳孔放大。就係呢個人！
佢一邊喺腦中綵排自己一陣嘅行動，一邊將手探入衫袋摸出一舊硬物緊緊捉住，然後以迅雷不及掩耳嘅速度衝落樓梯，並將手上嘅硬物一嘢扣落去男人嘅手腕。
一切都係咁行雲流水，對方幾乎冇任何反抗嘅機會。
等陸子毅反應過嚟嘅時候，佢發現手腕上係一個情趣手銬。
仲要係好刺眼嘅粉紅豹紋花色。
佢呆咗咁低頭望住自己嘅手腕幾秒，然後驚駭咁抬頭，發現面前嘅人係下晝嗰條一俾就俾咗五百蚊貼士嘅水魚。
而呢一刻，呢條水魚正施施然咁將手銬嘅另一端扣咗喺自己潔白纖細嘅手腕上，然後推開一旁牆上嘅通風窗，豪不猶豫咁將手上嘅鎖匙拋咗出去。
「你做乜鳩呀？！」陸子毅忘記咗自己呢刻扮演緊嘅角色，驚恐咁爆咗句粗口。
「你根本唔係酒店員工，只係一個混入嚟呃錢嘅騙子。」周汝程好淡定咁講咗一句。
陸子毅心一跳，第一反應係想逃跑。好彩佢仲記得手上係被扣住手銬，所以冇郁到。
佢知道自己已經敗露，再辯解都冇用，所以佢決定同面前嘅人談判。
「小姐，一係咁，我俾返五百——唔係，我俾返一千你，你放咗我啦好嗎？」陸子毅擠出微笑。
周汝程先唔會輕易放過呢個人。佢冇回應，只係從衫袋拎咗部電話出嚟，對住男人個樣「咔嚓」一聲影咗張相，然後喺電話㩒咗幾㩒。
「喂！」陸子毅完全遮唔切自己塊面。「大佬，唔好咁啦，我都係第一次咁樣混入酒店搵食㗎咋，我又冇傷害到你，嗰五百蚊又係你自己俾我嘅，冇必要咁樣下話。」
周汝程唔信佢講嘅嘢。「哈，個個俾人捉到都話係第一次㗎啦。」
「我講真㗎！」陸子毅舉起冇被扣住嘅手對天發誓。「我係之前喺另一間酒店見到人用呢招，所以先參考佢試吓咋。」
周汝程一下子就捉到佢講呢句說話嘅重點。
「另一間酒店？邊間酒店？嗰個咩人嚟？」佢急忙追問。
「就附近嗰間咋嘛，田園酒店。」陸子毅俾周汝程扣住咗又影埋相，佢都知自己走唔甩，所以乖乖哋咁有問必答，希望對方之後可以大發慈悲放咗佢。
「不過話時話，你係咪差婆嚟㗎，咁多嘢問嘅。」佢忍唔住多口問咗句。
「收聲。」周汝程兇狠咁睥住佢，但睇落其實一啲都冇威懾力。
不過陸子毅仍然識趣咁唔再出聲。
而周汝程心中另有打算。
田園酒店正正係佢朋友單案發生嘅地方。
佢仔細打量面前嘅男人，睇對方講嘢嘅神情唔似講大話，佢有可能真係目擊到嗰個酒店女員工或者同黨作案，所以先模仿佢哋行騙。
如果係咁嘅話，就更加唔可以放呢個男人走喇。
朋友冇酒店女員工嘅相或者資料可以提供，有呢個男人喺度，周汝程可以更輕易咁搵到個酒店女員工出嚟。
「小姐？」正思索著，男人試探性咁出聲。「你問嘅嘢我都答咗你啦，我可唔可以賠錢俾你你放我走呀？而家呢個時段有好多水——住客入嚟㗎。」
「你仲想去呃其他人？！」周汝程狠狠踢咗佢小腿一腳。
「我屌！」陸子毅捂住自己被踢中嘅地方，痛得齜牙咧嘴。
「跟我返房，我仲有嘢要問你。」呢度始終唔係一個好嘅問話地方。周汝程無視對方嘅表情，自顧自咁扯住佢行前。
陸子毅俾佢咁樣一扯，下意識同佢鬥力。
周汝程停低，轉頭倔住佢。
「嗱，我警告你呀吓，我已經影咗你相，再將你張相send咗俾我朋友㗎喇，你再唔乖乖哋合作嘅話我而家就可以打俾酒店，同佢哋講我捉到個扮行李員嘅騙子。」佢作勢打開通訊錄。
「等、等等先⋯⋯我冇話唔同你合作⋯⋯」陸子毅淆底。
「咁行啦。」周汝程唔再同呢個人多講，徑自往前走。
「喂你行慢啲啦！」陸子毅俾佢突然嘅動作搞到爭啲kick親。「女仔之家咁大力嘅⋯⋯」佢低聲抱怨。
一路上佢哋同幾個住客擦肩而過，每個人都用奇怪嘅目光望住佢哋兩個⋯⋯之間嘅豹紋情趣手銬。
周汝程目無表情，好似冇發現有咩唔妥咁，而陸子毅就覺得自己已經社會性死亡。
以前細個當眾被人識穿係騙子嘅時候都冇而家咁尷尬⋯⋯
入到房，佢終於忍唔到開口。
「我哋真係要一直扣住呢舊嘢呀？會唔會太張揚⋯⋯」佢記得鎖匙已經被掉咗出街。
聽到佢嘅說話，周汝程閂好門，淡淡咁望咗佢一眼，然後喺衫袋摷咗條鎖匙出嚟，插入鎖窿位一扭，手銬就打開咗。
陸子毅目瞪口呆。
「你唔係⋯⋯」你唔係掉咗條鎖匙喇咩？！
「哦，」周汝程打斷佢，「我頭先掉咗我中學嘅locker鎖匙落街，有問題？」
「冇、冇問題⋯⋯」陸子毅暗暗咬牙，早知係咁，頭先就應該用武力夾硬搶佢衫袋入面啲嘢check吓先⋯⋯
見到佢不忿嘅表情，周汝程偷笑。
想同我鬥？下世啦。
我假假哋都係個偵探嚟㗎。
入到房，周汝程坐喺床邊，而陸子毅就坐喺張床隔離嘅細梳化上。
經過一番唔太和平嘅審問，周汝程終於對面前呢個騙子有所了解。
陸子毅，G市人，職業係騙子。平時會去唔同地方行騙，目前住喺L市田園酒店。
人生成就係俾人拉過三次但因為冇證據所以俾人放返出嚟。
講到呢度嘅時候，陸子毅嘅表情好似仲有啲自豪。
周汝程反咗個白眼。「唔緊要，我可以令你有證據咁俾人拉第四次。」
而同周汝程嘅猜測一樣，陸子毅喺田園酒店目擊嘅假酒店員工就係佢要搵嗰個女人。
「以我觀察，個女人應該係專勾引有婦之夫嚟呃錢嘅。」陸子毅好有信心咁講。
周汝程冇表示同意或者反對，只係安靜咁聽。
見佢唔出聲，陸子毅講得更起勁。
「嗱，target人夫聽落去好似好冒險，但如果成功得手，人夫係好容易拿捏嘅，因為佢哋顧忌個老婆。只要掌握住佢哋出軌嘅證據，就算你直接搶佢哋錢佢哋都唔敢出聲啦。」
周汝程突然諗起佢朋友話佢老公滿身傷痕咁返嚟。唔通真係搶錢？
佢向後仰，身體被柔軟嘅床接住。
周汝程望住天花板，陷入思考。
佢一開始嘅計劃係自己一個去田園酒店，喺嗰度高調咁曬自己有錢，睇吓個女員工會唔會主動接觸佢。但如果個女員工嘅目標真係有伴侶嘅男人，佢自己一個去咪得個吉？
諗到呢度，周汝程猛地坐起身，目光轉向陸子毅。
「你而家住緊田園酒店？」佢向陸子毅確認。
察覺到周汝程冒住光嘅眼神，陸子毅有種不詳預感。
「係呀，做⋯做咩呀？」佢硬住頭皮咁講。
「我之後呢一個星期要同你一齊住，方便我查案！」果然，周汝程冇辜負到佢嘅擔憂，一臉興奮咁宣布。
「吓？！」雖然已經從對方之前嘅言行隱約估到佢嚟L市嘅目的，但陸子毅仍然俾佢嘅要求嚇親。
「唔好玩啦小姐，你查案關我咩事啫，你搵你啲同事啦。」佢唔得閒陪呢啲一俾就俾五百蚊貼士嘅大小姐玩偵探遊戲呀。
周汝程都估到佢會拒絕。佢企起身行去床尾，踎低打開自己個行李喼喺度唔知摷咩。
周汝程身上著住一件短版T裇。喺佢專心搵緊嘢嘅同時，T裇嘅下擺亦隨住佢踎低烏向前嘅嘅動作往上揚，露出腰間一片雪白嘅肌膚。
坐喺不遠處嘅陸子毅見到呢個情景，好唔自然咁咳咗聲，然後轉頭望向落地窗外嘅景色。
「搵到喇！」將自己個喼摷到一片混亂之後，周汝程終於從中攞出一疊白色卡片。
佢抽起其中一張，行去陸子毅隔離。
「嗱，呢張係我卡片。我係偵探嚟㗎咋，我唔似警察咁可以想點就點，想搵人就搵人，所以真係好需要你幫我手。」一日最衰都係師父。周汝程心諗。
兩個月前，周汝程嘅師父突然間話要退休環遊世界，然後掉低間偵探社俾周汝程之後就唔見咗人。周汝程用盡方法都搵唔到佢。
嗰陣周汝程突然接手偵探社，偵探社得返佢一個，佢處於方寸大亂嘅狀態。
呢排好唔容易請到個part time嚟做佢助手，周汝程將偵探社啲嘢交俾佢之後先放心過嚟L市。
「吓？乜原來你唔係警察嚟㗎？」陸子毅從梳化上趷起身。既然唔係警察，佢覺得自己其實都夠膽拒絕嘅。
「我唔係警察，但我係一個熱心舉報罪案嘅好市民。」周汝程瞇眼一笑，對住佢搖咗搖手中嘅電話。
陸子毅坐返低。
「但係⋯我酒店book到聽日咋⋯⋯我都冇錢續住。」佢垂死掙扎。
「錢呢方面你唔使擔心，呢一個星期嘅食宿我包晒！完咗之後我會delete你張相，亦唔會去告發你。」偷望咗一眼陸子毅嘅表情，佢又開口：「如果最後搵到個女員工嘅罪證，我仲會將破案得返嚟嘅錢分返三成俾你。咁樣得唔得？」不得不承認，周汝程提出嘅條件對於一個收入不定嘅騙子嚟講好誘人。
就算最後破唔到案，至少佢完全唔使擔心呢個星期嘅食宿，甚至有機會擠啲時間出嚟做「自己生意」添。
喺陸子毅考慮緊嘅時候，周汝程一直耐心等候，冇開口催佢。
最後，陸子毅深吸一口氣。
「成交！」
周汝程同陸子毅用咗一個鐘討論查案計劃。
等到傾好晒一切，已經差唔多九點喇。
「咕嚕咕嚕——」一聲異響從周汝程嘅肚入面傳嚟。頭先同陸子毅傾得太投入，忘記咗饑餓感，而家搞掂好晒，佢先開始覺得餓。
「行啦，落去食嘢。」陸子毅面不改色咁企起身，「今餐我嘅。」
周汝程跟住佢行咗出房。
出咗酒店，行多二百米左右就係一條小食街。
暑假嘅夜晚特別多人，十分熱鬧。未行到去，唔同攤檔食物嘅香氣已經傳嚟，周汝程嘅飢餓感再度被勾起。
佢冇理會咩矜唔矜持，一行到入口就衝向左邊一個賣臭豆腐嘅攤檔。
行到埋去，周汝程只感覺自己口水都流晒出嚟。
攤檔上擺放住唔同口味嘅臭豆腐圖片，款式琳琅滿目，令人眼花撩亂。
攤位後面係一個大叔，著住白色背心，頸上搭住一條毛巾。炸豆腐時，油煙熱氣將佢塊面熏得通紅，額上亦有點點汗珠。
大叔間唔中會用毛巾隨意抹一抹汗，但好快就繼續手上炸豆腐嘅動作， 幾乎一刻都冇停過。
「識食喎。」陸子毅呢個時候跟咗上嚟，企咗喺周汝程隔離。「試吓佢哋個蒜茸臭豆腐啦，正㗎。」
周汝程點頭。
當熱辣辣嘅臭豆腐終於到咗周汝程手上，佢已經餓到雙眼冒青光。
金黃酥脆嘅臭豆腐靜靜瞓咗喺周汝程手上嘅紙盒入面，不斷冒出熱騰騰嘅白煙。臭豆腐表面被灑上蔥花，又被淋上特製嘅蒜茸辣醬，散發出誘人香氣。
周汝程攞住攤檔提供嘅竹籤，迫不及待咁拮咗一嚿，吹兩吹就擺入口。
熱燙嘅湯汁隨住周汝程嘅咀嚼而喺佢口腔內爆開，香辣濃郁。周汝程瞇起雙眼，一臉滿足。
可惜佢享受咗唔夠一秒，表情又突然變得痛苦。
好熱！
陸子毅默默喺隔離望住呢一切發生。見周汝程咁辛苦，佢諗咗諗，就喺褲袋摷咗張紙巾出嚟，攤開放喺自己手心。
然後佢將呢隻手放喺周汝程嘴邊。
「Lur落嚟啦。」佢笑。佢份人不拘小節，唔太介意污唔污糟，淨係想幫周汝程。
「唔唔！」周汝程雖然已經被熾熱嘅湯汁辣到講唔到嘢，狂標眼水，但佢仍然瘋狂搖頭。
擺咗落口嘅嘢，絕對唔可以lur返出嚟！呢個係周汝程嘅信念。
佢一邊諗一邊擘大口，不斷吸氣同呼氣，又用手喺嘴邊狂撥。
陸子毅見佢咁堅持，唯有收返手。
佢收好紙巾，改為撟手，睇戲咁睇周汝程嘅狼狽樣。
佢咁嘅樣究竟點做到偵探㗎？陸子毅心諗。
食完嘢之後，陸子毅同周汝程交換咗contact，約定第二日會合。
第二日，周汝程搞好check out手續之後就拖住行李喼行出酒店。陸子毅已經喺門口等緊佢。
佢急急腳咁行過去，對方接過佢嘅行李，帶佢去咗一架跑車度。
「你喺邊度搵到架咁嘅車㗎？」周汝程望一望部跑車嘅外觀。紅色流線形嘅車身喺陽光嘅照耀下閃閃發光，十分高調。
乜而家做騙子咁好搵㗎咩？
「租返嚟㗎，做戲做全套吖嘛。」琴晚周汝程已經同陸子毅傾咗佢哋計劃嘅大方向：扮有錢人！
其實都唔完全係扮嘅，周汝程本身家境的確唔差。
但呢一刻，周汝程低頭望住自己成身名牌嘅打扮，有啲唔自在。
佢有好多名牌嘢，但從來冇試過好似而家咁一次過堆晒喺身。
陸子毅琴晚反覆要求佢今日咁樣著。
「我哋得一星期時間，要去到盡。萬一個女人後日就走咁就仆街喇，我哋一定要盡快吸引佢嘅注意力。」陸子毅琴晚係咁講嘅。
而陸子毅自己就著得好普通。
呢樣都係佢哋一早溝通好嘅。
佢幫周汝程放好行李之後，仔細咁打量佢嘅打扮。
然後佢開口：「呢套掂呀，如果我見到你呢種打扮睇落又有錢又冇腦嘅人，一定會主動接觸你。」陸子毅面露讚賞。
周汝程都唔知應唔應該多謝佢好。
陸子毅冇理佢嘅反應，行前為佢拉開車門，仲懶紳士咁示意佢上車。
周汝程毫不客氣咁坐咗上去，陸子毅亦拉開另一邊車門坐上去。
跑車揚塵而去。
最近，田園酒店嚟咗一對好引人注目嘅住客夫婦，佢哋住喺1105號房。
聽講個老婆對老公好差，自己着晒名牌，但老公淨係著普通衫。
聽講個老公先係真正嘅有錢人，只不過為人低調，唔知點解會娶咗個咁嘅老婆。
聽講個個酒店員工都爭住去1105號房，因為嗰對夫婦出手闊綽。
胡彩欣第無數次經過1105嘅時候，裏面傳嚟咗一把憤怒尖銳嘅聲音。
「陸子毅你去死啦！」
房門被打開，一個男人俾人由裏面推咗出嚟，隨即房門被重重關上。
四目交投，男人對住佢尷尬又抱歉咁一笑。
計劃進行得比想像中順利。 可能因為知道陸子毅同周汝程「感情唔好」，酒店女員工對陸子毅特別熱情。
短短兩日，佢哋已經約好單獨一齊去玩。
早前經過周汝程同陸子毅嘅調查，佢哋知道咗個女員工嘅名叫胡彩欣，而且佢真係田園酒店嘅員工嚟。
喺胡彩欣嘅主動同陸子毅嘅迎合下，佢哋兩個打得火熱。
相比之下，周汝程就清閒得多，只需要扮演一個脾氣暴躁又大洗嘅妻子。
不過，佢都唔打算老奉靠哂陸子毅。
好似今日咁，陸子毅同胡彩欣出咗去，周汝程就喺酒店周圍走，向酒店其他員工打探消息。
多得佢嘅有錢女人設，啲員工都好願意同佢吹水。
而喺周汝程忙住周圍收風嘅時候，陸子毅同胡彩欣喺L市嘅主題樂園玩緊。
其實度度嘅主題樂園都差唔多，不過陸子毅仍然主動提出想過嚟玩。
陸子毅同胡彩欣就好似真正嘅情侶一樣咁喺樂園度過咗一整日。
「呀！」一聲驚呼，胡彩欣唔小心俾地下kick咗kick。佢即刻捉住陸子毅嘅手臂，對方亦穩穩咁扶住佢。
「冇事吖嘛？ 」陸子毅好紳士咁問。
胡彩欣含羞帶怯咁搖頭，慌忙鬆手，臉上一絲紅暈浮現，惹人憐惜。
陸子毅點點頭,然後繼續行。
佢突然諗起周汝程。
如果係佢kick親，呢一刻佢應該係吱吱喳喳咁猛咒罵個地下。
陸子毅嘴角不自覺咁浮現一絲笑容。
返到酒店門口，胡彩欣即刻同陸子毅分開行。
但行咗幾步，佢又突然回頭，對陸子毅露出個俏皮嘅笑容。
「唔好話俾人知！」呢個年輕貌美嘅女子做咗個口型。
陸子毅回應咗一個羞澀嘅笑。
一返到房，陸子毅涼都未沖就攤喺床。
「好攰呀……」
周汝程喺浴室抹住頭髮咁行出嚟，臉上敷咗塊面膜。
「偷完情返嚟喇？」佢行去陸子毅隔離嗰張床坐低。
陸子毅坐起身，同佢分享今日嘅事。
「你知唔知我今日爭啲要出賣色相呀，條女扮kick親一嘢撲咗埋嚟⋯⋯」諗起今日嘅事，陸子毅心有餘悸。
但周汝程笑得好開心，完全唔可憐佢。
「你仲笑？唉，本身聽你之前講話想去主題樂園，今日仲特登去探路，諗住之後帶你去，而家都係算啦。」陸子毅聳一聳肩。
「我要去！」聽到佢咁講，周汝程即刻收起幸災樂禍嘅表情。
陸子毅其實都只係講笑，唔會真係唔帶佢去。
不過喺去玩之前，佢哋要傾咗正經嘢先。
「今日同佢出去嘅時候，佢成日借啲意問我個人嘢，又打聽你嘅事。」陸子毅講。
「咁應該真係開始對你有興趣喇。」周汝程思考。
「所以下一步⋯⋯」陸子毅有啲猶豫。本身佢哋認為胡彩欣最後會透過勒索嘅方式搶一筆大金額，所以佢哋之後嘅計劃係加快進度，表現得好迷戀胡彩欣，同佢確立關係，等佢快啲進行勒索嘅最後一步，咁佢哋就可以偷偷錄低證據，迅速破案。
呢個plan係得到雙方共識嘅，但呢一刻，陸子毅又有少少猶豫。佢都講唔清自己猶豫啲咩，不過佢都知呢個係最好嘅方法。
「唔使急住嘅，你哋進度比想像中快，你而家對佢嚟講係一條肥美食硬嘅水魚，所以至少喺搞掂你之前，佢一定唔會走。」周汝程講。
陸子毅莫名奇妙咁鬆一口氣。
雖然佢理智上知道，而家係越快破案越好，咁佢就可以分到錢，又唔使俾周汝程威脅住陪佢查案。
其實今日去主題樂園玩嘅時候，胡彩欣同陸子毅講咗自己第二日放假。佢暗示陸子毅約佢，但陸子毅無動於衷。
因為佢已經諗好要趁呢個機會同周汝程去玩。
「我哋聽日就去玩啦。」陸子毅邀請周汝程。「胡彩欣聽日唔喺度。」
「點解你講啲嘢搞到好似我先係第三者咁嘅。」周汝程笑，但最後都係應承咗。
第二朝一早，周汝程就俾陸子毅嘈醒咗。
「快啲起身啦！」陸子毅情緒高漲咁催促。
周汝程皺眉，用被笠住自己個頭，然後轉身繼續瞓。
「喂！」陸子毅行近周汝程張床。對方包到自己實一實，好似一隻蟲蛹咁。
陸子毅用力咁拍咗拍，但周汝程紋絲不動。於是佢出手扯周汝程張被，但對方亦都用力抆住唔俾佢搶被。
「咁大力嘅你？！」陸子毅覺得好吃力，周汝程係佢見過最大力嘅女仔。
為咗保護作為男性嘅尊嚴，佢咬牙，出盡九牛二虎之力，想搶周汝程嘅被。
一拉一扯間，陸子毅一個唔小心，仆咗向周汝程。
周汝程一直俾厚厚嘅棉被包圍住，所以睇唔到發生咩事，佢淨係突然feel到一嚿重物壓咗落嚟。
佢即刻意識到係陸子毅。
「呀！」佢尖叫。「你好重呀！起身呀！」佢用盡全力咁想推開陸子毅，但唔成功。
而陸子毅趁機扯走咗佢張被。
冇咗棉被，室內冷氣嘅涼意襲來。周汝程打咗個冷震，不滿咁坐起身，然後死死地氣咁去刷牙。
九點鐘，佢哋兩個出咗酒店，揸車去主題樂園。
一路上，路人都將目光投向佢哋呢架咁高調嘅跑車。陸子毅成日出去，一早就習慣咗人哋嘅視線，而周汝程就好似第一次坐呢架車嗰陣咁，低頭用手遮住自己塊面。
好快，佢哋就到咗目的地。
「我帶你去玩呢度嗰個過山車吖，勁正呀！」明明陸子毅琴日先嚟過，但佢嘅表現興奮到好似第一次嚟咁。
其實周汝程唔係好敢玩過山車，不過佢覺得一場嚟到，乜都唔敢玩太掃興。見到陸子毅咁興高采烈，佢都被感染，糊里糊塗咁就跟住一齊排過山車。
直到佢坐到上去，扣好安全帶，佢終於開始淆。
「⋯⋯」佢身體坐得好僵硬，完全唔敢講嘢。
「你驚㗎？」陸子毅擰過嚟見到佢蒼白嘅面色，呢刻佢先知道原來周汝程驚過山車。
明明頭先佢表現得好冷靜。
陸子毅仲想講嘢，但呢個時候，樂園員工輕輕㩒咗個制，然後佢哋坐緊嘅過山車就猝不及防咁衝咗出去。
「呀呀呀！」尖叫聲此起彼落，周汝程緊緊皺住眉，連叫都叫唔出。
過山車刺激嘅衝刺旋轉令佢覺得自己好似就嚟要死喺呢度。
好唔容易捱到完結，周汝程從座位離開時，對腳已經發軟。
一行出外面，佢就忍唔住衝向垃圾桶，然後扶住垃圾桶彎腰，一嘔嘔咗十幾秒。
陸子毅乜都冇講，淨係一下一下咁掃佢嘅背。
嘔完終於舒服啲。周汝程抬頭，只見陸子毅喺袋摷咗包紙巾，抽咗一張出嚟遞到佢嘴邊，跟住仔細咁幫佢抹走嘴角殘留嘅嘔吐物。
不適嘅感覺已經得到舒緩，所以周汝程呢一刻嘅腦袋已經開始運作返，但佢寧願自己而家係冇意識。
佢竟然幫我抹嘔吐物！周汝程喺內心哀嚎，覺得咩架都俾自己丟晒。
但陸子毅仍然冇講嘢，抹完之後就掉咗張紙巾，然後從袋中遞咗支水俾佢。
「冇嘢吖嘛你，sorry呀，我唔知你唔坐得。」等周汝程「咕嚕咕嚕」咁飲咗水之後，陸子毅終於開口。
「唔關你事，我都唔知⋯⋯」周汝程有啲唔好意思咁笑，佢都唔知自己原來咁渣。
希望佢唔會覺得我好掃興啦。周汝程喺內心嘆咗一口氣。
不過話時話，呢個人平時唔嗲唔吊咁，估唔到佢又幾體貼喎。周汝程諗起頭先陸子毅表現出嚟嘅反差，不禁偷笑。
不過下一秒，佢又俾遠處嘅設施轉移咗視線。
「嘩！我想坐嗰個公主車！」佢細步跑過去。
「你幾歲呀大姐⋯⋯」陸子毅回復原狀，語帶嫌棄，但最後都係抬腿跟咗過去。
入夜之後，陸子毅同周汝程一齊坐上樂園嘅摩天輪。
樂園夜晚會放煙花，而摩天輪嘅位置正正可以欣賞到天空上嘅煙花。
當然，個個都想試吓坐住摩天輪咁睇煙花，所以摩天輪成日都排長龍。
好彩佢哋兩個好早就喺呢度排隊，幾乎排喺隊伍嘅頭幾名。
喺煙花𠥔演即將開始嘅時候，摩天輪都開始放人入去。
周汝程腳步輕快咁行去其中一個車廂度，朝早因為嘔吐而頹喪嘅表情已經不復存在。
其實佢係第一次坐摩天輪。
估唔到第一次坐摩天輪竟然係同一個啱啱識咗幾日嘅人一齊。周汝程並唔係因此而覺得遺憾，反而係感覺有啲神奇。
唔知陸子毅第一次坐摩天輪係咪同胡彩欣呢？佢不合時宜咁諗。
摩天輪緩緩升起。
大會仲未開始放煙花，夜空中仍然係漆黑一片。喺光污染咁嚴重嘅城市中，天上只有疏落嘅幾粒星星，閃爍住微弱嘅光芒。
周汝程望向坐喺對面嘅陸子毅。
好難想像幾日前佢哋只係一對陌生人。
周汝程低頭。隔住摩天輪嘅落地玻璃，佢見到地上嘅遊樂設施同遊客都離自己越嚟越遠。
周汝程有種抽離於暄鬧外嘅孤獨感。
等破案之後，佢同陸子毅應該都會變返陌生人。到時陸子毅會攞住錢返去G市，而佢自己亦都會返去喺A市嘅屋企。
從此再不相見。
周汝程覺得自己心入面有種講唔清嘅惆悵，就好似吸咗一啖香煙入肺，但點都呼唔返出嚟，反而一直埋藏喺體內。
唔通係夜晚摩天輪嘅氣氛令佢產生咗錯覺？周汝程唔知自己點解變到咁傷春悲秋。
「煙花要開始喇。」陸子毅嘅聲音打斷咗佢嘅思緒。
係呀，煙花。
周汝程回過神來。佢望向窗外，翹首以昐。
佢哋唔係等咗好耐。約莫幾秒鐘嘅時間，一團五顏六色嘅光芒快速衝上夜空，上升至某個高度後就喺寂靜中爆開。
「好靚呀！」周汝程幾乎要將成塊臉都貼上玻璃窗。
呢個時候，佢哋身處嘅車廂悄悄咁升上最高點，然後停住。燦爛嘅光輝映射喺佢哋兩個嘅臉龐上。
周汝程望向陸子毅，對方嘅雙眼呢刻變得特別明亮，眸中被耀眼嘅星光填滿。
周汝程一時間移唔開眼。
但對方感受到佢嘅視線，目光忽然從滿天嘅煙火轉移到佢面上，鎖定住佢嘅雙眸。
視線相接，但冇人移開。
窗外嘅煙花依然一簇接一簇咁上升着，璀璨而熱烈，令人無法忽視佢哋嘅存在。
但呢一刻，車廂內兩人嘅眼中只有彼此。
窗外空中「呯」、「呯」嘅聲音一下一下咁敲打喺周汝程嘅心房。
佢心念一動，脫口而出：「不如我哋⋯⋯」
陸子毅瞳孔微微放大。
「鈴鈴鈴！」
刺耳嘅電話鈴聲突然響起，打破一室彌漫嘅旖旎。
摩天輪徐徐下降。
「喂？」陸子毅接聽電話，意圖壓抑自己急速嘅心跳。
「請問係咪陸生呀？我係田園酒店嘅員工。」
「係呀，做咩事？」
「有警察嚟咗我哋酒店，話要問你哋嘢。」
陸子毅有啲愕然，周汝程向佢投來一個詢問嘅眼神。
喺摩天輪落嚟之後，周汝程同陸子毅急急腳咁去攞車，揸車返酒店。
一路上，兩個人都冇出聲。
返到酒店，迎接佢哋嘅係兩個警察。
「你哋好，係咪陸生陸太？」
佢哋被對方帶領住行去酒店大堂角落嘅一張梳化度。
其實呢兩個警察都唔係問咗好多問題，只係問咗佢哋兩個同胡彩欣嘅關係、對佢有咩認識，同埋佢有冇咩異常嘅行為。
警察透露嘅資訊唔多，但佢哋口中嘅一言半語足以令本身就查緊胡彩欣嘅周汝程同陸子毅知道而家發生緊咩事。
有受害人報警話自己俾胡彩欣同佢嘅同黨勒索，仲提供咗證據。
警察今日已經拉咗人。
後來警察過嚟酒店查問，又從酒店員工口中得知胡彩欣最近仲主動接觸周汝程同陸子毅呢pair住客，所以佢哋先想問多兩句，睇下佢哋係咪另一對受害人。
問咗幾句後，兩個警察起身離開。
「如果你哋再諗到啲咩，記得聯絡我哋。」臨走前，其中一個警察講。
周汝程同陸子毅目送佢哋離開後就急急腳咁搭𨋢返上房。
「即係我哋搞咗咁耐，最後得個吉。」陸子毅喺房間來回踱步。人都拉埋，有埋證據，佢哋兩個嘅計劃已經作廢。
「係⋯⋯」周汝程都好崩潰。其實胡彩欣俾人拉咗係好事，但白忙一場嘅感覺真係好難受。
件事已經唔需要我哋兩個再查⋯⋯周汝程一邊扶額，一邊拎起電話。佢要同佢個朋友講呢件事。
早唔報遲唔報，係要喺我哋查得有啲眉目嘅時候先嚟有人報警⋯⋯理智上知道咁樣係無可奈何，但周汝程都係忍唔住喺內心抱怨。
電話接通，周汝程同對方講咗今日發生嘅事。
聽到呢個消息之後，朋友嘅聲音變得氣憤。
「果然係佢！我之後就帶個死佬過L市！唔該晒你呀周汝程。」講完之後，對方就cut咗線。
「唔使客⋯⋯」周汝程嘅說話被硬生生打斷。
佢本身想講，其實佢冇幫過任何嘢。
直到今日為止，佢哋都只係查咗個頭，咩證據都未攞到。
而家咁樣發展，周汝程亦冇可能賺到淨低嘅調查費。
估唔到真係得個吉⋯⋯周汝程自暴自棄咁癱喺床。
俾師父知道嘅話一定笑到我面黃。
周汝程其實好內疚，計劃中斷不突止，仲連累陸子毅陪佢癲咗幾日冇收穫。
諗到呢度，佢攞出電話，delete咗之前影陸子毅張相。
「你張相我delete咗㗎喇，我聽日都返A市。」佢show咗部電話俾陸子毅睇。「Sorry呀，呢幾日煩咗你咁耐。」既然單案已經完咗，咁佢哋之間亦再冇任何羈絆。
今日摩天輪上未講完嘅說話，就當係自己喺氣氛影響下嘅衝口而出啦。
周汝程打開電話，訂聽日嘅機票。
陸子毅仍然冇講嘢，不過佢唔係因為收唔到錢白忙一場而失落，而係因為知道周汝程聽日要走。
呢幾日呃唔到錢，但卻係佢咁耐以嚟過得最開心嘅時光。唔使擔驚受怕、唔使違背良心做犯法嘢、唔使扮成其他身份，而係光明正大咁以「陸子毅」嘅身份同周汝程相處。
雖然由一開始就帶有其他目的，但周汝程係唯一一個喺知道佢係騙子之後都繼續同佢來往嘅人。
可惜佢區區一個騙子，同周汝程最後注定係要各行各路。
佢可以為周汝程做嘅最後一件事就係，喺第二日揸住嗰架租返嚟嘅跑車送佢去機場。
「我唔送你入去喇，一陣要去還車呀！」機場門口，陸子毅語調輕快咁同周汝程揮咗揮手。
「得喇！」周汝程拖住行李回頭，笑住同佢揮返手，然後又停咗停，表情欲言又止。
但最後，佢都係乜都冇講，緩緩步入機場。
「呢度就係你個女同佢男朋友喺唔同地方嘅相。」周汝程坐喺辦公檯後，將一疊相推向對面嘅中年婦女。
對方身型有啲臃腫，衣著華麗，一睇就知非富則貴。
雖然上次去L市係查騙案，但更多時候，周汝程都係幫人查吓婚外情、尋人之類。又或者好似今日咁，幫啲有錢人查佢哋子女嘅交友/感情狀況。
中年貴婦交低現金，滿意咁離開。
周汝程鬆一口氣，收好錢之後就開始整理四周散落嘅文件同資料。
之前請嘅part time 辭職唔做，而家周汝程只好一腳踢做埋助理嗰份。
呢排佢接到咩委托都係自己一個走嚟走去咁周圍調查。
冇助理真係好唔方便，所以佢已經喺偵探社門口貼咗張招聘啟事，又喺網上刊登招聘廣告。
可惜等咗成半個月都只有兩個人嚟應徵，仲要唔合適。
一個就睇小說睇上腦，以為偵探就好似福爾摩斯咁日日去查謀殺案，過住驚險刺激嘅生活。周汝程都唔好意思請佢，廢事打破佢嘅幻想。
另一個見間偵探社得周汝程一個人，嫌多嘢做。周汝程淨係問咗佢幾句嘢對方就趕住走咁款。
最後又係請唔到人。
一開始，周汝程嘅要求好高，想請個醒目又幫得手嘅人。而家佢已經唔敢要求太多，只要係個正常人就得。
原來嗰陣有陸子毅幫手係咁難得。周汝程忍唔住又諗返起喺L市同陸子毅一齊查案時嘅情況。
計起上嚟，距離L市嗰陣已經過咗一個月喇。
喺L市分別嘅時候，佢哋好有默契咁冇交換contact 。
雖然一開始請陸子毅幫手時，周汝程俾咗自己張卡片佢，上面有偵探社電話，但喺呢一個月入面，陸子毅都冇打過電話嚟。
可能佢已經揼咗張卡片，又或者佢唔認為有需要搵周汝程。
隔咗咁耐，周汝程諗起佢嗰陣內心仍然有些少酸酸澀澀嘅情緒。
好彩嗰陣冇表白，如果唔係就尷尬。佢苦笑。
呢個時候，偵探社入口玻璃門上嘅風鈴適時發出清脆嘅「鈴鈴」聲。
偵探社嘅入口喺一樓，以前師父嘅辦公檯就喺嗰層。而家師父唔喺度，一樓暫時冇其他用途。
但周汝程習慣喺二樓做嘢，所以都冇特登搬嘢落一樓，淨係喺一樓嘅樓梯隔離整咗塊牌，叫啲人有案件委托就上二樓搵佢。
來人推門而入後，接着就係一陣踏上樓梯嘅腳步聲，揭示住新一名客人嘅到來。
周汝程深呼吸。
係時候投入返工作喇。佢提醒自己。
好快，腳步聲變得越嚟越越近，睇嚟對方已經上到嚟。
於是周汝程面帶微笑，從辦公檯後抬頭對住來人開口：「你好，請問有咩幫到⋯⋯」話都未講完，佢突然好似啞咗一樣發唔出任何聲音。
企喺佢面前嘅係一個熟人。
「陸子毅？」周汝程驚訝咁叫出聲。「你點解會喺度㗎」
前一秒仲諗緊嘅人，下一秒就出現喺面前。周汝程覺得呢個世上唔會再有比呢樣嘢更神奇嘅事喇。
陸子毅冇即刻回答。佢滿意咁欣賞完周汝程驚喜嘅表情後，就舉起手中嘅一張紙俾周汝程睇。
「我嚟見工。」佢笑，手上攞住嘅擺明就係從偵探社門口撕落嚟嘅招聘廣告。
「咳⋯見工？呢份工唔係咩人都請㗎喎，要求好高㗎。」周汝程感覺自己喉嚨發癢。
其實佢恨不得即刻應承。
見周汝程咁嘴硬，陸子毅都冇拆穿佢，只係扮認真思考，但嘴角似有似無咁帶著笑。
「咁呀⋯⋯」陸子毅摸一摸下巴。「咁我唯有犧牲色相，為自己換取一個工作嘅機會啦⋯⋯」佢笑住講。
「好⋯好啦⋯⋯」周汝程滿臉通紅。