短篇sweet故合集: 我網友原來係我男神
「我失戀呀」落咗堂，我第一時間打開tg搵我個網友訴苦。
「唔好話俾我聽你咁蠢走咗去表白。。。」佢好快回覆，字裏行間都係滿滿嘅嫌棄。
「唔係……」我一邊單手打字一邊執嘢，強忍住鼻酸，唔想喺大庭廣眾之下喊出嚟。
「咁做咩事先」其實雖然呢個網友成日話我蠢，但至少佢都肯關心我聽我呻。
正正係因為咁，我哋先會成為網友。
一開始相識係源於我喺感情台出嘅連登post。
嗰陣我啱啱鍾意咗我男神，但無奈我根本冇機會接觸佢。苦惱之下，我喺感情台開咗個叫春post。
「鍾意咗個同學，點先可以接近佢呀？！」
不出所料，個post好快就沉底。
過咗一陣，終於有一個回覆。我滿心期待咁㩒入去。
「樓主gpa得2.9好心就俾心機讀好啲書先諗溝仔啦」
佢應該起咗我底，見到我以前開嘅post。
我好嬲，但我諗唔到點覆佢寸返佢。
因為我嗰個唔係假膠post，我上個sem gpa真係得2.9⋯⋯
最後我唯有憤怒咁留低一個負評。
但隔咗一陣，嗰個人又再comment。
「你個同學讀書叻唔叻㗎，會唔會去圖書館？係嘅咪去撞下佢先囉。如果你哋讀同一科仲可以借啲意問下佢嘢攞contact。」
係喎！
我男神的確成績幾好，可能呢個人講嘅嘢真係有用都未定。
於是我按佢嘅指示做，自己再改咗少少方法，最後真係成功攞到男神ig。
當晚我即刻開返我個連登post出嚟，覆返嗰個人comment。
「多謝你呀 我真係成功攞到我男神ig呀!」雖然一開始佢寸我，但結果佢真係幫到我。
「加油樓主」佢回覆。
望住佢嘅回覆，我猶豫咗一陣，然後動手打字。
「我哋可唔可以交換tg呀 我仲有好多嘢想問你」雖然有啲厚面皮，但我覺得我真係好需要佢幫助。
我份人本身就比較蠢同細膽，唔係有佢嘅提議，我根本諗唔到點做好。
隔咗一陣佢都未覆，我有啲心急，又留多咗個comment。
「我唔係呃錢嗰啲人嚟㗎」驚佢唔信，我仲遮名upload咗張學生證。
今次佢好快覆我。
「你係咪痴線㗎，喺連登upload自己嘢...」隔咗一陣，佢又再覆多個comment。
「thejbk222 你加我」
加咗tg之後，佢陸陸續續俾咗唔同意見我，教我點接近男神。
「嗱，既然攞到ig，咁就要好好利用喇。勤力啲出story，出得有趣啲吸引啲，引佢覆先啦。」佢講得頭頭是道。
我照佢咁講嘅去做。
男神之後的確有覆我story，但每次都係reply笑喊。
咁點傾落去呀？！
我走去問呢個網友。
「睇你個款，會唔會係你啲story太白卡，人哋唔知可以覆咩好。。。」不得不承認，又真係俾佢講中咗。
「白卡story唔好笑咩？」我虛心求教。
「好笑，但人哋只會當你諧星，唔會俾你吸引到。」佢好直接。
「咁點算呀TAT」
「冇事嘅，我自己係咁諗啫，可能你男神bad taste呢。」
我完全唔覺得有被安慰到。
又過咗一段時間，我同男神仍然零進展。但我同呢個網友就慢慢變熟咗，我哋嘅交流亦唔再限於感情問題諮詢。
仲包括埋學業問題諮詢。
因為佢之前無意中透露咗佢讀嘅科，同我讀嘅一樣！
於是我又開始煩住佢。
「求下你教我啦，我唔想再gpa 2.9喇……」隔咗個mon，厚住面皮死纏爛打對我嚟講真係易如反掌。
「咁你下次攞2.8咪得囉。」
「……」
不過佢份人都係口硬心軟，最後佢都係有同我溫書，又send佢自製嘅notes俾我。
臨exam前一晚，我哋call住咁溫書。
佢把聲好好聽，但呢一刻嘅我心入面只有第二日嘅exam。
「你今次再過唔到3嘅話，唔好同人講係我教你。」佢最後講嘅呢句說話，語氣隱隱有啲咬牙切齒嘅味道。
搞到我真係驚會辜負咗佢。
最後我GPA 3.3！
我當時即刻同佢報喜。
「原來你都唔係完全冇得救嘅。」雖然仲係好寸，但我冇放喺心上。
如果唔係佢，我呢個sem真係會慘不忍睹⋯⋯
之後我有提出請佢食飯多謝佢，但都俾佢拒絕咗。
「唔使啦，你下次唔好退步就係對我最大嘅回報。」
佢真係好好人，所以我先會連失戀都第一個搵佢。
「我聽到我男神同其他人講佢有鍾意嘅人……」執好袋，我情緒低落咁覆咗網友幾隻字就收埋電話行出課室，準備搭車返屋企。
上車之後，我攞部電話出嚟，見到網友覆我message。
「咁大鑊？你肯定佢係咁講？」
「係...」我嘆氣。
「一陣得唔得閒 可唔可以call你」我又講，我而家好急切咁需要一個人聽我訴苦。
「好。」佢應承得好爽快。
一返到屋企，我就直接打電話俾網友。佢好快就聽咗。
「今次真係玩完，我冇機會喇⋯⋯」一接通我就開始呻。
諗起今日男神同佢啲朋友講起自己鍾意嗰個女仔嘅時候臉上嘅表情，我就知道自己一定冇機會。平時都冇見過佢個樣咁溫柔⋯⋯
「既然係咁，你不如搵過第二個算啦，還掂你同你男神本身都唔熟。」佢好咁直接講咗個事實出嚟。
「唉⋯⋯」雖然佢講嘅都啱，但係呢一刻我淨係覺得好頹。
察覺到我嘅情緒，網友語氣有啲恨鐵不成鋼。
「究竟你個男神有咩咁巴閉可以搞到你頹到咁，只係靚仔咋嘛，我夠靚仔啦。」
我不自覺咁返咗個白眼。
又喺度借啲意自吹自擂。
「我先唔係淨係鍾意佢靚仔囉，我之前見過佢⋯⋯」我即刻為男神辯護。
「見過佢扶阿婆過馬路吖嘛，好溫柔好善良吖嘛，」佢打斷我，「得喇你講咗十世喇。我真係未見過有人好似你咁搞笑，因為呢啲嘢鍾意人。咁講嘅話我都扶過阿婆過馬路啦，又唔見你鍾意我？」佢個語氣好似真係俾我激親咁。
「你收皮啦！」我把口下意識咁反駁佢，但內心唔知點解比佢嘅說話影響咗，竟然開始想像同佢一齊會係點。
我俾自己嘅想法嚇咗嚇，開始起雞皮。
呢條友？唔好玩啦。同佢一齊一定日日俾佢激死。
雖然佢真係好煩膠，但同佢一來一回咁樣鬥嘴之後，我心情的確係輕鬆咗。
「話時話，你男神實際上究竟講咗啲咩？會唔會係你聽錯咋。」可能係察覺到我哋嘅話題好似扯遠咗，佢將對話拉返返嚟重點。
係喎，男神！
諗起佢我又再頹返。
「冇可能聽錯㗎喇，我今日因為想借啲意同佢講野，所以上堂時特登坐佢後面。然後就聽到佢個friend問佢點解唔同某個女仔出去，佢就答話自己已經有鍾意嘅人⋯⋯」
我一輪嘴咁呻，一時唔發覺電話另一邊嘅人沉默咗。
「你今日坐佢後面？」沉默咗一陣之後，佢淨係問咗呢句。
「係呀，做咩？」
「你呢科上堂應該都有分組㗎嘛，你係邊組？」佢做乜問埋啲唔關事嘅問題？
「你問嚟做咩呀？你又唔係我學校。」我冇好氣咁答佢。
其實俾佢知都冇所謂嘅，不過真係唔知佢問嚟做乜。
但之後佢又再追問咗幾次，我見佢好似好着緊咁，最後都係如實作答。
答完佢之後，我聽到佢深吸咗一口氣。
我仲諗緊佢咩葫蘆買咩藥，佢就開口。
「聽日落堂得唔得閒，我嚟搵你食飯。」咁突然？
「做咩無啦啦咁好死嚟山長水遠搵我。」其實我都想見吓佢嘅，但我覺得佢而家提出好奇怪。
之前話請佢食飯佢都唔肯，我仲諗住佢淨係想維持網友嘅關係添，而家又無啦啦約我。
唔通佢見我失戀想嚟安慰下我？
好快，佢就回答咗我嘅問題。
「Er…其實我都係讀____U。」吓？
「咁大件事你唔一早講！又話係好朋友？！」我爭啲走音，因為真係好驚訝。
喺連登識嘅時候，佢一早就睇過我學生證，知道我讀邊間。但佢冇提過自己讀邊間u，我就理所當然咁以為佢係其他學校嘅。
有冇搞錯，佢竟然瞞咗我咁耐。
一諗到自己平時喺學校可能試過同佢擦身而過，我就覺得好神奇。
「Sorry囉我一開始冇諗住我哋關係會keep到咁耐㗎嘛，所以就冇特登講。」
我仲沉浸喺同佢同校嘅驚喜之中。相比起嬲佢隱瞞，其實我都係興奮比較多。
「唔怪得我哋學啲嘢嘅進度好似一模一樣咁啦！」之前浮現過喺腦海嘅疑惑終於都解開。
「係呀係呀，咁所以你聽日想去邊度食嘢呀？」佢問我。
好自信喎，我都未應承同佢食。
「你又知我一定肯同你食？」我把握機會寸佢。
「咁算囉。」
「咁又唔好，哈哈。」我見好就收。
收咗線之後，我依然維持住我嘅好心情，甚至不自覺咁開始哼歌。
估唔到佢竟然係同我同校，真係有緣！
唔知佢係咩樣㗎呢？
夜晚，一諗起聽日要見網友我就興奮到喺床上碌嚟碌去瞓唔着。呢種興奮甚至蓋過咗以前同男神一齊上堂嘅期待。
我突然諗起一樣嘢。
「話時話 你係咩組㗎？」我攞起電話，tg問網友。
佢同我讀同一科，咁會唔會係同我同組㗎呢？我喺腦中快速過濾自己見過嘅同學，試圖將佢哋個樣同呢個人把聲配對。
「唔話你知。」
唓，懶神秘。
隔咗一陣，電話彈咗個通知。
竟然係男神，佢久違咁覆我ig story。
「邊間餐廳嚟㗎？」我今日個story po咗嘢食相。
以前嘅我一定好開心咁覆佢，但我而家越望佢個icon越覺得唔順眼，最後乾脆俐落咁block咗佢。
然後我cap圖send咗俾網友。
「我block咗我前男神喇！舒服晒！」
佢好快就覆咗。
「。。。」
「咁快變前男神？」
梗係！人哋都有鍾意嘅人喇，我仲纏住人做乜喎。
Block咗前男神之後，呢一晚我瞓得好安穩。
第二日上堂我特登勁遲入課室，就係為咗避開前男神坐。
我由課室後門偷偷鼠入去。
有啲人留意到我嘅動靜，擰轉頭望左我幾眼。
其中就包括前男神。
佢嘅眼神搞到我爭啲把持唔住……
我即刻移開目光，揀咗課室最後嘅角落頭坐。
今日要忍住，唔可以再好似以前咁偷偷昅佢喇。
我一定要放棄佢！我下定決心。
但唔知前男神今日發咩神經，上緊堂嘅時候有好幾次都望後嚟。
唔係我自戀，但我真係覺得佢望緊我，因為每一次我都同佢對視到。
我不滿咁打開tg。
「勁煩囉 今日前男神係咁望過嚟 勁唔想同佢對視」
我網友幾乎係秒回。
「你好憎佢？」佢問。
「係！！！」
但其實我都係隨口噏吓。人哋都冇做錯任何嘢，有咩好憎吖。
與其話係憎佢，不如話係愛而不得……
咦。我咁諗完自己都打咗個冷震。
「我覺得你應該要放下仇恨，唔好對佢咁有敵意。其實佢個人都唔差嘅…」唔知點解今日網友一反常態咁幫前男神講說話。
「你又知？」我問。
「我係驚你嬲得濟，搞到自己唔開心啫⋯⋯」
「你變咗喇 以前你會同我一齊鬧佢㗎」
「。。。」
斷斷續續咁同網友喺tg傾咗一陣之後，話咁快就落堂。
我望一望電話，網友仲未覆我上一個message。佢話佢都上堂，唔知佢落堂未呢？
我低頭打字，諗住tg同網友講我落咗堂。
呢個時候，我睄到前男神執完嘢之後行向我呢邊。
可能係搵friend掛。我冇理到佢，繼續坐喺原位低頭望電話。
下一秒，我部電話咁啱響起。
「你打嚟就啱喇，我啱啱落堂，已經執好嘢喇。」我一聽電話就迫不及待咁同佢講。
終於可以見到網友喇！
「執好嘢就行啦。」佢答我，話中帶有笑意。
行？行去邊先得㗎，又唔俾個地點我。
正當我打算咁樣回應佢嘅時候，我察覺到有啲唔對路。
佢把聲唔止喺電話入面傳出嚟，仲同時喺我頭頂傳落嚟。
我意識到啲嘢，即刻抬頭。
然後我見到唔知幾時企咗喺我個位前面嘅前男神。
唔係掛⋯⋯
就算我份人再遲鈍，都開始get到而家係咩情況。
唔通我網友就係……我望一望前男神，又望一望自己部電話。
唔會嘅唔會嘅，邊有咁離奇嘅事發生吖。我嘗試自我安慰。
我接受唔到自己一直以嚟私底下同網友對住男神發花痴嘅說話竟然會係講緊俾佢本人聽。
一定係我搞錯咗！我對自己強調。
但彷彿故意要打碎我嘅奢望一般，面前呢個人冇好似我希望咁行去搵其他人，而係繼續企喺我面前，仲對住我搖咗搖手中嘅電話。
佢電話螢幕顯示通話中。
我心入面「咯噔」一聲，不詳嘅預感湧現。
抱住僅存嘅一絲僥倖心態，我瞇起眼，仔細咁再望佢電話上面顯示嘅一行字。
然後我見到自己個網名。
喺我腦袋仲處於一片空白嘅狀態時，電話掛斷嘅聲音傳嚟。下一秒，前男神⋯⋯網友嗰把不懷好意嘅、帶住笑意嘅聲音再度響起。
「行啦，飛天大波妹。」
我塊面瞬間爆紅。