短篇sweet故合集: 為咗醫好社交恐懼而搵樓下cafe店員做練習對象
老是擔心人家不喜歡你、擔心自己不有趣，怕自己出糗？沒辦法自信面對他人？只要按著以下步驟做，問題都可迎刃而解！
今日，我用一百零四蚊買咗本《社交恐懼自救手冊》，因為我實在受夠連排隊買嘢都緊張到心跳加速嘅感覺喇！
講到社交恐懼，可能大家會浮現一個好安靜怕醜嘅人嘅image，但呢個唔係我哋嘅全部。好似我咁，對住熟嘅人可以好癲，但係喺陌生場合，我恨不得自己可以變成透明，好驚俾人注意到。
但我相信今日將會係我開始改變嘅日子！我望住面前打開咗嘅書籍，虔誠咁拜咗拜。
求吓你，一定要work呀！
我深吸一口氣，打開下一頁。
相信看到這裏的你心態上已準備好蛻變了，那麼我們就開始吧！
第一步：【設定目標】
如無特定對象，可以先幫自己設定一個目標，例如便利商店的店員，可向對方尋求幫助，以製造記憶點，這也是跟陌生人交流的第一步。
店員？
我諗咗諗，樓下cafe嘅店員可能都得喎。我成日都去嗰間cafe，個環境對我嚟講比較熟悉，對實施計劃有幫助。
好，咁目標就暫定係樓下cafe店員！
要向對方尋求幫助……我托住頭苦苦思索咗好耐。
然後終於俾我諗到一個天衣無縫嘅計劃。
第二日，我一早就衝咗落cafe。
間cafe就起喺我屋企附近嘅一條巷仔嗰度，開咗差唔多一年，唔係好大間。入面裝修到好似間木屋咁好靚，所以我好鍾意去。
Cafe嘅外側係一大片落地玻璃窗。入去之前，我就喺外面鬼鬼祟祟咁望入去。星期日嘅朝早，店內只有零零星星嘅中年人坐緊。
我望向收銀，今日返工嘅係嗰個好cool嘅男店員。
點算，有啲想退縮TAT
事關佢真係好冷漠。間嘢開咗成年，之前我同佢買過幾次咖啡，發現雖然佢應有嘅禮貌都做足，但身上嗰陣拒人千里嘅氣場每次都令我覺得好緊張。
唔係掛，第一步就要打大佬？我望住入面挺拔嘅身影，內心糾結緊入唔入去好。
而個男店員好似感受到我嘅視線，抬起頭望咗出嚟。
四目交投。
……咁我冇得唔入去啦，如果唔係會顯得好奇怪。
我收返視線，推門入去，一邊行一邊攞定銀包出嚟。
「早晨，請問要啲咩？」
「要杯凍嘅Americano吖唔該。」
「仲有冇其他？」
「冇喇。」
「多謝你三十四蚊吖。」
我打開銀包摷咗兩張廿蚊紙出嚟遞俾佢。
「收你四十。」佢收咗錢之後又從收銀機攞咗幾個硬幣出嚟，連同張單遞俾我。「找返六蚊。坐低等等吖。」
攞咗咖啡之後，我就離開咗cafe。行到轉角位嘅時候我停低咗，然後除咗自己個袋上面嘅小熊維尼吊飾落嚟，擺係袋入面。
尋求幫助，製造記憶點。
我決定扮唔見咗個吊飾，入去搵個店員「尋求幫助」。
我行返入去cafe。
個店員見我折返，好似有啲愕然。
「唔好意思呀，請問你有冇見到一個小熊維尼嘅吊飾呀，我好似喺度跌咗。」我語氣盡量平穩，但其實我手汗都出埋。
個店員諗咗諗。
「你會唔會係喺出面跌咗呀？我見你行出門口嘅時候個吊飾仲掛緊喺你個袋度。」佢答。「不過你先出咗去冇幾耐，應該就跌喺附近啫。」
失策！估唔到佢會見到我個吊飾。
「哦…..咁我再出去搵吓啦，唔該晒。」我擠出微笑，灰溜溜咁逃離現場。
死啦點解好似咁尷尬咁嘅，佢會唔會覺得我好奇怪！！！
咁樣做係咪真係OK㗎……
諗諗吓我好似真係折返得太快，佢會唔會發現我係特登㗎？早知就喺出面企多陣先入返嚟，而家搞到好唔自然……
但應該算留低咗記憶點嘅。
計劃第一步，少少成功！
第二步：【事先準備好聊天話題】
最令社交恐懼患者害怕的就是沒話題和沉默，試著和目標進行有意義的對話，需預先準備幾個話題。聊得不錯的話可嘗試交換聯絡方法。
之後嗰幾日我都keep住去cafe。
而家我已經摸清楚佢返工嘅日子：星期二四晚、星期日朝早。
不過我遲遲都未實行到第二步，因為每次見面都係佢返工嘅時候，好難可以同到佢搭訕。萬一阻住佢返工，唔好話變熟，分分鐘會被佢討厭⋯⋯
於是我按兵不動咗半個月。
期間都唔可以話完全冇進展嘅，由於我星期二四日都去cafe報到，個店員已經認得我，開始由cool變成會同我點頭喇！
不枉我連星期日都掙扎住早起身。
不過，我咁耐以嚟同佢嘅交流都只限落單嘅時候，根本稱唔上係有意義對話。
幾時先可以開始Step 2呀！！！
但好快，上天就賜予我一個機會。
星期六嘅朝早，我喺屋企舒舒服服咁癱咗喺床上瞓覺。自己一個瞓雙人床真係好爽，點碌都唔驚跌落床。
「喂！」我個pat pat俾人用力打咗下，將我從美好嘅夢境中拉出嚟。
「我瞓緊覺㗎！」我唔耐煩咁瞇住眼用力坐起身，唔使擘大眼我都知係阿媽。
「你阿姨突然約我飲茶呀！你今日幫我放狗！唔好諗住下晝先去呀，啫喱實煩死你。」阿媽唔理會我嘅不滿，一輪嘴咁交代好我嘅任務就急急腳咁行返出廳，好快客廳傳嚟鎖匙聲，最後係「呯」一聲，大門被閂埋。
室內又回復一片安靜。
我仲未醒得晒，淨係喺床上呆坐，望住地下發吽哣。
隨即一陣「噠噠噠噠」嘅腳步聲由遠至近傳嚟，打斷咗我。我抬眼一望，係啫喱——我屋企養緊嘅啡色貴婦狗。佢衝入我房，四隻腳都興奮咁踏嚟踏去，條尾fing到好似就嚟甩咁，圓碌碌嘅雙眼充滿期待咁望住我，好似催促我快啲帶佢落街。
平時阿媽都係呢個鐘數帶佢落去。
我嘆一口氣，認命咁落床。
星期六呢個時候，樓下嘅狗公園都唔算多人。我拖住啫喱行入去，打算搵張長凳坐低。
突然，一團白色嘅影向我哋嘅方向衝過嚟。
係一隻白色唐狗。
「汪！」呢個時候，啫喱fing尾fing得好激烈，仲開始同我搶繩，想跑向嗰隻狗，睇嚟係佢個friend。
「唉好喇好喇俾你喇。」我踎低解開狗繩。
一解開，啫喱就跑走咗。望住佢火箭一般嘅身影，我嘆咗口氣。
好眼瞓……
我繼續踎低，默默收好狗繩，卻望到地下自己嘅影子已經被一道高大嘅影籠罩住。
我睄咗一眼，有個男仔企咗喺我隔離。
「啫喱媽今日唔嚟？」對方開口，原來係識我阿媽同啫喱嘅。
不過佢把聲有啲熟。
「係呀。」我邊答邊起身，內心緊張到死。
我阿媽識你啫，但我唔識你㗎呀呀呀！唔好撩我講嘢啦⋯⋯
下一秒，我企直，望到佢個樣。
然後有四隻大字從我個腦彈出嚟。
天助我也。
呢個男仔係cafe嗰個cool cool男店員！
佢應該都認得我，因為佢望到我個樣之後都窒咗窒。
媽媽，我愛你……喺呢一刻，朝早俾人摷起身放狗嘅不滿同疲倦煙消雲散。
係機會喇！第二步計劃！有意義嘅對話！呢個簡直係天跌落嚟嘅好機會，我一定要好好把握。
「咁…咁啱嘅，你又嚟放狗呀？」呀我喺度講乜嘢，嚟得狗公園唔係放狗唔通嚟跳繩咩……
好彩佢禮貌上都點咗點頭，睇落唔係好介意。「你就係啫喱媽個女？」佢又問。
我點頭。
然後就dead air咗……
好尷尬。今次嘅相遇太突然，我個腦完全醒唔起有咩話題。
「你今日唔使返cafe咩？」我明知故問，求其搵嘢講，想打破沉默。
「係呀，聽日先返。」佢答，然後又靜咗。
好彩呢個時候啫喱同白色唐狗已經跑返返嚟。我鬆一口氣，即刻踎低「專心」咁摸啫喱個頭，又倒水俾佢飲。
而cafe男店員就彎腰幫佢隻狗上繩。
「咁我哋走先喇，你哋慢慢吖。」佢起身。「阿B，同啫喱講拜拜啦。」佢同佢隻狗講嘢嘅時候好溫柔……
等陣先！佢哋走喇？
有意義嘅對話呢？！
雖然我有鬆一口氣嘅感覺，但同時又有啲失落，睇嚟我今日係做唔到第二步㗎喇，唯有目送佢哋離開。
不過走咗都好嘅，我真係諗唔到仲有咩可以講。佢再留喺度我仲尷尬。
計劃第二步！少少失敗……
返到屋企，我即刻同阿媽自薦，逢星期六幫佢放狗。
「終於知道阿媽辛苦喇？」佢好滿意我嘅「良心發現」。
我好心虛咁附和佢。
第二日我冇去cafe。
我個諗法係，既然星期六都見咗，星期日就唔使啦。同埋喺cafe見面淨係講得幾句嘢，都冇辦法達成有意義嘅對話。
好啦，其實我係懶得早起身。
星期二晚，我去咗cafe。冇見兩日，係時候要同男店員聯繫吓感情！
唔記得咗講，佢個名係阿瀚。
我喺佢返工個名牌偷睇到嘅。
行到cafe門口，我透過落地玻璃窗見到阿瀚忙碌執枱嘅身影。唔知點解今晚多咗人嚟。
我推門入去，佢無意之中望咗出嚟。
我對佢笑咗下，佢點咗點頭。
我今晚打算喺呢度食埋飯，所以搵咗個位坐低。一坐低阿瀚就攞住張menu行過嚟。
「星期日唔見你嚟嘅？」佢問我。
「係呀我朝早起唔到身。」我有啲唔好意思。
佢笑咗笑（終於見佢對我笑！），然後就幫我落單。
到咗星期六，我一早就起身衝去狗公園，果然離遠就見到阿瀚喺入面。
我被興奮嘅啫喱拖住跑入去。阿瀚察覺到呢邊嘅動靜，望咗出嚟，然後對我揮咗揮手。
我用力拉住啫喱，快步行向佢。
「今日咁早嘅？」佢問。
「係呀。」
啫喱同阿B好激動咁互相聞pat pat。我彎腰，解開佢條狗繩。
「佢哋不嬲都咁friend㗎？」我問，一半係好奇一半係想搵啲嘢講下。
琴晚我已經諗定話題，諗嚟諗去其實都只有狗嘅話題最易入手。
「唔係㗎，第一次見嘅時候佢哋有打過交㗎，後尾成日見，慢慢就一齊玩，最後friend埋。」阿瀚望住兩隻狗玩鬧嘅身影，微笑住答。
「哦…」阿媽以前有同我講過話啫喱同人打交，不過我唔知個對象竟然係阿B。
我幾驚訝，但驚訝完之後又唔知點接落去。
死啦，好似又dead air……
「之前唔見你嚟嘅？」阿瀚可能都覺得有少少尷尬，又唔好意思行開，所以想打破沉默。
「Er…因為阿媽早起身吖嘛，所以朝早咪佢放啫喱囉。我通常係夜晚帶啫喱落街行吓。」講起就唔好意思，其實平時夜晚都係好偶爾地俾阿媽逼我先肯帶啫喱落街。
「咦？你夜晚有放啫喱㗎？我都有試過夜晚放阿B喎，唔見你嘅？」Shit，吹太大，唔知佢都會夜晚放狗添。
「……可能因為行嘅位置唔同所以冇撞到掛。」我扮鎮定。
好彩佢冇再追問。「都係嘅，同埋我比較少夜晚放狗，多數淨係星期一先會，所以撞唔到你哋都唔奇。」
我見縫插針。「係呀係呀，我冇乜喺星期一夜晚放啫喱㗎，唔怪之得見唔到你哋啦哈哈。」
好驚險，爭啲就放狗人設崩壞……
今次我哋嚟嘅時間差唔多，所以最後我哋好自然一齊走。
但直到分開嘅時候，我都係搵唔到位問佢攞電話，所以我決定暫時跳過呢步。
第三步：【持續專注在同一個人上】
對於社交恐懼患者來說，分散投資是很吃力的，專注跟一個人建立關係才是皇道！
自此之後我每個星期一晚都去咗放狗，就係為咗撞阿瀚，順理成章咁同佢一齊行。
一來二去，我終於成功攞到佢電話喇！！！
唔知點解我覺得自己越嚟越似溝緊仔咁。
為咗醫好社交恐懼，我真係用盡九牛二虎之力…….
之後我越嚟越常去放狗。
多得我嘅努力不懈，我同阿瀚漸漸咁變熟。
我哋每次放狗都好有默契咁等埋對方一齊。我美其名曰為「給予啫喱同阿B足夠嘅相處時間」。
見我成日都咁勤力爭住出去放狗，連我遲鈍嘅阿媽都起疑。
「你呢排咁勤力放啫喱，係因為瀚仔下話。」有一日食飯，佢突然之間彈咗句咁嘅嘢。
「乜嘢呀？」我嚇咗一跳，但即刻扮到好不解咁樣。
「我前幾日見到你兩個一齊放狗。」佢唔將我嘅偽裝放在眼內。「你係我個女，你趷起條尾我就知你痾屎痾尿啦。我都諗緊㗎喇，你點會突然間咁好死幫我放狗吖。」講完佢就繼續食飯，望都唔望我。
我覺得塊面有啲熱，唯有唔出聲。
雖然話一開始只係當阿瀚做社交恐懼訓練嘅練習對象，但經過呢段日子，我越嚟越少諗起有關練習嘅步驟，反而係單純咁享受同阿瀚相處。
究竟我對阿瀚係抱住一個點嘅心態呢？
我冇勉強自己俾一個答案出嚟。
之後嗰幾日我冇去放狗，亦冇去cafe。因為呢輪學校真係太多嘢做喇！
我事先同阿瀚講咗，所以呢幾日佢都冇signal問我放唔放狗。
唉，有啲唔慣添。
呢日放學，我同我嘅男groupmate一齊走，因為我哋約好咗要傾project。
地點就約喺阿瀚返工間cafe，因為我groupmate嘅女朋友都住喺嗰度附近。
咁樣都方便咗我傾完project直接行返屋企。
其實都冇乜嘢好傾，傾完分工之後就定一個deadline，到時大家搞掂好自己嗰part再一齊執。
話就話group project，其實就各有各做。
「咁我負責呢part？」喺cafe入面，傾好大概有咩內容之後，我就指住其中一part徵求對面groupmate嘅同意。
呢個時候，有人推門入嚟。我哋坐得近門口，所以我望咗眼。
係阿瀚。
係喎今日星期四，佢返夜晚。
佢都見到我，視線喺我同個groupmate之間流連。
我正打算揮手打招呼，佢就已經快速對我點一點頭，然後自己行咗入廚房。
雖然佢冇唔理我，但我總係覺得怪怪哋。
直到我同groupmate起身走，阿瀚都冇由廚房出過嚟。
我有少少失望。咁耐冇見，仲諗住佢會出嚟，等我有得同佢搲水吹添……
返到屋企之後，我收到阿瀚嘅signal。
我不自覺帶有少少期待咁打開signal。
「咁快有新目標？」得一句冇頭冇尾嘅說話。
「？？？？」我係真心唔明，仲諗緊佢係咪send錯。
「你唔係追緊我㗎咩？一排唔見就同第二個男仔單獨出街。」
我本身飲緊橙汁，一見到佢send呢句就即刻濁親，咳到痴肺。
點解……有種被人捉姦嘅感覺？
「唔係呀，我同個groupmate傾project咋。」我即刻解釋。
唔係喎！重點係阿瀚話我追緊佢！
「等等先！做乜無啦啦話我追緊你？？」我又send多個message。
其實我知我唔係，但我仍然莫名其妙咁覺得緊張，對住個mon吞咗啖口水。
「你阿媽同我講話你平時死都唔肯放狗，做乜呢排日日都爭住放狗？仲有，點解咁啱我每次返cafe你都喺度？」佢掉返一堆問題俾我。
原來乜都俾佢知道晒。一時間，我唔知點反駁好。
我冇諗到最大嘅叛徒竟然係我阿媽！佢幾時同阿瀚講㗎？！
即係呢排佢明知我目的係佢，然後都出嚟同我一齊放狗，睇住我扮鍾意放狗？！我仲記得我吹水講過自己好享受放狗，因為放狗係同啫喱互動嘅寶貴時刻（係，我嗰陣仲強調「寶貴」）。
佢聽住我講呢番說話嘅時候究竟諗緊咩……
媽呀好柒呀！！！！！
我覺得我又社交恐懼喇。
「……如果…我話我係因為想醫好社交恐懼，所以搵你嚟練習，而唔係想溝你，你會唔會信……」我做最後掙扎，試圖扭轉自己痴女嘅形象。
「哈，呢個藉口幾有創意喎。」果然，佢唔信。
「我真係唔係追你呢。」我再次解釋。
「下話。」外加一個嘲諷emoji。
「咁我之後唔再搵你囉！咁樣你信喇掛？」我開始亂噏。
「以退為進？」
點解我以前唔發覺佢咁自戀？？
我（一開始）真係對你冇意思㗎！！
星期六，我冇去到放狗，因為我暫時唔敢面對阿瀚。
俾佢知道咗我鍾意佢真係好羞恥！！！
阿媽朝早仲諗住叫我起身，但我死抆住張被話唔去。
「做咩呀，俾人拒絕咗咩你？」唞咗一排，又要再次自己去放狗嘅阿媽難得咁關心我嘅感情狀況。
我扮瞓咗聽唔到。
阿媽出咗去之後，我喺張床度碌嚟碌去，碌極都瞓唔返。
早知嗰日就唔帶個groupmate去cafe啦TAT
星期日，我仍然唔夠膽見阿瀚，所以我決定喺中午嘅時候去cafe，避開佢朝早返工嘅時間。
我一邊行去cafe一邊睇電話。
我同阿瀚signal嘅對話一直停留喺佢講嗰句「以退為進」。
我諗咗幾日都諗唔通，究竟我應唔應該繼續去cafe撞佢同放狗呢？
我硬係有種感覺，覺得去嘅話就好似輸咗咁。
唉好煩呀！！！
我苦惱咁行到cafe門口。正打算推門，道門就從裏面俾人拉開咗。
我退後，諗住讓入面嘅人出先。但對方郁都唔郁，淨係用腳頂住道門。
我抬頭，見到我呢幾日避之不及嘅人。
點解我想避阿瀚嘅時候佢就一定會出現喺我面前……
佢應該係啱啱放工，一身便服，孭住個黑色背囊。
早知就晏啲先嚟……
老實講，其實我有少少掛住佢。但真係好尷尬呀！
我正猶豫緊要講啲咩嘅時候，佢就開口。
「你點知我係呢個時候收工㗎？」佢望住我歪一歪頭，表情好似好疑惑咁，語氣要幾無辜有幾無辜。
「……」我唔係為咗撞你而特登過嚟cafe㗎！
見我睥住佢，佢舉雙手扮投降。「好喇好喇唔玩喇，快啲入嚟啦。」佢伸手拉住我手臂行去收銀。
「請你飲嘢啦，照舊americano？」排隊嘅時候佢問我。
「唔要。我要最貴嘅香蕉朱古力奶昔！」我特登同佢唱反調。
坐低等緊攞咖啡嘅時候，我全程耷低頭玩電話，但其實我嘅目光一直睄緊阿瀚。偏偏佢又乜都冇講，淨係挨住櫈背坐。一時望吓出面，一時望吓我。
「你塊面好紅喎。」佢突然講。
我即刻背對住佢坐。
攞咗嘢飲之後，我哋一齊行出門口。我好想快步行返屋企，但又覺得人哋啱啱請咗我飲嘢，而家直接走好冇禮貌。
所以我都係慢落嚟，由得佢同我一齊行。
佢一邊行一邊搲水吹。
「琴日啫喱冇嚟，阿B話好掛住佢呀。」
佢隻狗掛住我隻狗。
佢隻狗掛住我隻狗。
佢掛住我。
我ff到自己喺度偷笑。
等緊紅綠燈嘅時候，阿瀚又再開口：「我嚟緊呢個星期二唔係返夜晚，改咗下晝更，放五點半。你唔好嚟錯時間喎。」佢語帶笑意。
我轉頭望佢，佢個表情完全係：唉見你追我追得咁辛苦，我就俾個機會你啦。
我對佢反咗個白眼。佢憑咩覺得我到時一定會聽佢話，喺嗰個時間去cafe？
等我返屋企即刻mark低先。
星期二，我糾結咗好耐。
去唔去好呀？
去呢，好似俾佢估中晒咁；唔去呢，我又唔開心。
其實我已經換好晒衫，但就係覺得好唔甘心。
諗咗一大輪，我望一望電話時間：五點三十二分。佢應該收咗工。
呢一刻我又有少少頹。果然頭先應該要去……
「叮！」電話有message。
係阿瀚。
我即刻打開，然後見到佢send咗張相俾我。
係我屋企樓下。
「快啲落嚟。」佢又send咗呢句俾我。
見到呢四個字，我就好似一隻聽到指令嘅狗咁，下一秒就攞起鎖匙衝出門。
係佢叫我落去嘅，唔算係我倒追啦！
但點都要扮吓矜持嘅。落到樓下，我即刻控制住自己嘴角唔好上揚。
「做咩。」我好cool。
「做咩頭先唔過嚟啫。」佢語氣有啲委屈，但好明顯係扮出嚟。
我忍笑。「唔得閒咪唔過住囉。」
呢個時候我靈機一觸。
「琴日就請我飲嘢送我返屋企，今日就喺我樓下等我。你係咪暗戀我呀？」我語氣好得戚咁屈返佢轉頭。
「係呀。」
Wtf！
「真係㗎？！」聽到呢句，我連扮都唔記得咗扮，興奮咁抆住佢衫袖追問。
「嗱都話係你鍾意我㗎啦，咁開心。」佢攤開雙手。
俾佢玩返轉頭，我惱羞成怒咁倔住佢，然後放開咗佢衫袖。
「喂！」佢一下捉住我手腕。「唉係喇係喇係我暗戀你，所以先成日屈你暗戀我。對唔住呀唔好嬲啦。」
「咁就差唔多！」我終於笑返。
隔咗幾秒之後。
「咁而家…即係點呀？」佢有少少遲疑。
「咩點呀？」我學佢之前咁歪頭扮傻。
「即係你同唔同我一齊。」佢語氣無奈。
「唔…咁呀，我考慮下先啦。」
「……」
今次我贏！