短篇sweet故合集: 搭巴士，有個靚仔嘅AirPods連咗落我電話…
最近我成日喺巴士上遇到同一個靚仔。佢應該每日都喺差唔多嘅時間上呢班車，不過我以前好似冇見過佢。
遇到佢嘅第一日，佢坐咗喺我隔離，佢坐出面。我本身淨係掛住自己聽歌，冇為意佢個樣。不過落車同佢講「唔該借借」嘅時候唔覺意掃咗佢一眼。
佢對眼好靚。
呢個係我第一個反應，然後我就好急咁落咗下層，因為太趕時間。
當然，我一返到公司就即刻喺signal group同我幾個friend講呢個男仔。
「但係萬一佢除咗口罩勁樣衰咁點算？」我啲friend真係好鍾意打擊我。
「唔緊要！還掂我永遠唔會知道佢除口罩咩樣。」我只需要一個美好嘅幻想，現實係點唔重要。
而經過一整日嘅回味同美化，嗰個男仔喺我心目中已經由「對眼好靚嘅男仔」變成「靚仔」。可能我真係dry得太耐，所以先咁容易興奮。
之後連續幾日我都撞到佢，我諗今日應該都唔例外。不過我今日遲咗起身，出門有少少趕，我唔肯定自己可唔可以趕得切同佢坐同一班車。
落到街，時間已經好抆，我唯有跑去巴士站。其實平時我係嗰啲懶得追巴士嘅人嚟，寧願睇住架車走都唔想跑到死死吓咁。
但今時唔同往日，我只有喺呢一程巴士先會見到佢。一定要衝！！！
辛辛苦苦跑到巴士站，我已經喘晒氣出晒汗。好彩架車啱啱到站，啲人仲排緊隊逐個上車。
上到巴士上層，我仲特登揀咗個近樓梯嘅位，希望兩個站後個男仔上車時會選擇坐喺我隔離。
但係我嘅如意算盤打唔響了，因為下一個站就有個阿嬸坐咗我隔離。我偷偷地怒睥佢一眼，但係佢一坐低就合理眼瞓覺，完全冇留意我。
激死我喇！！！！
跟著落嚟呢幾分鐘我個心一直有啲不安又小鹿亂撞。雖然我隔離個位已經俾個阿嬸坐咗，但我附近都仲有啲位，希望個男仔唔好坐咁遠啦。
下一個站，個男仔終於都上車。
佢今日都仍然咁靚仔⋯⋯（有口罩嘅情況下）
今次佢坐咗喺我斜前面兩排，比起琴日佢坐我後面，搞到我冇得𥄫，已經算好。
見到佢坐低咗，我個心終於安定落嚟。我又偷偷地𥄫咗佢幾眼，然後打開signal，諗住同我幾個friend匯報。
㩒入去發現有個unread message。
：你真係好痴線😂
係我個friend ，佢覆緊我琴晚個錄音。但我已經唔係好記得自己琴晚講咗乜（因為我傾乜都好鍾意瘋狂錄音）。
於是我就開始喺個袋度摷對AirPods出嚟，打算聽返個錄音，但唔知點解我搵極都搵唔到。
諗諗吓，好似係今朝太趕，唔記得執落袋……
唉算。我將部電話擺喺耳邊，㩒咗播放，諗住直接聽。
但係咩聲都冇。
唔係壞speaker下話……我皺眉，攞開部電話。呢排成日lag機，我都懷疑部機壞壞哋㗎喇。但係我唔死心，再播多一次。
都係冇聲。我已經成隻耳仔貼實部電話，較到勁大聲，都係聽唔到。
我開始有啲煩躁。
搞乜呀今日，又遲出門口，部電話又壞。
呢個時候，我見到嗰個男仔四處張望，好似搵緊嘢咁。我好奇咁睇吓佢做乜，但佢突然擰轉頭，視線落喺我身上。我躲避不及，一直攞住耳邊部電話，呆咗咁望住佢。
四目交投之際，我突然記返起我個錄音內容。
「呀！！今日搭巴士佢坐我後面，佢着咗件黑色衛衣，入面係白裇衫，勁襯佢囉。同埋佢喉核好正呀，我就嚟唔得喇，今日香港要水浸喇……」其實我平時同friend講嘢嘅時候就係鍾意咁浮誇，又好鍾意勁仔細咁形容。
但而家呢一刻，望住個男仔耳朵戴住嘅AirPods，同埋佢恍然大悟嘅眼神，我只恨自己點解咁多廢話。
我即刻打開control centre。
“Fung’s AirPods Connected”
果然，有個陌生嘅AirPods自動connect咗我部電話……
我手忙腳亂咁熄返，移開目光扮到冇事發生咁。
好彩有口罩遮一遮，如果唔係巴士上每一個人都會見到我塊面而家紅到利是封咁款。
而個男仔亦已經擰返轉面，但我仍然睄到佢偷笑緊。
Ok我唔會再搭呢班車了。
呢程車係我人生中搭得最耐嘅一程。一到站，我幾乎係跳起身，想即刻離開座位。好彩個男仔唔係喺呢度落。
但我隔離個阿嬸仲瞓緊覺，對腳伸直晒阻住咗我，我出唔到去。
同一時間仲有一大堆人都起咗身想落車。呢個站好多人落，我眼白白咁睇住大家都起晒身排隊落樓梯，心入面叫苦連天。
我叫咗個阿嬸幾聲佢都冇反應，唯有拍一拍佢同佢講我要落車。佢睥咗我一眼，「嘖」一聲先施施然咁移開對腳。
我忍住想一腳踩落去嘅衝動，離開咗座位。
前面嘅人一個個咁落去下層，我隨住隊伍行前，其實速度都算快，因為大家都趕返工。行到去嗰個男仔隔離時，我望向另一邊扮見唔到佢。
突然，樓梯間傳嚟「砰」一聲，我探頭一望，有人跌咗嘢。佢有少少慌張，一邊講「唔好意思」一邊執返啲嘢。
落車嘅隊伍亦因為呢場小小嘅插曲停滯咗，冇再前進。
唔係呀嘛……我目無表情但內心勁崩潰，點解偏偏要等我行到佢隔離嘅時候先停？？？
最慘嘅係，就算我唔望佢，我都感受到佢打量我嘅目光，令我如坐針氈。
今日真係我人生中最柒嘅一日……
不過好快嗰個人就已經執好嘢，大家又再繼續落車。
但人體嘅構造真係好奇妙，行到樓梯口，我越叫自己唔好望，目光就越會不由自主咁飄向個男仔。
然後又對視咗。
條友完全唔避開，仲要好寸咁挑一挑眉，好似對自己嘅吸引力好有自信咁。
仆街。
我幾乎係逃亡咁跑落樓梯。
但佢挑眉好charm……爭啲又忍唔住流口水。
一落車我就迫不及待咁同我幾個friend講呢件柒事。不出所料，佢哋全部都喺度幸災樂禍。
：「你幻想一下如果佢除咗口罩係小夫咁樣，你呢幾日就係對住個小夫出水，仲要俾佢知道咗。」
我睇完個message之後打咗個冷震。可唔可以唔好詛咒我……
到咗晏就，其中一個friend咁啱嚟附近做嘢，我哋就約一齊食lunch。難得唔係帶飯自己食，我決定約佢去遠少少嘅一間cafe。
好彩嗰度周圍都多餐廳，所以間cafe唔係好多人等緊。我哋等咗一陣就可以坐。
坐低冇耐，又有一批人入嚟。我無意中抬頭一望，竟然見到一個熟悉嘅身影行咗去冇幾遠嘅一張檯度坐低，面向住我哋。
係小夫——唔係，係巴士嗰個「疑似靚仔」。
因為今朝個friend嘅一番說話，我哋全部都開始叫個男仔做小夫。
我嚇親。做乜又見到佢？唔通佢喺呢度附近返工？呢度係我平時落車嗰度嘅下兩個站，唔通佢平時就係喺呢度落車嘅？我望住佢，沉浸喺自己嘅思考入面。
但我想講佢真係好敏銳，我只係望耐咗佢少少，佢就已經察覺到，望咗過嚟。
我即刻求其擸塊menu擋住塊面。
「做咩呀？」我個friend好不解咁問我。
「我見到小夫呀！喺後面嗰檯，灰色衫白色口罩。」雖然小夫同我哋有一段距離，但我仍然壓低聲量回答。
唔使照鏡我都知自己個樣好似見到鬼咁，唔知嘅仲以為小夫係我債主。但今朝喺人哋面前柒完一鑊，我真係唔想咁快又撞到佢。我甚至有種衝動想搵過第二間餐廳。
「吓？！邊度呀？」但係我個on9 friend完全唔理解我嘅掙扎，聽完我講之後佢即刻——係即刻！擰轉面，連成個身都擰轉埋，然後慢慢喺度掃視全場至少五秒。
我想死。
為免佢再做出啲咩失控舉動，我連menu都唔理掉埋一邊，扯一扯佢件衫。
「你痴線㗎？我冇叫你即刻望呀！」我真係俾佢累死。
佢終於擰返過嚟，神情有啲詭異嘅興奮：「我見到喇！原來佢除咗口罩一啲都唔小夫囉，個樣ok喎！」
我呆咗一呆，頭先太緊張，都唔記得咗望吓小夫除罩個樣係點。
我鬼鬼祟祟咁望向小夫，然後不禁倒抽一口涼氣。
原來佢唔係小夫，係出木杉……
「頂呀，竟然真係個靚仔！」我而家同我個friend一樣咁興奮，連隔離檯嘅人都望一望我哋。
我決定原諒小夫今朝挑眉嘅舉動了。
之後又過咗幾日。我仍然每一日都喺巴士上撞到呢個男仔，而每一次佢上嚟上層嘅時候，都會望一望成車嘅人先，然後我就會唔小心同佢對到眼神。
好啦其實唔係唔小心，而係因為我每次由佢上嚟嗰刻就不停望實佢。
雖然我好小心想偷偷地昅，但每次都俾佢發現。
唔知係咪巧合，每次同佢對望完，佢就會行過嚟，坐喺我附近。
但就算係巧合我都覺得好心動呀呀呀！
我有特別留意過，佢上車嘅時候上層其實仲有其他離我遠啲嘅空位，但佢每次都會揀個近我嘅位。
咁佢應該唔係好厭惡我掛。
如果可以日日咁望佢，我願意每晚OT作為代價！被愛情（？）沖昏頭腦嘅我甚至隨口發咗個都幾毒嘅誓。
結果呢日真係要OT，我好夜先走。
原來呢個世界真係有禍從口出呢樣嘢......
我拖住疲倦嘅身軀行去巴士上層，仍然係同一條路線嘅車，只不過係相反方向。但我朝早嘅衝勁已經消耗得七七八八。
夜晚嘅巴士仍然載住一堆放工嘅人，但人數明顯比朝早疏落好多。我求其掃咗眼，諗住是但搵個位坐低。我已經攰到冇辦法思考。
然後我就見到嗰個男仔。
今次到佢坐咗喺近樓梯嘅位。
即係話佢平時都咁遲放工，所以我先撞唔到佢？平時我永遠一到放工時間就即刻走，唔怪得一次都冇撞過佢啦。
短短嘅一個瞬間，我快速思考咗好多嘢。啱啱仲塞緊嘅大腦竟然喺呢一刻因為佢而開始活躍起嚟，我覺得自己真係有病。
但呢個對我嚟講真係一個意外驚喜。平時放工搭車我都冇遇見過佢，我仲以為佢係搭其他車走。
呢個時候嘅佢挨住櫈背瞇埋咗眼，唔知係咪瞓着咗。窗外街邊昏黃嘅燈光映照喺佢面上，忽明忽暗。夜晚嘅佢睇落平易近人咗好多，令我有種錯覺，覺得自己好似真係好熟悉佢呢個人咁。
但其實我只知佢叫Fung，唔知係馮定係鋒定係風。
我忽然有啲鼻酸。
死，每日都望佢，搞到好似真係有啲沉迷咁。
我唔想打擾到佢，但又想望到佢，所以坐咗喺佢後幾排嘅位置。
隔咗一陣，佢好似醒咗，因為我見到佢坐直咗。佢無意中望咗望四周圍，我下意識低頭避開佢視線。好彩，佢好快就望返前面。
放工嘅路線嚟講，佢係會早過我落車嘅，所以我到時就可以睇住佢落車。
諗諗吓，我咁樣算唔算係送佢返屋企呢？嘻嘻！
眨吓眼，終於到咗佢朝早上車嗰個站，佢係時候要落車喇。但我望向前面，呢個人仍然安安穩穩坐喺原位，好似冇諗住起身。
搞咩......我搲晒頭。
隔咗一陣，到咗我屋企個站。前面嘅人依然紋絲不動。我勁掙扎，有啲唔捨得落車添......
結果我淨係坐喺原位聽住閂門嘅聲音。我決定等佢落咗車我再喺下個站落，搭對面車返去！
又過咗一陣，上層嘅人已經落得七七八八。
又又又隔咗一陣，上層得返我哋兩個人。
佢究竟喺邊度落車架？唔通......佢係驚我跟住佢落車，所以唔想喺我面前落？我覺得我估中咗，如果唔係解釋唔到點解佢唔落車。
但下一秒，佢就執嘢起身，不過唔係行去樓梯，而係行嚟我呢邊。
？？？？？
死喇，佢係咪想過嚟鬧我，叫我唔好再跟住佢......
佢行埋嚟嘅時候，我淨係感覺到自己心跳得極快，其餘乜都唔知，乜都諗唔到。
點知，佢最後淨係坐咗喺我隔離，咩都冇講。
點算！而家即係點？！
我個腦正式短路。
冇人出聲，巴士引擎運作嘅「轟隆轟隆」聲喺呢個時候變得異常響亮。我最怕就係咁尷尬嘅沉默，連呼吸都要好小心，唔可以太重。
但始終要有人打破沉默，如果唔係我哋就真係會咁樣坐到總站。
「你喺邊度落？」我都未諗到要講乜，對方就開口。
我第一次聽到佢把聲，竟然同我想像嘅一樣，低沉溫柔但又保留住幾分爽朗。
我擰轉頭望佢，唔小心撞上佢嘅眼神。佢好專注咁望緊我，清澈嘅眼晴帶着些少笑意。
我覺得自己hang咗機。
你唔好再咁望住我喇，我真係會撲上嚟㗎！
但為咗保全自己嘅顏面，我強忍住內心嘅獸慾，艱難咁開口：
「吓？」
然後我就知道我呢一刻個樣一定蠢到仆街，因為佢開始喺度笑。
頂，我其實知道佢問乜，但望住佢對眼，我真係緊張到唔識講嘢。
「我問你喺邊個站落車呀，我已經陪你坐過咗好多個站喇。」佢又笑。可唔可以咪再勾引我……
等等先，咩叫「陪你坐過咗好多個站」？？？
我唔係有心表現得咁蠢，但我而家個腦入面好似打晒kick咁，令我完全理解唔到佢講嘅嘢，唯有呆滯咁望住佢。
「你總站落？」佢換咗個問法。我搖頭。
「咁你住邊？」佢又問。
「XX站……」我哋架巴士已經過咗呢個站好耐，所以我講出嚟都有啲唔好意思。
果然佢聽完之後就一臉意味深長咁望住我。
好羞恥呀。
呢個時候，下個站到咗。
「行啦。」佢冇再多講，直接拉住我落車。
夜晚嘅溫度低過日頭好多，我一落車就感受到一陣涼意。但意識到隔離呢個人嘅身份，一股熱氣又悄悄染上臉頰。
我哋兩個並肩而行，真係希望呢段時間過得慢啲。
「你本身諗住等我落咗車先落？」一邊行，佢又延續頭先嘅話題，仲問得好直接。我點頭，事到如今，否認都冇意思。
「你真係好痴漢，」佢嘅反應竟然係笑。「但你真係好冇膽。」
我好疑惑咁望住佢，唔明佢咩意思。
「其實我本身係揸車返工同放工。只係前排架車拎咗去整，我先搭巴士。」佢開始解釋。「不過嗰日聽到你個錄音之後覺得你又幾搞笑幾可愛，所以之後就算整返好架車我都keep住搭巴士，諗住某一日你會嚟問我攞contact。」佢望咗我一眼，好似嘲笑緊我嘅有賊心冇賊膽。
雖然佢笑緊我，但我個心臟都係噗噗噗噗咁跳得超快，唔通我唔係單戀？！
早知係咁我就應該一早撲上去！
「今日放工撞到你係意料之外嘅，我唔落車都係諗住等你，點知你都係咁冇用。」佢睄咗我一眼，「等你主動都係靠唔住㗎喇。」佢語氣帶點嫌棄，但我又從中聞到一點甜蜜嘅味道。
「我唔知吖嘛……」哎呀好怕醜><
我成個人都沉浸喺好似中獎嘅興奮當中。本身以為自己只可以繼續喺遠處偷望，點知佢一直等緊我行前。
未等我開心完，佢又開口。
「互相偷望嘅遊戲大家都玩夠喇，我覺得我哋係時候正式認識一下。」佢語氣突然變得嚴肅，但我有少少想笑。
好可愛呀。
然後佢停下腳步，我又跟著佢停，好彩條街冇乜人。
「我叫陳愷豐，你叫咩名？」佢認真咁凝視住我，等待我嘅回應。
原來佢唔係馮唔係鋒唔係風，係豐。
「我叫孫泳如！」
我終於可以光明正大直視佢。