[少甜] 《未曾存在的理由：發生喺半套店嘅沉船故事》: 第六章
兩個星期過去，又返到嚟呢到。
「喂！等咗你上嚟好耐，你幫Candy寫嘅報告好精彩，下次佢會好好招呼你㗎！」老細開門第一句說話。
「我唔識規矩啫，唔知道會有咁大迴響。」我答。
「點都好啦。你入房沖涼先，Divya轉個頭會入嚟複診。」老細帶咗我入房。
沖涼後，Divya用輕盈嘅步伐跳咗入嚟房間。
「Hehe，膨于硬。」Divya打招呼。
「點解你又會知我叫膨于硬。」我詫異咁問。
「個個都睇過你篇報告啦，仲有邊個唔識你啊，哈哈。」Divya答。
「其實我無諗過會咁，我只係想幫吓Candy，最後搞咗個大頭佛出嚟。」我怕怕醜醜咁回應。
「最衰今日Candy放假啦，唔係可以叫佢入嚟陪吓你。」Divya笑道。
「嘜有得咁玩㗎咩？」我疑惑咁望向Divya問。
「佢無上鐘的話，都無話唔得嘅。」Divya答。
「咁下次又真係要試吓喎。」我笑住回應。
「點啊，呢兩個星期有冇用過下面，有冇改善到啊。」Divya轉咗話題。
「其實當日按完已經行步路都輕鬆咗，有時夜晚仲會扯足一晚。」我回答。
「正常啊，啲血氣通順咗啊嘛。」佢滿意咁回應。
「雖然晨勃個時會扯到好硬，但係實戰嘅時候都係半扯狀態，好似仲差少少咁。」我補充。
「你自己用定有人做對手啊？」Divya問。
「自己用當然有啦，對手就Candy囉。」我答。
「訓覺同晨勃扯到咁硬，就啫係唔關身體機能事㗎啦，係你自己唔放鬆啫。」Divya笑住回應。
「都係嘅，早一個月斷過條包皮繫帶，之後用落就奇奇怪怪。」我補充。
「唔怪得見你無事無幹都嚟搵我啦，惡性循環嚟㗎！你怕條包皮繫帶會斷，緊張又會扯唔到，咁你下次又會緊張，繼續扯唔到。」Divya回應。
「咁應該真係關事喎，我搵Candy個陣成個腦都係你講個句『Focus on the girl』。」我答。
「白痴，我係叫你放鬆啊，唔係叫你諗住我講咩。」Divya似笑非笑回答。
由於上次已經按鬆咗大部分經絡，今次明顯已經無咁痛，所以我都可以對住Divya暢所欲言。然後我喺手機開咗播歌軟件，隨機揀選咗九十年代英倫搖滾嘅播放列表。
「Now the Drugs don’t work, they just make you worse.」手機播放緊The Verve嘅《The drugs don’t work》。
「Drugs 緊係don’t work啦，Divya先work㗎嘛。」我隨口搞咗個冷笑話。
「妖，好無聊啊。」Divya虛笑回應。
「係呢，你係馬拉人？你講嘢有好重馬拉口音，所有句尾嘅韻都會向上飄。」我提問。
「錯啦！我係星加坡加陀地嚟㗎。媽媽係新加坡人，爸爸係香港人。」佢帶少少高傲咁回答。
「咁都係半個陀地啫，同埋你喺新加坡嗰邊長大？」我追問。
「做咩無啦啦講起我啫，總之好細個就跟媽咪去咗新加坡囉。」唔知係唔係氣氛放鬆咗，Divya開始展示佢唔耐煩嘅一面。
「抓龍筋唔係泰國技藝嚟㗎咩，點解你又會識嘅。」我再追問。
「你係咪想話我掛羊頭賣狗肉？」Divya有些少激動咁反問。
「緊係唔係啦，我就係覺得有用先返嚟複診㗎嘛。」我答。
「大學畢業個陣想搬出嚟闖吓，之後離家出走去咗泰國。滿意未？」佢回答。
「咁都仲係好奇怪喎？首先你點解揀咗呢一行。第二，點解又會嚟咗香港。」我再次問得深入啲。
「嗱！我淨係講一次。去到泰國之後，機緣巧合識咗我師傅，當時佢當我女咁，教授我抓龍筋嘅技藝。」佢深一深呼吸，繼續講落去。「至於返嚟香港，係因為早幾年有啲事發生咗，我又唔想返新加坡，所以就返嚟投靠我爸爸。」佢簡述咁交代。
「我係唔係問得太深入。」我開始擔心佢唔鍾意將談話重點放喺佢嘅私人嘢上。
「唔係嘅，白痴。」佢笑語。
房間入面靜咗一陣。
「點解你會搵Candy嘅？你唔係嚟求診㗎咋咩？」佢口角笑咗一吓，嘗試問返我。
「嗱，我都只係會講一次。就係上次搵完你之後，喺廳見到佢補妝⋯⋯」我未講完。
「你咁就去搵人㗎啦？咸濕仔。」Divya搶住回應。
「總之就係咁啦，無其他原因。」我補充。
「咁你信唔信緣份㗎？一見鍾情？」Divya淘氣咁問。
「唔信，不過可能係一見鍾情嘅。」我確實認為唔需要相信緣份，世界仍然可以運作。
「我都試過一見鍾情，嗰種感覺就好似畀人落咗幻藥咁。就算無結局都好，你都會興幸自己遇過呢段感情。人海雲雲你遇上呢個人嘅機會仲細過中六合彩啊，點會無緣份喎？」Divya回應。
「係你男朋友？」我問。
「咁啫係你無睇過佢啲廣告同報告就嚟咗搵佢？咁你點知入到房有咩玩啊？」Divya迴避我嘅問題。
「我都唔知㗎。同埋咪當試抓完龍筋之後有冇好啲囉。」我答。
「緊係有用啦！邊到洗咁樣試。」Divya再次搶住回應。
「得啦得啦，係我咸濕啦，咁得未啊？」我笑住回應。
隨住時間一分一秒咁過，我哋開始討論其他話題，因為我對呢一行冇任何認識，所以話題都係圍繞住呢一行嘅發展，原來深入人哋嘅世界其實都幾精彩。
就係呢個時候手機播出Oasis嘅《Wonderwall》，Divya突然之間眼泛淚光，但雙手仍然無停咁為我診治。感情嘅事就係咁奇怪，回想起當時，我並唔知道發生咩事，亦唔知呢首歌對佢有咩意義，我只係以為自己問得太過深入，想為我嘅唔禮貌緩和一下氣氛。
「師傅，拎張紙巾俾你印一印眼水。」我扭一扭身，想喺床邊拎起紙巾盒。
「唔洗啊，我無事。」佢雙手繼續為我保健。
「唔知係咪我問得太多你嘅身世呢？Sorry，要你諗返以前啲嘢。」佢雖然口講無問題，但可能我哋嘅談話內容令佢諗起一啲唔好嘅回憶。
「傻仔，唔關你事啊。」Divya簡單咁回應，但係面上掛上一份憂愁。
「Hey，you are my wonderwall。」我只想好簡單咁哄佢一下。
「痴線，唔好亂講嘢。」Divya收一收乾淚水，面上再次帶上笑容。
「你無事就好。」我回應。
「搞掂㗎啦！如果你仲有唔舒服，先再返嚟複診。啊！另外不如你又幫我寫篇報告啊！唔洗咁多字㗎，寫返啲流程就可以。」佢笑住講。
「舉手之勞啦！寫完俾你望一望先出街。」講完後，我拎上手機同Divya交換電話聯絡。
「嗱，因為嚟到香港之後好鍾意食雲吞，所以我通訊軟件個名就叫做雲吞。」Divya笑住講。
「新加坡無雲吞食㗎咩？」我好奇問。
「無咁好味囉。」佢回應。
「咁你一定要入大排檔食一次七味豆腐！因為道餸整落好考功夫嘅，所以一般都唔會寫落個餐牌，要自己問侍應。」我介紹。
「吓，啫係點樣先食到。」Divya回問。
「下次啦，下次有機會帶你食。」我回應。
「好啊。咁老細，今日嘅服務就去到呢度啦。」佢扮嗲聲嗲氣，笑住咁講。