[少甜] 《未曾存在的理由：發生喺半套店嘅沉船故事》: 第七章
訊息鈴聲響起。
「喂，膨于硬！」Candy嘅訊息通知喺手機螢幕出現。
「做咩啊。」我回應。
「咁耐唔搵人㗎？我今日開始放假啦。」Candy加上委屈表情符號。
「開始放假？」我滿頭問號。
「嚟M啦，我哋嚟M返唔到工㗎。」Candy加上笑喊表情符號。
「係咩！而家先知喎，咁放假有咩搞？」我如夢初醒。
「諗起你囉。」Candy回覆。
「都唔知你真定假嘅。」我笑住對螢幕回覆。
「真㗎！真係每次打開房門都會諗起你，又係你叫我講返俾你知嘅。咁你有冇見到咩都諗起我先？」Candy問。
「又未有喎，可能你提多我幾次，我就會放喺個心到咁諗。」我放上高傲表情符號。
「車！得你唔記得人咋嘛。」Candy加上傷心表情符號。
「講起呢個話題，你有冇睇過套戲叫《Call Me by Your Name》。」我問。
「無喎。做咩？」Candy回覆。
「邊到講起好呢。個故事入面兩位主人翁有個差唔多嘅小把戲，主角會嗌自己嘅名去呼喚另一個主角。咁每次主角諗起自己時，就會諗起對方，將自己連結咗去另一個人身上。」我解釋。
「啫係點啊？」Candy問。
「例如我而家話：『膨于硬 膨于硬 膨于硬 膨于硬⋯⋯』咁因為膨于硬呢個名已經同你連結咗，所以我每次講膨于硬嘅時候，其實係諗起你。」我補充。
「你佔有慾咁強㗎，咁我咪會成日諗起你囉。」Candy加上冧冧表情符號。
「我又無同你玩《Call Me by Your Name》，咁啱醒起啫。」我清楚呢段情話係無意義嘅。
「車！咁不如講下你啊，你啲話題同其他人好唔同。其實你係做邊行㗎啫？」Candy問。
「小弟就做音樂製作嘅。」我答。
「音樂點樣製作啊？」Candy追問。
「啫係作曲、作詞、編曲，之後將佢哋錄製成一首完整嘅歌。咁可以放喺CD、電腦、電台播咁。」我補充。
「啫係你識唱歌？」Candy問。
「唔係啊，我係負責幫人㩒掣做錄音嗰個。」我加上笑喊表情符號。
「你一早講錄音咪得囉，搞到咁複雜。」Candy加上無奈表情符號。
「咁唔只係錄音啊嘛。」我認真回答。
「咁我好明啲先呀嘛。你應該話係做錄音，之後補充話仲要作曲作詞，咁先啱。」Candy淘氣咁回答。
「好嘅好嘅，下次講得清楚啲。」我回答。
「而家知道咗就唔洗下次講啦，總之你就唔識唱歌啦，hehe。」Candy再次淘氣回應。
「我唔知點應對啦，好似做咗下把位咁。」我加上怕醜表情符號回應。
「咁你send套戲俾我先啦，我晏啲出完街返屋企睇。」Candy要求。
「《Call Me by Your Name》？好悶㗎喎。」我回覆。
「得啦，話咗睇就睇。」Candy回覆。
「好啦，我搵一搵先，轉頭俾你。」我回應。
「咁我出街啦！」Candy回覆。
***
「喂，Wonderwall！」我喺訊息打開話題。
「咩Wonderwall啊痴線。」幾分鐘後Divya回覆。
「You’re my wonderwall OO~~~」我扮唱起Oasis《Wonderwall》嘅歌詞。
「OK㗎啦，調戲說話唔洗講，我有男朋友㗎啦。」Divya回覆。
「都話你有男朋友㗎啦！我打起咗篇報告，你睇吓有冇嘢要修改。」我附上報告。
「Walao，你照放上論壇啦！」Divya回覆。「啊係啦，呢排有冇用過下面，有冇成效啊？」
「自己用都係咁，無咩事。但係Candy放緊假，所以無搵人試過。」我答。
「點解你假設咗要用就係搵Candy㗎？同埋你可唔可以唔好講唔夠十句就Candy前Candy後，你真係好喜歡佢咩？邊有可能見過一面就想搵人？」Divya質問。
「佢笑容係我鍾意嘅類型，笑起上嚟隻眼識一齊笑嘅。」我回答。
「我求下你唔好再講，我唔想知。」Divya加上反白眼表情符號。
「而且佢好溫柔，好識照顧人。」我再補充。
「你痴線啦，你先搵過佢一次咋嘛。你不如話鍾意佢好識做家務，煮飯好好食啦。」Divya懶理我嘅理由。
「得得，我認輸好未。」我加上笑表情符號。
「喂喂，其實你係做咩㗎？成日晏晝上嚟，唔洗返工㗎咩？」Divya回問。
「哦，我係做錄音嘅。」我答。
「咩啊？啫係拍戲收音個啲啊？」Divya追問。
「唔係啊，我專責喺錄音室度做音樂製作，啫係作曲、作詞同編曲嗰啲。」我答。
「啫係音樂家囉，解釋到咁複雜。」佢回應。
「咁音樂家都有好多種㗎嘛。」我回應。
「你好鍾意聽英國嘢？」佢再追問。
「大學喺英國讀書，嗰時聽咗好多。」我答。
「唔怪得啦，上次係咁播Oasis。」Divya回應。
「係呀，我好鍾意。一開始聽嗰陣覺得好奇怪，但係聽耐咗又覺得佢哋啲歌好入心入肺。」我回答。
「咁你識唔識畫畫？你係我第二個識嘅人入面做創作行業嘅。我另一個朋友畫畫好叻，喺英國嗰邊做Freelancer。」Divya補充。
「唔識喎，兩樣嘢差咁遠。嘜你又去過英國㗎咩？好似全世界都畀你去過咁嘅。」我加上笑喊表情符號。
螢幕之間沉默咗一陣。
「你可唔可以唔好問點解，但係應承我一件事？」Divya問。
「請講，我盡能力。」我答。
「你可唔可以陪我去一個地方？香港有個地方有鯨魚骨，我想去嗰度睇睇。」Divya提出要求。
「即係你約我拍拖啊？」我笑問。
「都話我有男朋友㗎囉！你諗都唔好諗。」Divya回應。
「咁你仲約我去街？」我詫異咁回應。
「叫咗你唔好問，總之你陪我去啦。」Divya再問。
「As you wish，但係唔係即係鶴嘴？」我答應咗要求。
「其實我都唔知嗰度係邊度，不過應該得一度㗎啫。香港地方我唔熟路，你幫我查查啊。」Divya回應。
「好，冇問題，咁睇吓你邊日放假，我帶你去啦。」我回應。「就咁話啦，我覆實你日期。」Divya回應。
「OK！」對話結束。