[少甜] 《未曾存在的理由：發生喺半套店嘅沉船故事》: 第五章
中學踏入咗青春期階段，男女雙方開始對異性產生興趣，而我都喺高中時代結交過一個初戀對
佢身材細小，臉蛋可愛，留住齊陰嘅中長頭髮，加上一副當時潮流嘅黑框眼鏡。佢樣子未必出眾，但佢吸引人嘅氣質在於佢會令你感覺心安，遷就你脾氣，會聽你傾談心事。
基於雙方身體都流住青春期對異性追求嘅化學分泌，我倆就好似無太大嘅考慮，知道對方都懷住：「不如試吓！」嘅好感就一齊咗。
我嘅初戀並無驚天動地嘅事情發生過，就連分手都只係訊息中道別，確認一下係唔係已經對大家心淡。其實一切只係化學分泌對異性產生嘅幻象而言，想嘗試拍拖係咩嘅一回事，並無對雙方互相負責嘅意思。可能由一開始就已經無咩期望，所以分開嘅時候，都無太多失望。
喺每次離開大埔拍拖時，佢都會主動約我往九龍方向月台嘅三號車卡等。奇怪嘅係相比九號車卡，三號車卡由入閘開始計，要主動行多大約一二百米嘅距離，呢個距離嘅時間，好多時已經錯失咗一個上車機會，又要再等一下班車。
呢個深刻嘅印象仍然留咗喺我腦袋入面。
「其實點解要行到咁遠嚟三號車卡呢？」我啱啱到步，少少氣喘咁問。
「你唔覺得呢到個風景靚啲咩？你睇吓，成個月台只有呢到可以見到河畔，天空又闊啲，仲可以睇到後半個大埔嘅風景。」佢仰望住天空嘅白雲，再望向我雙眼微笑，好似講緊佢好享受呢一刻。
「你都學吓享受呢啲時刻啦，成日趕頭趕命咁。」佢帶啲語重心長嘅語氣，面上掛上為我着想嘅表情。
大埔晚上嘅街道格外寧靜，由其係河畔附近，總係有一種安全，由細到大成長、居住、認識朋友、升學，返到屋企嘅歸屬感。
自從出嚟做嘢之後，每當坐巴士放工返到大埔，都會早一個車站落車，步行大約一公里嘅路返屋企，因為呢段路程正正係三號車卡會見到景色之一。喺不知不覺間我接受咗佢意見，習慣喺佢享受嘅呢段風景入面，有一段少少嘅私人時間靜思自己心入面嘅諗法。但係今日有一個突如其來嘅訊息，打斷咗呢段私人時間。
「我收工啦！今日嗰個入到嚟都係講起你。你而家好紅㗎！」Candy雀躍咁加上興奮表情符號。
「吓，咩好紅啊？」我疑問。
「你篇報告啊傻仔！好多人討論啊。我要收返你版權費！哈哈！！」佢訊息中打上哈哈，唔知道螢幕背後佢有冇笑呢？
「我亂打㗎咋。同埋人物原型邊有版權㗎，我要收返你宣傳費先真喎，哈！」如果要表達自己帶有笑意，打上一個哈字就足夠啦。
「原來係咁㗎咩，唔好玩嘅。」Candy加上失望表情符號。
我㩒入討論區，追查返網民嘅討論，發現確實有好多人討論過篇報告，大致上有一班人批評文筆太過賣弄，打報告就應該寫得實際一啲俾人參考；而另一班人就好欣賞新嘅嘗試，認為無傷大雅又好有娛樂性。
機緣巧合下，我成為咗圈內人人知曉嘅角色。原本以為Candy好快會唔記得我，但係當時發生嘅事情將我哋兩個越拉越近，兩人之間嘅灰色地帶甚至越嚟越模糊。
「你有冇睇過啲人嘅言論，好衰㗎。」我嘗試回應啱啱嘅話題。
「我無入去睇啊，你搞到我有啲緊張添。」Candy加上驚訝表情符號。
「咁又無講你衰嘢嘅，不過有時啲報告寫到個女仔好差，我覺得好慘，將心比心日日要對咁多人，有時候攰啲啫。」我回覆。
「係咁㗎啦，所以我一直都無入去睇，怕會唔開心。」Candy回覆。
「俾咗錢就當自己係大爺咁，以為自己掌握到所有嘢，佢哋只係滿足喺自己嘅幻想，逼其他人配合佢哋嘅權力慾。」我指出問題核心。
Candy回覆咗一個傷心樣。
「不過你形象維持得好好㗎，啲人係笑我寫得誇張啫。咁多人鍾意你，睇嚟你都有下過苦功喎。」我收斂咗少少，嘗試以哄嘅方法令佢容易啲回覆。
「我只係做好工作，盡量令每個客人都開心，咁之後佢哋要點寫，我都無辦法。」Candy嘆道。
我沉默咗一陣，究竟應該點樣回應佢？如果佢只係想有一個人聽吓佢諗法，咁應該附和佢定係提出建議？如果附和佢，會唔會有種好應酬形式嘅感覺俾佢？提出建議，又會唔會又太過侵擾人哋嘅生活？
「我今日不斷打開你嘅頭像睇。」喺未嚟得切回應嘅時候，Candy已經轉咗個話題。
「你咁變態㗎。」我笑住回覆，為Candy開咗另一個話題而感到慶幸。
「想記住你入個腦到嘛。」Candy回答。
我心入面認為呢個可能係Candy對所有客人嘅開場白，不過既然佢打斷咗我嘅私人時間，我都想繼續傾落去。
「啊，你有冇聽過粉紅色嘅大象。」我借此打開咗新話題。
「啫係點啊？」Candy加上一頭霧水表情符號。
「咁你而家係唔係成個腦都係諗緊粉紅色嘅大象。」我戲言。
「又好似係喎，點解咁嘅？」Candy問。
「人嘅思考好得意㗎，只要我叫你唔好諗嗰樣嘢，你就會不斷咁諗。」我回答。原理就好似「注意呼吸」遊戲一樣。
「就好似話你以後開門入房都會諗起我，咁你以後入房呢個行動就會連結咗落我度，所以你每次開門都會諗起我。」我補充道。
「咁如果我話你以後見到仼何嘢都會諗起我呢？」Candy懷疑問。
「咁大範圍我又唔知得唔得喎，過幾日試完再話你知。」佢嘅提問其實好合理，但係一次過要連結咁多嘢，實在唔知可唔可以。
「咁咪好恐怖囉？成世人每次打開房門都會諗你。」Candy問。
「我有個經驗，有一次同朋友食飯，我同自己講一定要記住呢一刻。之後到而家我都會不斷回想當日同朋友食飯嘅畫面，不過已經習以為常。我會不斷諗起呢個畫面，好似生活一部份咁，就當係自己亂玩記憶嘅懲罰。」我將自己嘅體驗講出。
「你係咪傻㗎，要記都記起個靚女啦！好似我咁。」Candy笑道。
「你講得無錯，不過我都控制唔到，喺嗰一刻我就係想記住佢食飯嘅畫面。」我認真回覆。
「我返到屋企啦，咁我過幾日先話你知係咪會諗起你啦。」Candy回應。
「咁早啲抖啦，今日大家返工都辛苦啦。」我加上表情符號回覆。
「我記得我想講咩啦！其實食香口膠唔會遮得晒啲煙味㗎，傻佬，早啲抖啦！晚安！」Candy一直都記得要講呢句說話，只不過之前未等到合適時機。
「早抖啦！」我都無謂問得太清楚丟自己架。
諗返轉頭，雖然我指控討論區嘅會員享受自己幻想嘅世界，但係一直活喺自己世界個個其實係我，Candy一句說話就打破咗我幻想嘅空間，原來食香口膠可以遮煙味只係我一廂情願。人哋唔當係一回事之餘，重隨時可以拆穿我嘅憧憬。情況就好似畀大人揭穿講大話嘅小朋友咁，小小保留臉子嘅餘地都無，自以為掌握一切主導權，原來只在於對方願唔願意作出配合。
其實我理性一直知道，只係繼續欺騙自己會舒服啲。