《我老婆唔係我女朋友》【那些年／學界比賽／真人】 第四章至六章: 【第六章】 感激我遇上（２）
返回看台，跟Lulu交待了學游水事宜，當然還有總舵主疑似未有女朋友的情報，她急不及待一蹦一跳的去找總舵主了。
黐著瘦妹休息了一會兒，唞順條氣後，交帶她在泳池外等，我去梳洗換衫收工了。
在泳池外，我好奇的問阿心：「點解又可以嚟睇我比賽嘅？唔係要上堂咩。」
她狡黠的眼眨眨：「好彩你入到決賽咋，下晝點完名咪走囉，有乜問題喎。」
「妳咁大膽走堂？！」明明是車頭份子的乖乖女，似乎俾我帶壞了。
「嘻，你教我嘅。」她蠱蠱惑惑的笑著說。「我應承今次喺終點等你嘛，順便嚟見識吓總舵主有幾靚仔囉，係高大有型嘅，不過我唔鍾意佢，佢恰我條仔！」
好學唔學，又走堂，又「恰我條仔」，有衰嘢又賴我教。（今時今日都是這樣！）
「我…哎…」一時之間不知道怎樣反應。
幸好小吱喳繼續發言：「不過我個小朋友今日都幾靚仔，直情閃閃發光。」
「乜話！？淨係今日咋咩？」
「嘻嘻，差唔多啦，一路行一路講啦。」她伸手拖著我。
「唉～最衰梗頸四，如果唔係就有牌攞啦。」雖說沒有太大失落感，但始終失之交臂，禁不住微微抱怨一下。