《我老婆唔係我女朋友》【那些年／學界比賽／真人】 第四章至六章: 【第六章】 感激我遇上（３）
「唔係吖，你已經好叻喇，邊個話你無獎牌？」她在袋中掏出一個金牌，佢中學時候「嗰個仁」送畀佢嘅金牌。「嗱，物歸原主嘞，呢個係無名勳章，獎你不為榮譽，只為自己嘅尊嚴同堅持而戰。」
「哈，妳真係仲keep住個牌？！」我又驚又喜，因為我一直也未見過這件「定情信物」的真身。我哄近她耳邊輕聲說：「嘻～妳仲唔係暗戀我？」
她乘機飛快在我面頰親了一口，白了一眼：「明愛嘞，好未呀？唔准再笑我嘞。」頓了頓續說：「喂，頭先沖涼有無用梘液沖身呀？」
我大感奇怪，明明好sweet噉鍚我一啖，關沖涼乜嘢事？唔通...莫非...有下文？
連忙答她：「有呀，沖得好乾淨喇，嘻。」
「嗯～小朋友真乖。欵，拉高衫袖畀姐姐睇吓手臂，係唔係真係大隻咗？」她又用一貫循循善誘的心媽mode說出來。
雖然覺得奇怪，不過她的跳躍思維並非正常人能夠理解，我不虞有詐，依言拉起衫袖，誰知道她快如閃電的，在我手臂上狠狠咬了一口。
她興高采烈的笑道：「哇哈哈～嗱，你收咗我禮，我又扱咗印確認，小肥肥賣斷咗畀我喇，嘻嘻。」再肉緊的摟著我手臂說：「小肥肥真係幾叻嘅，肯堅持完成比賽，仲求求其其都有第四，真好～哈～」似乎比自己攞獎更開心。
「哎…妳個女色魔真係變態㗎…求其？我日日練到隻狗噉喎。」我手臂未來得及痛，轉頭又被小饅頭依偎著，徘徊在愛與痛的邊緣。
後來從經驗中觀察到，這個女魔頭是有怪癖的，她動情時會咬人…