《我老婆唔係我女朋友》【那些年／學界比賽／真人】 第四章至六章: 【第六章】 他鄉遇故友（４）
「我讀【山大】TRAN呀，喂門小你讀商科正吖，又多囡搵工又易。」可以入【山大】讀翻譯，阿祥語文科應該考得不錯，話說人人都覺得讀吹水科唯一的優點就是多囡。
「我頂你咩，翻譯仲好搵啦…」我還未說完，阿祥突然插嘴打斷我。
「咦喂？嗰條囡你識唔識，好似叫你喎。」阿祥低聲跟我說。
（瘦妹無來都是好的，畀佢聽到我哋同鄉會聚舊的情況，皺眉都皺到出魚尾紋…）
「咦，『搣時呂』，妳要游比賽咩？」原來是阿John老母Sarah Connor在看台通道向著阿祥打手勢叫我，遂由看台頂層行落去找她。
「唔係呀，嚟打氣咋。」Lulu身穿【肉園】泳隊標緻的tracksuit，跟笠住件頹Tee的我相比，簡直相映成趣，高下立見。
「上次見你急瘦，原來你練水減肥，又唔話我知，嚇死我呀。」Lulu熱情依舊，關切之情溢於言表。
「嘻嘻，唔好意思囉，妳上次又成棚細路，又以為我清潔泳池，一言難盡嘛。」我也有點不好意思，白費了她的關心。
「哎呀，我以前有朋友又係急瘦，後來發現真係有大病呀，要小心㗎。」都說她是古道熱腸的人。
「噉我而家無事無幹，唔使擔心啦。係呢，阿心話妳想嚟練水喎，唔見妳打畀我嘅？」想起之前阿心說過她想來練習的事。
「無呀，佢話你要比賽嘛，諗住等你完咗比賽先囉。你一陣幾時開始呀？我都會幫你打氣㗎。」不知道是女校生比較單純還是怎樣，無論瘦妹和高妹待人都非常真誠，自從瘦妹被我私有化後，高妹就更似中央暖氣了。