《我老婆唔係我女朋友》【那些年／學界比賽／真人】 第四章至六章: 【第六章】 他鄉遇故友（３）
除低墨鏡望真，呵，原來是阿祥，阿祥花名「大腸」，腸除了是祥字諧音外，還有是他練水前總要在城寨旁，東頭邨口泰興士多隔離小販檔，買包炸大腸帶來吃，是我們當年隔離鄰線的「九龍仔之友」。
以前大家在同一個泳池練水的友人，親密如同家人一樣，幾乎日日相見，當然比之阿扁或總舵主這類只在戰場才碰見的「敵人」，親疏有別了。
「阿腸門小你鹵味，好耐無見喎，幾多年喇？」話晒多年鄰里關係，少不免用鄉下話問候吓。
「喂～都有四五年無見，你個西仁都無穿無爛吖。」無見多年，阿祥跟我一點不生疏。「喂你頭先見唔見到『腍河粉』呀？佢都有嚟喎。」
「挑～手下敗將，我見到佢實串狗佢啦。」「林學奮」是我游學界時另一個單項的長年宿敵，與總舵主的角色相約，只是我經常都贏他（嘻嘻）而已，但都多年未見了。
「話時話你讀邊間呀？舊年唔見你游嘅？」阿祥問起我的近況。
我指著Leon說：「咪同呢條粉皮一齊喺【建橋】讀IBAM囉，游條命咩，無練水好多年啦，你仲有練咩？」我也好奇同齡的其他人是不是真能兼顧訓練、學業和兼職。
「我都無返會幾年喇，而家咪喺學校泳隊跟住操幾堂噉囉，今日嚟都係戥腳游接力咋。」看來大家都有著相近似的經歷，只是【建橋】連基本練習的支援也欠奉。
「你都好吖，學校都有得練下，我哋就真係百無。係呢，你讀邊間呀？」我心下慨嘆，「訓練資源」呢家嘢，真是由細到大都與我無緣。