《我老婆唔係我女朋友》【那些年／學界比賽／真人】 第四章至六章: 【第六章】 他鄉遇故友（５）
「嘩～妳幫對家打氣唔怕咩？」我都是第一次有囡囡幫我打氣，感覺怪新奇的。
高妹一挺胸膛說：「怕咩，同朋友打氣嘛，邊個敢話我呀！」
既然佢咁肯定幫我打氣，不如叫她順便幫我計時都好喎。「欵，Lulu，反正妳都睇比賽，不如一陣幫我計時吖。」轉身行返上位攞個秒錶給她。「一陣第一場應該先游接力初賽，我游第四棒，妳幫我記低我分別去到半池和游完時間好嗎？」
「只係計你就得嗱？」她有點奇怪。
「係呀，我哋學校志在參與啫，我想知道自己今日狀態，一陣單項時做參考囉。」
這時Leon來叫我，是時候換衫熱身，準備接力初賽了。
在更衣室內，Leon陰陰濕濕的跟我說笑：「老佛爺一唔喺度就猛同囡囡傾偈，我實報串喎。」以前唔興用篤灰這個詞彙的。
我沒好氣的回應：「呢位天才，個高妹係老佛爺啲姊妹嚟㗎，懶醒。」Leon無去舞會，不清楚我跟姊妹團的瓜葛。
提起老佛爺，有點掛念她，應該返學了吧。
「哈，噉老佛爺今日嚟唔嚟探你病呢？」個天才一點不介意我「質」佢。
「應該唔嚟喇，佢返Summer Course嘛，唔可以甩堂啦。」沒有女友在身邊，講起都有點失落。
「啊？如果你單項入到決賽，下晝可能得你一條友孤獨終老嚕，我哋接力賽都唔會入到決賽㗎啦，游完上半場可以返歸了。」Leon進一步打擊我的情緒。
「吓？！你唔留低㗎？」我有點愕然。
「我約咗傾莊呀，最多同你食埋午飯咋。」他非常無奈的攤攤手。
「搞隱錯呀…咁有義氣…」今次真是孤身上路了。